قىزىلجار ءوڭىرى رەسەيدىڭ ءۇش وبلىسىمەن شەكتەسەدى. ارالارىن شەكارا ءبولىپ تۇر دەمەسەڭ, «اۋىلى ارالاس, قويى قورالاس» ەكى ەلدىڭ جاراسىمدى دوستىعىنا قىلاۋ تۇسكەن ەمەس. قازاقستان كەدەن وداعىنا مۇشە بولىپ كىرگەلى سان-سالالى ىنتىماقتاستىق ءتىپتى ارتا ءتۇستى.
وبلىس اكىمى سەرىك ءبىلالوۆ باستاعان ءسولتۇستىكقازاقستاندىق دەلەگاتسيانىڭ ءتۇمەن وبلىسىنداعى بۇل جولعى ساپارى ىسكەرلىك بايلانىستارعا تولى بولدى. قازاقستاندىق ارىپتەستەرىن تۇمەن وبلىسىنىڭ گۋبەرناتورى ۆلاديمير ياكۋشەۆ جىلى شىرايمەن قارسى الىپ, ەكى ءوڭىردىڭ الەۋمەتتىك-ەكونوميكالىق دامۋ باعىتىنىڭ دۇرىستىعىن, حالقىمىزدىڭ تاريحىندا ۇقساستىقتار كوپ ەكەنىن اتاپ ءوتتى. سەرىك سۇلتانعازى ۇلى ءوز سوزىندە ءۇش مەملەكەت اراسىنداعى كەدەندىك كەلىسىم جىل وتكەن سايىن جاقسارىپ كەلە جاتقانىن, ونى ساۋدا اينالىمىنداعى ىلگەرىلەۋ ايعاقتايتىنىن جەتكىزدى. سودان كەيىن دەلەگاتسيا وبلىس ومىرىمەن تانىسۋدى «ياروۆسكوە» جشس-نەن باستادى. شارۋاشىلىق «فرانتسۋز ءليمۋزينى» اتتى اسىل تۇقىمدى ءىرى قارا مالىن وسىرۋمەن اينالىسادى. ونىڭ باسشىسى ۆيكتور سۆيازيننىڭ ايتۋىنشا, فرانتسيادان 119 باس تايىنشا جەتكىزىلگەن. ويناق سالعان بۇزاۋلار كۇنىنە ءبىر كيلوعا دەيىن سالماق قوساتىن كورىنەدى. بىلتىرعى قۇرعاقشىلىق كورشىلەرىمىزگە دە اۋىر تيگەنگە ۇقسايدى. سونىڭ سالدارىنان قوعامدىق مالدى اۋقاتتى شارۋاشىلىقتارعا تاراتىپ بەرىپتى. ەندى ساپالى جەم-ءشوپ قورىن دايىنداۋدى ويلاستىرىپ, ءبىرجىلدىق ءشوپتى مولىنان ەگۋگە بەت بۇرىپتى. كۇزگە دەيىن مال باسىن 600-گە جەتكىزۋدى جوسپارلاپ وتىر.
قازان اۋدانىنا قاراستى «ماياك اگروكەشەنى» جاق – «اگروونەركاسىپ كەشەنىن دامىتۋ» ۇلتتىق جوباسىنا بەلسەنە اتسالىسىپ ءجۇرگەن ءىرى شارۋاشىلىقتاردىڭ ءبىرى. ءسۇتتى مال وسىرۋگە ماماندانعان قوعامدا 1200 سيىر باعىلادى. شارۋاشىلىق مال باعۋدىڭ وزىق تەحنولوگياسىن ەندى عانا مەڭگەرە باستاعان سەكىلدى. وپەراتورلار سيىردىڭ قاشان ساۋىلىپ, قانشا مولشەردە ءسۇت بەرگەنىن مونيتور ارقىلى باقىلاپ وتىرادى. دەلەگاتسيا مۇشەلەرى مۇنداي وزىق ءادىستىڭ قازاقستانعا تاڭسىق ەمەستىگىن جارىسا ايتىپ جاتتى. قازاقستاننىڭ ەڭبەك ەرى گەننادي زەنچەنكو باسقاراتىن سەرىكتەستىك الدەقاشان يگەرگەن. سونىڭ ارقاسىندا گوللانديادان الدىرىلعان ماما سيىرلار جىلىنا 6-8 مىڭ ليترگە دەيىن ءسۇت بەرەدى. اناتولي رافالسكي جەتەكشىلىك ەتەتىن «تايىنشا-استىق» اگروفيرماسى دا وسىنداي ومىرشەڭ تەحنولوگياعا قول جەتكىزگەن.
دەلەگاتسيانىڭ ەندىگى ءبىر اتباسىن تىرەگەنى زاۆودوۋكوۆكا قالاسىنداعى «پۋر-اگروۋك» ااق بولدى. ەت وڭدەۋ كەشەنىندە مال سويۋدان باستاپ تۇتىنۋشىلارعا جەتكىزىلەتىن ونىمگە دەيىنگى تىزبەك كلاستەرلىك جۇيەمەن اتقارىلادى. مۇندا جىلىنا 3,5 مىڭ توننا ەت, 1,5 مىڭ توننا جارتىلاي فابريكاتتار ءازىرلەنەدى. سولتۇستىكقازاقستاندىقتاردى كارتوپ پەن كوكونىس ءوسىرۋمەن تۇبەگەيلى اينالىساتىن اگروونەركاسىپ كەشەنىنىڭ جۇمىس ءتاسىلى ءسۇيسىندىردى. ونىڭ 30 مىڭ گەكتار ەگىستىك القابى بار. تۇقىمدىق كارتوپ ساتۋمەن دە شۇعىلدانادى. سىيىمدىلىعى 50 مىڭ توننا بولاتىن كوكونىس قويماسى تۇگەلدەي اۆتوماتتاندىرىلعان.
– قىزىلجار ءوڭىرىنىڭ كارتوپقا دەگەن سۇرانىسىن ءبىر عانا كاسىپورىننىڭ وتەۋى شىنىندا دا ءۇيرەنەتىن ءۇردىس ەكەن. الداعى ۋاقىتتا ماماندارىمىزدى جىبەرىپ, تاجىريبە الماساتىن بولامىز, – دەدى ايماق باسشىسى جاقسىدا جاتتىق جوق ەكەنىن اڭعارتىپ.
تۇمەندىك دارىگەرلەر قىزىلجارلىق دەلەگاتسيانى جىلى شىرايمەن قارسى الدى. ولاي بولاتىن ءجونى بار. تۇمەن وبلىستىق كلينيكالىق اۋرۋحاناسى 2002 جىلدان بەرى تۋا ءبىتتى جۇرەك اۋرۋىنا شالدىققان سولتۇستىكقازاقستاندىق بالالارعا وتا جاساپ كەلەدى. وسى مەرزىم ىشىندە 4,5 مىڭ بالدىرعاندى قابىلداپ, 453 وتا جاسادى. 60 پايىزى پەتروپاۆلدا, قالعانى تۇمەندە ىسكە اسىرىلدى. ءبولىم مەڭگەرۋشىسى كيريلل گورباتيكوۆ ءبىر توپ كارديوحيرۋرگتىڭ 14 بالاعا وتا جاساۋ ماقساتىمەن كەزەكتى ىسساپارعا دايىندالىپ جاتقانىن جەتكىزدى.
تۇمەن وبلىسىندا تۇرىپ جاتقان قازاق دياسپوراسى وكىلدەرىمەن كەزدەسۋ دە, شىعىس-ءسىبىر مۇناي-گاز ورتالىعىنداعى شارا دا, شەكارالاس ىنتىماقتاستىقتى نىعايتۋعا ارنالعان قازاقستان – رەسەي ىسكەرلىك فورۋمى دا اسا مازمۇندى ءوتتى.
ەكى كۇندىك ساپار بارىسىندا ءسولتۇستىكقازاقستاندىق دەلەگاتسيا مەن تۇمەن وبلىسىنىڭ اتقارۋشى ورگاندارىنىڭ جەتەكشىلەرى كورشىلەس وبلىستار اراسىندا ىنتىماقتاستىق ورناتۋ تۋرالى بىرنەشە كەلىسىمگە قول قويدى. ول ساۋدا, ەكونوميكا, اۋىل شارۋاشىلىعى, مادەنيەت, ءبىلىم, دەنساۋلىق سالالارىن قامتىدى.
تۇمەندىكتەر سولتۇستىك قازاقستان وبلىسىنا جاقىن كۇندەرى كەلەدى دەپ كۇتىلۋدە.
ءومىر ەسقالي, جاسىن بىركەنوۆ, جۋرناليست.
سولتۇستىك قازاقستان وبلىسى.