الماتى قالاسىنداعى 28 گۆارديالىق پانفيلوۆشىلار اتىنداعى ساياباقتا قوعامدىق ۇيىمدار مەن قالا ارداگەرلەرى 316-شى اتقىشتار ديۆيزياسىنىڭ قۇرىلعانىنا 70 جىل تولۋىنا وراي «پانفيلوۆ ديۆيزياسىنىڭ كۇنى» اتتى مەموريالدى-پاتريوتتىق شارا وتكىزدى.
شارانىڭ سالتاناتتى ءراسىمىنە قورعانىس ءمينيسترلىگىنىڭ وكىلدەرى, الماتى قالاسىنداعى رەسەي فەدەراتسياسىنىڭ باس كونسۋلى ۆ.زاۆيالوۆ, قىرعىز رەسپۋبليكاسىنىڭ باس كونسۋلى س.ۇبۇكەەۆ جانە پانفيلوۆشى جاۋىنگەرلەردىڭ نەمەرەلەرى قاتىستى. شارا بارىسىندا كورشىلەس ەلدەردىڭ رەسمي تۇلعالارى سۇراپىل سوعىس كۇندەرىندەگى باۋىرلاس ۇلتتاردىڭ ەرلىكتەرىنە توقتالىپ, داڭق مەموريالىنا, گەنەرال ي.ۆ.پانفيلوۆتىڭ, باتىر ب.مومىش ۇلىنىڭ ەسكەرتكىشتەرىنە جانە 28 پانفيلوۆشى جاۋىنگەرلەردىڭ ەسكەرتكىش تاقتالارىنا گۇل شوقتارىن قويىپ, «كەڭەس وداعى باتىرى» اتاعىنا يە بولعان 37 جاۋىنگەردىڭ قۇرمەتىنە اسپانعا اق ءتۇستى 37 شار ۇشىردى. وتاندى قورعاپ ماسكەۋ تۇبىندە ەرلىك كورسەتكەن ەرلەردى ءۇنسىز ەسكە الىپ, اسكەري ءراسىم بويىنشا اسپانعا بىرنەشە دۇركىن وق اتتى.
رەسەي فەدەراتسياسىنىڭ باس كونسۋلى ۆ.زاۆيالوۆ وسى جيىندا كەيىنگى كەزدە رەسەيلىك كەيبىر باسىلىمدار جەڭىل جاڭالىق ىزدەپ اتالمىش ديۆيزيا جايلى جالعان دەرەكتەر تاراتقاندىعىن, كەرىسىنشە, زەرتتەۋ بارىسىندا پانفيلوۆشى جاۋىنگەرلەردىڭ جاساعان ەرلىكتەرى ءبىز بىلەتىننەن دە داڭقتى ەكەندىگى ءمالىم بولعانىن جەتكىزدى. ۇيىمداستىرۋ قورىنىڭ ديرەكتورى م.تيۋنين پانفيلوۆ ديۆيزياسىنىڭ تاريحي مىسالىن نەگىزگە الا وتىرىپ قازاقستاندىق پاتريوتيزم رۋحىن تاربيەلەۋ كەرەك دەگەن پىكىر ايتتى. سوعىس ارداگەرلەرى, اسكەري قىزمەتكەرلەر جانە قوعامدىق ۇيىم وكىلدەرى مەن گەنەرال پانفيلوۆتىڭ تۋىستارى قاتىسقان «پانفيلوۆشى جاۋىنگەرلەردى ەسكە الا وتىرىپ» اتتى دوڭگەلەك ۇستەل وتىرىسى دا كەشەگى ەرلەرگە بۇگىنگى كورسەتىلىپ وتىرعان قۇرمەت ماسەلەسىن ورىندى قوزعادى.
قانات ەسكەندىر, الماتى.