الماتى قالاسىندا قازاقتىڭ كورنەكتى اقىنى «قادىر مىرزا-ءالىنىڭ» قوعامدىق قورى ءوز جۇمىسىن باستادى. قازاقستان جازۋشىلار وداعىندا وتكەن جيىندا اتالمىش قوردىڭ باسشىلىعىنا قازاقستاننىڭ ەڭبەك سىڭىرگەن قايراتكەرى, قازاقستان كومپوزيتورلار وداعىنىڭ مۇشەسى, ءانشى-كومپوزيتور دونەدىل قاجىموۆ تاعايىندالدى.
قوعامدىق قوردىڭ اشىلۋ جانە باسشىلىق تاعايىنداۋ ءراسىمى ىسپەتتى وتكەن جيىنعا قازاقستاننىڭ حالىق ءارتىسى ە.حاسانعاليەۆ, رەسپۋبليكا سارايىنىڭ ديرەكتورى ب.دوسپانوۆ, «كاتەك» كومپانياسىنىڭ باسشىسى ق.نۋپوۆ, «NGS+» كومپانيالار وداعىنىڭ ديرەكتورى ب.باجىكوۆ, «ارىس» باسپاسىنىڭ ديرەكتورى ع.انەس, «مەرەكە» باسپاسىنىڭ ديرەكتورى م.قۇلكەنوۆ, قازاقستان جازۋشىلار وداعى حاتشىسىنىڭ ءبىرىنشى ورىنباسارى ع.جايلىباي قاتىستى. جوعارىدا اتى اتالعان كوممەرتسيالىق كومپانيالار اتالعان قورعا 1 ميلليون تەڭگەدەن قارجى اۋدارعاندارىن جەتكىزدى.
قانات ەسكەندىر.
الماتى.