پارلامەنت ماجىلىسىندەگى «جاڭا قازاقستان» دەپۋتاتتىق توبى «ەتنومادەني ءبىلىم بەرۋ پروبلەمالارى جانە ونى شەشۋ جولدارى» دەگەن تاقىرىپتا دوڭگەلەك ۇستەل وتكىزدى. ءماجىلىس دەپۋتاتى, «جاڭا قازاقستان» دەپۋتاتتىق توبىنىڭ جەتەكشىسى قايرات سادۋاقاسوۆ جينالىسقا مودەراتورلىق جاسادى.
دوڭگەلەك ۇستەلدە ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى باحريدەن كارىمجانوۆ – «قازىرگى زامان قوعامى مەن ءبىلىم بەرۋدەگى وزەكتى ماسەلەلەر», ءبىلىم جانە عىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ وكىلى سەرىك ومىرباەۆ – «جوعارى مەكتەپتەگى ەتنوپەداگوگتىق ءبىلىم بەرۋ پروبلەمالارى» دەگەن تاقىرىپتاردا بايانداما جاسادى.
ءماجىلىس دەپۋتاتى, «جاڭا قازاقستان» دەپۋتاتتىق توبىنىڭ مۇشەسى مۇرات احماديەۆتىڭ «ەتنومادەني ءبىلىم بەرۋ جۇيەسىندەگى «جەكسەنبىلىك مەكتەپتەر» قىزمەتىنىڭ وزەكتى ماسەلەلەرى» دەگەن تاقىرىپتا سويلەگەن ءسوزى تىڭداۋشىلاردى ەلەڭ ەتكىزدى. ەڭ الدىمەن, «جەكسەنبىلىك مەكتەپ» دەگەننىڭ ماعىناسىنا توقتالعان دەپۋتات وسى اتاۋ جايلى تۇسىنىك ءبىزدىڭ ەلدىڭ ەشقانداي نورماتيۆتىك اكتىسىندە جوق ەكەنىنە نازار اۋداردى. «جەكسەنبىلىك مەكتەپتەردىڭ» جاعدايى, ۇستازدار قۇرامىنىڭ ءبىلىم-بىلىگى, ساباق وتكىزىلەتىن ورنى, قارجىلاندىرۋ كوزى جايىندا بىلمەك بولىپ, وبلىستاردان اقپاراتتار سۇراتىپتى دەپۋتات. پاۆلودار وبلىسىنداعى «دوستىق ۇيىنەن», اقمولا وبلىسىندا ورتا مەكتەپ بازاسىندا قۇرىلعان «شاڭىراق» ورتالىعىنان عانا جۇمىس جۇرگىزىپ جاتقانى جايىندا جاۋاپ كەلگەن.
پەداگوگيكا عىلىمدارىنىڭ دوكتورى, كلارا قوجاحمەتوۆا «ۇستازدىڭ ەتنوپەداگوگتىق بىلىكتىلىگى وقۋشىلاردىڭ ەتنوستىق تانىمى مەن ازاماتتىق كوزقاراسىنىڭ دامۋىنىڭ نەگىزگى فاكتورى» دەگەن تاقىرىپتا ءسوز قوزعادى. ول دوڭگەلەك ۇستەلگە قاتىسۋشىلارمەن بۇگىنگى ستۋدەنت – ەرتەڭگى ۇستازداردىڭ ەتنوپەداگوگيكالىق دايارلىعىنىڭ جاعدايى, دايارلىق بارىسىندا كەزدەسىپ وتىرعان ماسەلەلەر جانە ولاردى شەشۋ جولدارى جايىندا وي ءبولىستى. ۇستازدىڭ ايتۋىنشا, ەتنوپەداگوگيكا مەن ەتنوپسيحولوگيا توڭىرەگىندە شەشىلمەگەن جايلاردى ۇلكەن ءۇش باعىتتا قاراستىرعان ءجون. ولار: «ەتنوپەداگوگيكا» جانە «ەتنوپسيحولوگيا» عىلىمدارىنىڭ دامۋ ماسەلەلەرى; ەتنوپەداگوگيكا جانە ەتنوپسيحولوگيانى وقۋ ءپانى رەتىندە ەتنوپەداگوگيكالىق جانە ەتنوپسيحولوگيالىق دايارلىقتىڭ وزەگى دەپ قاراستىرۋ; ۇزدىكسىز وقۋ-تاربيە ۇدەرىسىنىڭ ەتنوپەداگوگيكالىق جانە ەتنوپسيحولوگيالىق نەگىزدەرى, ياعني ەتنوپەداگوگيكالاندىرۋ مەن ەتنوپسيحولوگيالاندىرۋ ماسەلەلەرى.
سونىمەن قاتار, باسقوسۋدا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ فيلوسوفيا جانە الەۋمەتتىك-گۋمانيتارلىق عىلىمدار كافەدراسىنىڭ مەڭگەرۋشىسى ەلەونورا تۋگانوۆا, پاۆلودار قالاسىنداعى «ۇلتتىق جاڭعىرۋ مەكتەبى» مەملەكەتتىك مەكەمەسىنىڭ ديرەكتورى باقىتجان احاجانوۆا, وڭتۇستىك قازاقستان وبلىسى, سايرام اۋدانى, يۋ.سارەمي اتىنداعى №1 وزبەك تىلىندە وقىتاتىن گيمنازيا ديرەكتورى ءباحادۇر نۇراليەۆ, تاعى باسقالار وتىرىسقا قاتىستى ءتۇرلى تاقىرىپتاردا ءسوز قوزعاپ, ويلارىن ورتاعا سالدى.
قازاقستاننىڭ تۇكپىر-تۇكپىرىنەن جينالعان دوڭگەلەك ۇستەلگە قاتىسۋشىلار ەتنومادەني ءبىلىم بەرۋ پروبلەمالارى مەن ونى شەشۋ جولدارى جايىن قىزۋ تالقىلاپ, كوكەيلەرىندەگى سۇراقتارىنا جاۋاپ الدى.
باسقوسۋ قورىتىندىسىندا ءبىلىم جانە عىلىم مينيسترلىگىنە ۇسىنىم جاسالدى.
ساۋلە دوسجانوۆا, جۋرناليست.