اۋعانستاندا وققاعارلاردىڭ ءبىرى ەل پرەزيدەنتىنىڭ تۋعان ءىنىسى احماد ۆالي كارزايدى اتىپ ءولتىردى.
BaltInfo اگەنتتىگىنىڭ حابارلاۋىنشا, حاميد كارزايدىڭ ءىنىسى كانداگاردىڭ پروۆينتسيالىق كەڭەسىنىڭ باسشىسى قىزمەتىن اتقارعان, سول سياقتى ول ەلدەگى ەڭ ىقپالدى ءارى باي ادامداردىڭ ءبىرى بولعان. قىلمىس ۆالي كارزايدىڭ ۇيىندە جاسالىپتى. پرەزيدەنتتىڭ ءىنىسىن حاميد كارزايدىڭ بۇرىنعى وققاعارى ساردار موحاممەد ولتىرگەن كورىنەدى. قاسكۇنەمدى كۇزەتشىلەر سول جەردە تاباندا اتىپ تاستاعان. وقيعا ورىن العان ساتتە ۇيدە قوناقتار بولعان ەكەن. مەملەكەت باسشىسىنىڭ اكىمشىلىگى قىلمىستى تەرگەۋدى باستاۋ جونىندە وكىم بەرىپ وتىر.
اقش سيريا باسشىسىن مويىنداماي وتىر
اقش وكىمەتى بۇدان بىلاي سيريا پرەزيدەنتى باشار اسادتى زاڭدى دەپ سانامايدى, سوندىقتان ۆاشينگتون ونىڭ بيلىكتە قالۋىنا مۇددەلى ەمەس.
ساراپشىلار مۇنداي ارەكەت داماسكىگە باتىس تاراپىنان بۇرىنعىدان دا قاتال سانكتسيالار تۋعىزادى, دەپ ەسەپتەيدى. پرەزيدەنت اساد ماڭگىلىك ەمەس, ءبىز ونىڭ بيلىكتە قالا بەرۋىنە مۇددەلى ەمەسپىز, ءبىزدىڭ ماقساتىمىز سيريا حالقىنىڭ دەموكراتياعا دەگەن ۇمتىلىسىن كورۋ, ال ەل پرەزيدەنتى اساد ءوز زاڭدىلىعىن جويدى, ول ءوز ۋادەلەرىن ورىنداي العان جوق, ونىڭ سىرتىندا ول ءوز حالقىن باسىپ, تۇنشىقتىرۋ ءۇشىن يراننان كومەك الدى, دەپ مالىمدەگەن اقش-تىڭ مەملەكەتتىك حاتشىسى حيللاري كلينتون. مۇنداي قاتقىل مالىمدەمە جاساۋعا داماسكىدەگى اقش ەلشىلىگى جانىندا ۇيىمداستىرىلعان بۇقارالىق شەرۋلەر سەبەپكەر بولىپ وتىرعان سىڭايلى.
تەررورشىلار گاز قۇبىرىن جارىپ جىبەردى
بەلگىسىز بىرەۋلەر كەشە سيناي ارالىنىڭ سولتۇستىگىندەگى گاز قۇبىرىنىڭ تاراتۋشى ستانساسىن جارىپ جىبەرگەن.
بۇل يزرايلگە ەگيپەتتەن وتىن جەتكىزىلەتىن گاز قۇبىرىنا جاسالىپ وتىرعان ءتورتىنشى شابۋىل ەكەن. كۋاگەرلەردىڭ ايتۋلارىنشا, بەلگىسىز ادامدار كۇزەتشىگە شابۋىل جاساپ, سوڭىنان ال-اريش قالاسىنا تاياۋ ماڭدا ورنالاسقان ستانسانى جارىپ جىبەرگەن كورىنەدى. جارىلىستان پايدا بولعان جالىن 20 شاقىرىم قاشىقتىققا دەيىن كورىنىپ تۇرعان. سولتۇستىك سينايدىڭ گۋبەرناتورى مەن قاۋىپسىزدىك قىزمەتىنىڭ باسشىسى وقيعا بولعان جەرگە كەلىپ جەتكەن, ال قاۋىپسىزدىك قىزمەتىنىڭ قىزمەتكەرلەرى بولسا, قاسكويلەردى ىزدەستىرۋدە. 5 اقپان مەن 27 ساۋىردە بولعان جارىلىستاردان كەيىن ستانسانى بىرنەشە اپتاعا جابۋعا تۋرا كەلگەن بولاتىن.
فرانتسيا ءوز اسكەرلەرىن شىعارماق
2012 جىلدىڭ سوڭىنا تامان 1000-نان استام فرانتسۋز اسكەريلەرى اۋعانستاننان كەتپەك.
ۆاشينگتوننىڭ قول سىلتەۋىنەن كەيىن ناتو كواليتسياسىنىڭ وزگە مۇشەلەرى دە اسكەرلەرىن شىعارۋ تۇرعىسىنداعى ءابىگەرگە تۇسە باستادى. فرانتسيا پرەزيدەنتى نيكوليا ساركوزي ساروبي اسكەري بازاسىندا سويلەگەن سوزىندە الداعى جىلدىڭ سوڭىنا قاراي 4 مىڭ سولدات پەن وفيتسەرلەردەن تۇراتىن فرانتسۋز كونتينگەنتىنىڭ تورتتەن ءبىرىنىڭ اۋعانستاننان كەتەتىنىن مالىمدەدى. ولار سوعىس باستالعان 2001 جىلدان بەرى اۋعانستاندا كابۋل قالاسى ورنالاسقان كاپيسۋ پروۆينتسياسىنا باقىلاۋ ورناتۋ ىسىمەن اينالىسىپ كەلەدى. وسى جىلدار ىشىندە فرانتسۋزدىڭ 64 اسكەري قىزمەتشىسى, ونىڭ 9-ى بيىلعى جىلى قازا تاپقان. فرانتسيا پرەزيدەنتى اسكەرلەردى شىعارۋ جونىندە ايتىپ تۇرىپ ويىن «سوعىستى اياقتاۋ كەرەك» دەگەن سوزبەن تۇيىندەگەن كورىنەدى.
ءىستى قاراۋ كەيىنگە قالدىرىلدى
ستروسس-كان قوناق ءۇي قىزمەتشىسىن زورلادى دەگەن وزىنە تاعىلعان ايىپقا قاتىستى ىستە جەڭىپ شىعادى دەگەن سوزدەر سوڭعى ۋاقىتتارى ءجيى قايتالانۋدا.
دەگەنمەن, زارداپ شەككەن تاعى ءبىر قىز تابىلىپ وتىرعان سىڭايلى. قازىر تەرگەۋ جۇمىستارى جۇرۋدە. حالىقارالىق ۆاليۋتا قورىنىڭ بۇرىنعى باسشىسىنا قاتىستى داۋلى ءىستى قاراۋ كەيىنگە قالدىرىلدى. ول جونىندە كەشە نيۋ-يورك پروكۋراتۋراسى مالىمدەگەن. وسىلايشا 18 شىلدەدە وتۋگە ءتيىس تىڭداۋ 2011 جىلدىڭ 1 تامىزىنا شەگەرىلىپ وتىر. مۇنىڭ ءوزى ءىس تەز اياقتالادى جانە ستروسس-كان جەڭىپ شىعادى دەگەن ءسوزدىڭ ءورشي تۇسۋىنە سەبەپكەر بولعان سىڭايلى. بۇگىندە مەنى زورلادى دەپ ارىز بەرگەن 32 جاستاعى گۆينەيالىق ەميگرانت ايەلدىڭ امەريكادان باسپانا ىزدەي ءجۇرىپ وسىعان دەيىن دە تالاي وتىرىك ايتقاندىعى, سالىقتان جالتارعاندىعى بەلگىلى بولىپ وتىر.
پرەزيدەنت سايلاۋىنا دايىندىق باستالدى
تۇركىمەنستان پرەزيدەنتى گۋربانگۋلى بەردىمۋحامەدوۆ 2012 جىلى وتەتىن پرەزيدەنت سايلاۋىنا دايىندىقتى باستاۋ جونىندە حابارلاعان.
مينيسترلىكتەر مەن سالالىق ۆەدومستۆولاردىڭ, قوعامدىق ۇيىمداردىڭ, ەلدىڭ بارلىق ازاماتتارىنىڭ مىندەتى پرەزيدەنتتىك سايلاۋعا تىڭعىلىقتى دايىندالىپ, ونى جوعارى دەڭگەيدە, اشىقتىق پەن جاريالىلىق جاعدايىندا وتكىزۋ, ونىڭ ءوزى نىعايىپ كەلە جاتقان دەموكراتيانىڭ ايعاعى بولىپ تابىلۋعا ءتيىس, دەپ اتاپ كورسەتكەن پرەزيدەنت تاياۋداعى ۇكىمەت وتىرىسىندا. مەملەكەت باسشىسى تۇڭعىش رەت وپپوزيتسيا تۋرالى دا ءوز ويىن اشىق ايتقان. ءبىز وزدەرىن وپپوزيتسيادانبىز دەيتىن توپتارمەن قىزمەتتەس بولۋدان قورىقپايمىز, ەگەر وپپونەنتتەردىڭ ءبىرى الداعى پرەزيدەنت سايلاۋىنا قاتىسپاق نيەتتە بولسا, ونىڭ ەلگە ەمىن-ەركىن كەلۋىنە بولادى, دەپ اتاپ كورسەتكەن.
مارادونا اۆتوبۋسپەن سوقتىعىستى
بەلگىلى فۋتبولشى ديەگو مارادونا قاشاندا ءبىر وقىس وقيعالارعا تاپ بولادى دا جۇرەدى.
بىردە ونى ەسىرتكى قولدانعان جەرىنەن ۇستاپ السا, ەندى بىردە ونىڭ ماحاببات قۇمارلىعىن ۇيىمداستىرىپ جۇرگەنى بەلگىلى بولىپ قالادى. ونىڭ پاپاراتستسيلەرگە قارسى قولىنا قارۋ ۇستاپ شىققان كەزى دە بولعان. ال وتكەن جىلى ەڭكەيىپ ءسۇيىپ الامىن دەگەن كەزدە فۋتبول كورولىن ءوزىنىڭ ءيتى بەتىنەن تىستەپ العان بولاتىن. وسى جولى ول ءوزى رولدە وتىرىپ جول-كولىك وقيعاسىنا تاپ بولىپتى. «حوندا» اۆتوماشيناسىنىڭ رولىندە كەلە جاتقان ديەگو اۆتوبۋسقا بارىپ سوقتىعىسىپتى. مارادونا اياعىن زاقىمداپ السا, ونىڭ ازاماتتىق نەكەدەگى قۇربىسى ۆەرونيكا جەڭىل جاراقات العان كورىنەدى.
ينتەرنەت ماتەريالدارى نەگىزىندە ازىرلەندى.