جۋىردا «قاراشىعاناق پەتروليۋم وپەرەيتينگ بۆ» (قپو) كومپانياسى ءوزىنىڭ 2010 جىلعى ورنىقتى دامۋ ەسەبى جاريالانىمى شىققاندىعىن حابارلادى. اتالمىش ەسەپ قپو-نىڭ 2010 جىلى جۇرگىزگەن جۇمىستارىنىڭ ناتيجەسى مەن كومپانيانىڭ ورنىقتى دامۋ بويىنشا ءوز مىندەتتەمەلەرىنە قول جەتكىزۋدەگى ناقتى ۇستانىمىن بەينەلەيدى.
«مەن وسىمەن رەتى بويىنشا ءۇشىنشى بولىپ سانالاتىن, ءبىزدىڭ 2010 جىلعى وندىرىستىك كورسەتكىشتەرىمىزبەن قاتار, 2009 جىلى العا قويعان ماقساتتارىمىزعا قالاي قول جەتكىزگەنىمىز ءجونىندەگى قپو-نىڭ ورنىقتى دامۋى تۋرالى جاڭا ەسەپتى جاريالاپ وتىرمىن. بۇل مەن ءۇشىن ۇلكەن ابىروي», دەپ اتاپ كورسەتتى قپو باس ديرەكتورى دجۋزەپپە پازي. قپو وسى جوباعا قاتىسۋشى كومپانيالاردىڭ عانا ەمەس, قازاقستان مەملەكەتىن دە تۇراقتى پايدامەن قامتاماسىز ەتۋدى ءوز الدىنا ماقسات ەتىپ قويىپ وتىر. ونىڭ ىشىنە ايماقتىڭ تۇراقتى دامۋىنا جاعداي جاساۋ, قورشاعان ورتانى قورعاۋ سالاسى, سونىمەن قاتار ەكونوميكالىق جانە الەۋمەتتىك دامۋ كىرەدى, دەدى ول.
وتكەن جىلى قاراشىعاناق كەن ورنىنىڭ اعىمداعى جۇمىستارى مەن قولدانىسقا بەرۋ بارىسىندا ءونىم ءوندىرۋدىڭ جالپى كولەمى 133,7 ملن. باررەلدى قۇرادى. سونىمەن قاتار جاڭا بەس ۇڭعىما بۇرعىلانىپ, جۇمىس ىستەپ تۇرعان 14 ۇڭعىماعا ءجوندەۋ جۇرگىزىلىپتى. جىل بويى ۋكپگ-2 ۋچاسكەسىندە ماتەريالداردى اۋىستىرۋ جوباسى اياقتالىپ, گاز ۇدەتكىش كومپرەسسورلار قولدانىسقا ەنگىزىلدى. ال جوندەۋ-پروفيلاكتيكالىق جۇمىستارى ەشقانداي توسىن جاعدايلارسىز جانە ءتىپتى جۇمىس كەستەسىنەن وزىڭقىراپ ورىندالدى. قجك-نى تۇراقتاندىرۋدىڭ ءتورتىنشى تەحنولوگيالىق جەلىسى قۇرىلىسى توقتاماستان ءجۇرىپ, ءناتيجەسىندە ونى 2011 جىلدىڭ مامىرىندا قولدانىسقا بەرۋگە مۇمكىندىك تۋدى.
قاۋىپسىزدىك تەحنيكاسىمەن قامتاماسىز ەتۋدىڭ جاڭا جوسپارى ءجۇزەگە اسىرىلدى. وندا مەردىگەرلىك ۇيىمداردىڭ قىزمەتىنە باسا ماڭىز اۋدارىلادى. ولاردىڭ قاۋىپتى فاكتورلاردان حاباردارلىعى, مونيتورينگ جۇرگىزىپ, ەسەپتىلىكتى بەرىپ وتىرۋعا, سونىمەن قاتار قت سالاسىندا كوشباسشىلىقتى ماشىقتاندىرۋدى دامىتۋى قارالادى. قپو قورشاعان ورتانى قورعاۋ سالاسىنداعى جوسپاردى دا جوعارى دەڭگەيدە ۇستاپ تۇرا الدى. 2010 جىلى 29 جەلتوقساندا كومپانيا مەملەكەتتەن اتموسفەراعا قالدىقتار شىعارۋ ءۇشىن 3 جىلعا رۇقسات الدى. سونداي-اق ISO 14001 ستاندارتىنىڭ سەرتيفيكاتىنا سايكەس كەلەتىندىگىن دالەلدەي الدى. گازدى تولىقتاي پايداعا جاراتۋ كورسەتكىشى (قالدىقتارىمەن قوسا) 2010 جىلى 99,87%-دى كورسەتتى. بۇل كومپانيانىڭ جالپى ءوندىرگەن گازىنىڭ, ياعني 15 ترلن.تەكشە مەتردىڭ تەك قانا 0,02 ترلن.تەكشە مەترى (0,13%) ءوندىرىستىك الاۋعا جانە وڭدەۋشى قۇرىلعىلارعا باعىتتالعان نەمەسە ۇڭعىمالاردى تازالاۋ بارىسىندا جاعىلعانىن كورسەتەدى. گازدى قالدىقسىز پايداعا جاراتۋدا قول جەتكىزىلگەن وسى دەڭگەي ءبۇكىل ءدۇنيە ءجۇزى بويىنشا مۇناي-گاز سالاسىنداعى تەڭدەسسىز وقيعا بولىپ سانالادى.
كومپانيادا م ۇلىكتى مەملەكەت مەنشىگىنە الۋدىڭ ونجىلدىق جوسپارى ويداعىداي ءجۇزەگە اسىرىلدى. ناتيجەسىندە 2010 جىلدىڭ سوڭىنا قاراي قپو-داعى بىلىكتىلىگى جوعارى جانە كەڭسەلىك اكىمشىلىك قىزمەتتەرىنىڭ بارلىعى, تەحنيكالىق قىزمەتكەرلەر مەن سۋپەرۆايزەرلەردىڭ 91%-ى, باسقارۋشىلىق قىزمەتتىڭ 62%-ى قازاقستاندىق قىزمەتكەرمەن تولىقتى. ەل زاڭناماسىنداعى جەرگىلىكتى ۇلەستى دامىتۋعا بايلانىستى وزگەرىستەرگە وراي ءوز مىندەتتەمەلەرىن ورىنداۋدى دا ۇمىتقان جوق. قپو كومپانياعا تاۋار جەتكىزۋگە, قىزمەت ءجانە جۇمىس كورسەتۋ تۇرلەرىنە بايلانىستى 283 قازاقستاندىق كومپانيامەن كەلىسىم-شارتقا وتىردى. بۇل كەلىسىم-شارتتاردىڭ قۇنى 527 ملن.دوللاردان استام.
قاراشىعاناق-ورال گاز قۇبىرىنىڭ قالعان بولىكتەرى قۇرىلىسى اياقتالدى. بۇل قۇبىرلار بيىل جەرگىلىكتى بيلىك ورگاندارىنىڭ باقىلاۋىنا بەرىلەدى. اقساي قالاسىندا جاڭا مەكتەپ عيماراتى اشىلدى. جەرگىلىكتى الەۋمەتتىك ينفراقۇرىلىم دامۋىنا قوسقان ۇلەسى ءۇشىن «پارىز» بيزنەستىك الەۋمەتتىك جاۋاپكەرشىلىگى ءجونىندەگى ۇلتتىق بايقاۋىندا التىن ماراپاتقا يە بولدى.
بۇل ەسەپ ءۇش تىلدە جاريالانىپ, PricewaterhouseCoopers كومپانياسىنىڭ تاۋەلسىز راستاۋىن الدى.
ۆەنەرا تۇگەلباي.
باتىس قازاقستان وبلىسى, اقساي قالاسى.