جاقىندا تاراز قالاسىنداعى اقىل-ەسى كەم بالالارعا ارنالعان ينتەرنات ۇيىندە جاڭا سپورت الاڭى اشىلدى. ءبارەكەلدىسى سول, نىساندى سالعان قۇرىلىس كومپانياسىنىڭ باسشىسى بۇل باستامانى «مۇگەدەك جاستار قوعامى» بەلسەندىلەرىنىڭ وبلىس اكىمىنىڭ بلوگىنا جازعان حاتىنان الىپتى. ال ءۇشبۋ حاتتا مۇگەدەك بالالار ءۇيىندە ولاردىڭ دەنەشىنىقتىرۋ جاتتىعۋلارىمەن اينالىساتىن ارنايى الاڭىنىڭ جوقتىعى ايتىلعان ەكەن. ق.بوزىمباەۆتىڭ بلوگىنا تۇسكەن جانايقاي جۇرەكتەرىن ەلجىرەتكەن كومپانيا باسشىلىعى كوپ ۇزاماي اقىل-ەسى كەم جانە مۇمكىندىگى شەكتەۋلى بالالارعا توسىن سىي جاساۋدى ۇيعارادى.
كومپانيانىڭ تاعى ءبىر بارەكەلدىسى سول, ولار ءوز بازاسىندا تۇتاس رەزەڭكەدەن تىگىسسىز جاسالعان جابۋ ماتەريالدارىن دايىندايدى. ءارى ءتۇرلى-ءتۇستى رەڭكتەگى قازىرگى زامانعى جابدىقتار شىعاراتىن قۇرىلعىلارى دا بار ەكەن. ال ولاردىڭ قىزمەت ەتۋ ۋاقىتى 20 جىلعا دەيىن ەمىن-ەركىن جەتەدى. دەمەك, بۇل رەزەڭكە جامىلعىلار سپورتتىق جانە بالالاردىڭ ويىن الاڭى ءۇشىن تاپتىرمايتىن ماتەريال بولىپ تابىلادى. ءويتكەنى, ول بالالاردىڭ جاراقاتتانۋىنا جول بەرمەيدى, سونداي-اق سىرعاناۋعا دا وتە ىڭعايلى جانە قۇلاعان كەزدەگى اۋىر سوققىلاردى باياۋلاتا الادى.
سونىمەن... بلوگ يەسى بوزىمباەۆ سپورت الاڭى اشىلعان كۇنى جارىمجان بالالاردىڭ قۋانىشىن ءبولىسىپ قانا قويماي, ينتەرنات ءۇيىنىڭ جۇمىسىمەن دە تانىستى. بالالارمەن بىرگە تەاترلاندىرىلعان كورىنىستى دە تاماشالادى.
كوسەمالى ساتتىباي ۇلى, جامبىل وبلىسى.