قازاق ءومىرىنىڭ تەرەڭىنەن سۋارىلعان تالاي ءداستۇرى مەن ءمادەني قازىناسى حالقىمىزدىڭ سانالى عۇمىرىندا ساقتالىپ, ەرتەدەن بۇگىنگە جەتتى. قازىر سول كومەسكىلەنىپ قالعان دۇنيەمىزدى قايتا جاڭعىرتىپ, كەلەشەك ۇرپاقتىڭ الدىنا قويىپ وتىرعان جايىمىز بار. بۇل جاعىنان مەملەكەتتىڭ دە قوسىپ جاتقان ۇلەسى وراسان. سونداي مادەني سالتىمىزبەن بىرگە ساباقتاسىپ, وشپەستەي بولىپ كەلە جاتقان قازاقتىڭ ۇلتتىق ويىندارىنىڭ ورنى بولەك.
ەرتەرەكتە قازاقتىڭ ۇلتتىق ويىندارى دەگەندە الدىمەن كوز الدىڭا ۇلتتىق ات سپورتى, اتاپ ايتقاندا, قىز قۋ, كوكپار, اۋدارىسپاق, بايگە, تاعى باسقالار ەلەستەيتىن. قازىر ولاي ەمەس. حالقىمىز عۇمىر بويى كوشپەندىلىك كۇن كەشىپ, اتتىڭ جالىندا, تۇيەنىڭ قومىندا جۇرگەنىمەن, وزىنە ءتان باسقا دا ۇلتتىق ويىندارىنىڭ بار ەكەندىگىن الەمگە مويىنداتا باستادى. سونداي ويىندارىمىزدىڭ ءبىرى – توعىزقۇمالاق.
توعىزقۇمالاق – الەمدىك ءمادەنيەتتىڭ كەز كەلگەن ۇلگىلەرىمەن بوي تەڭەستىرە الاتىن 4 مىڭ جىلدىق تاريحى بار زياتكەرلىك ويىن, وزىق رۋحاني مۇرا. بۇگىندە ۇلتىمىزدىڭ ۇرانىنا اينالىپ وتىرعان ساقتار, عۇندار, كوكتۇركىلەردەن قازىرگى كۇنگە دەيىن جالعاسىپ كەلە جاتقان ءۇندەستىكتىڭ ءبىر ايعاعى.
توعىزقۇمالاق سوڭعى جىلدارى جوعارى قارقىنمەن دامىپ كەلە جاتقاندىعى بەلگىلى. وعان تۋريزم جانە سپورت مينيسترلىگى ەلەۋلى ۇلەس قوسىپ وتىر. مەرزىمدى باسىلىمدار مەن اقپارات كوزدەرى ارقىلى بىلگەنىمىزدەي, اتالعان ويىن ءتۇرىن دامىتۋ بارىسىندا ءالى تالاي دۇنيەلەر قولعا الىناتىن سىڭايلى. ءبىر قۋاناتىنى, بۇگىنگى تاڭدا توعىزقۇمالاق ويىنىمەن شۇعىلدانۋشى ەلدەردىڭ قاتارى دا ءوسىپ وتىر. اتاپ ايتقاندا, قازاقستان, انگليا, فرانتسيا, گەرمانيا, رەسەي, قىتاي, موڭعوليا ەلدەرىندە جەرگىلىكتى حالىقتاردىڭ اراسىندا ويناۋشىلاردىڭ سانى ارتۋدا. ال ەلىمىزدە بۇل ويىن تۇرىمەن اينالىسۋشىلاردىڭ سانى 100 مىڭعا جەتكەن ەكەن. دەگەنمەن, 100 مىڭدى كۇن ساناپ كوبەيتە تۇسسەك نۇر ۇستىنە نۇر بولار ەدى. ول ءۇشىن تاعى تالاي ەڭبەك پەن قاجىر-قايرات قاجەت.
ايتايىن دەگەنىم, اتادان كەلە جاتقان اسىل مۇرامىزدى ۇرپاقتار ساناسىندا ءالى دە بولسا جاڭعىرتا تۇسسەك. ول ءۇشىن ءبىلىم جانە عىلىم مينيسترلىگى ازداپ بولسا دا قولداۋ كورسەتسە ءوزى دە قۇلشىنىپ تۇرعان وتاندىق جاستارىمىز ارى قاراي ەكپىنمەن الىپ كەتەرى ءسوزسىز.
ءوزىم اتالعان ويىننىڭ جانكۇيەرى ءارى مۇعالىم بولعاندىقتان, توعىزقۇمالاق ويىنى تۋرالى كەز كەلگەن مالىمەتتى قالت جىبەرمەۋگە تىرىسامىن. وسىلايشا ۇلتتىق ويىنىمىزدى مەكتەپ باعدارلاماسىنا ەنگىزىپ, جىل سايىن وقۋشىلار اراسىندا الامان سايىستار ۇيىمداستىرساق دەگەن ۇسىنىسىم بار. ءيا, قازىر توعىزقۇمالاقپەن حالىقارالىق توعىزقۇمالاق قاۋىمداستىعى بەل شەشە اينالىسىپ جاتقاندىعى راس. ءتىپتى ونىڭ ۇيىتقى بولۋىمەن بىرنەشە حالىقارالىق جارىستار, الەم چەمپيوناتتارى ءوتكىزىلدى. اتالعان جارىستاردا وتانىمىزدىڭ
توعىزقۇمالاقشىلارى وزا شاۋىپ, ءوزدەرىن ىلگەرىدەن كورسەتە ءبىلدى. ال شەتەلدەردە وتكىزىلگەن سىنداردا دا ەلىمىز شەبەرلەرىنىڭ ەسىمى ءبىرىنشى بولىپ اتالدى. اتاپ ايتقاندا, ەرلەر اراسىندا ايدوس سەيىتجاننىڭ شاشاسىنا شاڭ جۇقپاي تۇر بۇگىندە. ارينە, قۋانامىز.
ال الداعى شىلدە ايىنىڭ 18-ءى مەن 22-ءسى ارالىعىنداعى چەحياداعى توعىزقۇمالاق قاۋىمداستىعىنىڭ باستاماسىمەن تۇڭعىش رەت ەۋروپا چەمپيوناتى پاردۋبيتسە قالاسىندا وتكىزىلەدى. وعان دا ەلىمىزدىڭ ۇزدىكتەرى سايلانىپ قويعاندىعى ءمالىم. سونداي-اق, 2012 جىلى حالىقارالىق توعىزقۇمالاق قاۋىمداستىعىنىڭ قولداۋىمەن ەلىمىزدە ازيا جانە الەم چەمپيوناتى وتكىزىلەدى. توعىزقۇمالاقتىڭ تولايىم تابىستارى بۇل جولى دا ەل مارتەبەسىن بيىكتەن كورسەتەدى دەگەن سەنىمدەمىز.
جاڭىل وتەباەۆا, №37 ورتا مەكتەپتىڭ مۇعالىمى. استانا.