ەلباسى جولداۋىندا بالالاردىڭ ويداعىداي ءبىلىم الۋى, جاسوسپىرىمدەردىڭ دۇرىس تاربيەلەنۋى جونىندە ۇنەمى ۇزبەي قامقورلىق جاساۋ كەرەكتىگى ايتىلىپ كەلەدى. دەگەنمەن, قازىرگى كۇنى كامەلەتكە تولماعاندار اراسىندا ءجيى ورىن الىپ, كوپشىلىكتى الاڭداتىپ وتىرعان جايلار دا جوق ەمەس. سونىڭ ءبىرى كەشە باس پروكۋرور اسحات داۋىلباەۆتىڭ توراعالىق ەتۋىمەن وتكەن باس پروكۋراتۋرا القاسىنىڭ كەزەكتى ءماجىلىسىندە ايتىلدى. وندا كامەلەتكە تولماعاندار اراسىندا وزىنە ءوزى قول جۇمساۋدىڭ الدىن الۋ جانە ولاردى بولدىرماۋ باعىتىندا اتقارىلعان جۇمىستاردىڭ جاي-كۇيى سارالاندى.
ادامنىڭ ءوز وزىنە قول جۇمساۋى جاقسىلىق ەمەس. ال ءجاسوسپىرىمدەردىڭ وزىنە-ءوزى قول جۇمساۋى تىپتەن توزگىسىز جاعداي. سوندىقتان بۇل ماسەلەنىڭ القا ءماجىلىسىنىڭ كۇن تارتىبىنە شىعارىلۋى ونىڭ اسا ماڭىزدىلىعىندا بولىپ وتىر. ويتكەنى, سوڭعى جىلدارى جاسوسپىرىمدەر اراسىنداعى وزىنە ءوزى قول جۇمساۋ بەلەڭ الدى. بۇعان باس پروكۋراتۋرا وسىدان بىرنەشە جىل بۇرىن نازار اۋدارىپ, تەكسەرۋ ءناتيجەسىندە الاڭداۋشىلىق تۋدىراتىن دەرەكتەردى انىقتاعان بولاتىن. دەگەنمەن, كەيىنگى جاسالعان تالداۋدىڭ ناتيجەسى ورىن العان ماسەلەنىڭ وسى ۋاقىتقا دەيىن ءوز شەشىمىن تاپپاعانىن, ءتىپتى ونىڭ ودان ءارى ۋشىعا تۇسكەنىن كورسەتىپ بەردى. بۇل نەلىكتەن؟
ونىڭ سەبەبى كامەلەتكە تولماعاندار اراسىنداعى وزىنە ءوزى قول جۇمساۋدىڭ الدىن الۋدا ۋاكىلەتتى ورگانداردىڭ اتقارعان جۇمىستارىنىڭ جەتكىلىكسىزدىگى بولىپ وتىر. وزىنە ءوزى قول جۇمساۋعا نەگىزىنەن وتباسىنداعى, مەكتەپتەگى جانە دوستارىنىڭ ورتاسىنداعى قارىم-قاتىناستار سەبەپشى بولۋدا. ال ءوز ەركىمەن ءومىرىن قيعان نەمەسە ونى جاساۋعا تالپىنعانداردىڭ اقىل-ويىن زەردەلەۋ بۇل بالالاردىڭ باسىم كوپشىلىگىنىڭ پسيحولوگيالىق تۇرعىدان دەندەرىنىڭ ساۋ ەكەندىگىن كورسەتتى. دەمەك, كىنالى ءتيىستى مەملەكەتتىك ۋاكىلەتتى ورگانداردىڭ جاۋاپتى شەنەۋنىكتەرى بولىپ وتىر. سوعان وراي اتالعان القادا ءماسەلەنىڭ كۇردەلى سيپات العاندىعى ەسكەرىلە وتىرىپ, تەكسەرۋ بارىسىندا انىقتالعان زاڭ بۇزۋشىلىقتار جانە ولاردىڭ تۋىنداۋىنا اسەر ەتكەن سەبەپتەر بويىنشا ۇكىمەتكە وسى جاعدايلارعا سايكەس ۇسىنىس ەنگىزۋ جونىندە شەشىم قابىلداندى.
ماسەلەن, ىشكى ىستەر مينيسترلىگىنە كامەلەتكە تولماعاندارمەن جۇمىس ءجونىندەگى قۇرىلىمدىق بولىمشەلەر جۇمىسىنىڭ ساپاسىن جانداندىرۋ ءۇشىن ءتيىمدى شارالاردى قابىلداۋ, كامەلەتكە تولماعاندار جاساعان قىلمىستاردى, سونداي-اق وزىنە-ءوزى قول جۇمساۋ جاعدايلارىن تەرگەۋمەن اينالىساتىن ارنايى يۋۆەنالدى ءبولىمشەلەر قۇرۋ تاپسىرىلدى. ال ءبىلىم جانە عىلىم مينيسترلىگىنە بىلىكتى مامان پسيحولوگتاردى تارتۋ, وقۋشىلاردىڭ مەكتەپتەن تىس تاربيەسىن جانداندىرۋ جانە ولاردىڭ بوس ۋاقىتىن ءتيىمدى پايدالانۋدى قامتاماسىز ەتۋ, ولارعا ءومىر شىندىعىن ناقتى تۇرعىدا باعالاۋ, تەرىس اسەر ەتەتىن قىسىمدارعا قارسى تۇرۋ قابىلەتتەرىن قالىپتاستىرۋ مىندەتى جۇكتەلدى.
سونداي-اق, دەنساۋلىق ساقتاۋ مينيسترلىگىنە جان كۇيزەلىس جاعدايىندا جۇرگەن جانە وزىنە-ءوزى قول جۇمساۋعا بەيىم ادامدارعا كومەك كورسەتەتىن مامانداندىرىلعان سۋيتسيدولوگيالىق قىزمەتتەر اشۋ ماسەلەسىن شەشۋ ۇسىنىلدى. كامەلەتكە تولماعاندارعا قارسى كۇش قولدانۋدىڭ سالدارىنان دەنە جاراقاتتارىن العاندىعى جونىندە شاعىمدار تۇسكەن رەتتە دەر كەزىندە قۇقىق قورعاۋ ورگاندارىن حاباردار ەتۋ مىندەتى جۇكتەلگەن زاڭ تالاپتارىنىڭ ساقتالۋىن قامتاماسىز ەتۋ تاپسىرىلدى. ءجاسوسپىرىمدەر اراسىنداعى وزىنە ءوزى قول جۇمساۋدى ناسيحاتتاۋ ينتەرنەت جۇيەسىندە اشىق جۇرگىزىلەتىنىن, ال وسىنداي سايتتارعا كىرۋ دەڭگەيى ايتارلىقتاي جوعارى ەكەنىن ەسكەرە وتىرىپ, القا بايلانىس جانە اقپارات مينيسترلىگىنە مۇنداي ينتەرنەت كوزدەرىنىڭ قىزمەتىنە شەكتەۋ ورناتۋ جانە بەلگىلى ءبىر جاس ساناتىنداعى بالالاردىڭ ەنۋىنە رۇقسات بەرمەۋ نەمەسە قىزمەت كورسەتۋدىڭ ەرەكشە ءتارتىبىن ورناتۋ ماسەلەسىن قاراستىرۋدى ۇسىندى.
بۇدان كەيىن باس پروكۋرور وبلىس پروكۋرورلارىنا مەكتەپ وقۋشىلارىن بوپسالاۋ دەرەكتەرى بويىنشا قوزعالعان ىستەردى زەرتتەۋ ءۇشىن ءتيىستى شارالار قابىلداۋدى, سونداي-اق كامەلەتكە تولماعانداردىڭ ءوزىن ءوزى ولتىرۋگە دەيىن جەتكىزۋى بويىنشا قوزعالعان قىلمىستىق ىستەردىڭ تەرگەلۋىنە تىكەلەي باقىلاۋ جاساۋدى جۇكتەدى. تالقىلاۋدىڭ ناتيجەسىندە القا ءماجىلىسى كامەلەتكە تولماعانداردىڭ اراسىنداعى وزىنە-ءوزى قول جۇمساۋعا بەيىم مىنەز-ق ۇلىق پروفيلاكتيكاسىنىڭ جاڭا ادىستەرىن, كەشەندى الدىن الۋ شارالارىن قابىلداۋ, ۋاكىلەتتى ورگاندار مەن جۇرتشىلىقتىڭ اراسىنداعى ءوزارا ءىس-قيمىل بەلسەندىلىگىن ارتتىرۋدى قاراستىراتىن بالالاردىڭ اراسىنداعى وزىنە ءوزى قول جۇمساۋدىڭ الدىن الۋعا ارنالعان مەملەكەتتىك باعدارلامانى دايىنداۋدىڭ جانە قابىلداۋدىڭ قاجەتتىلىگىن اتاپ كورسەتتى.
الەكساندر تاسبولاتوۆ.