قازاقستان رەسپۋبليكاسىنداعى «ميتسۆا» ەۆرەي ۇلتتىق ۇيىمى بايلانىس جانە اقپارات مينيسترلىگىنىڭ اقپارات جانە مۇراعات كوميتەتىمەن بىرلەسىپ مەملەكەتتىك ورتالىق مۇراجايدىڭ قولداۋىمەن V حالىقارالىق عىلىمي-تاريحي كونفەرەنتسيا وتكىزگەن-ءدى. سول كونفەرەنتسيا قۇجاتتارى نەگىزىندە جارىق كورگەن «تاريح. ەستەلىك. حالىق» اتتى كىتاپتىڭ تۇساۋى الماتى قالاسىندا كەسىلدى.
كىتاپتا ۇلى وتان سوعىسى جىلدارى كۇشتەپ جەر اۋدارىلعان ەۆرەي ۇلتى وكىلدەرىنىڭ قيلى تاعدىرى عانا ەمەس, سول كەزەڭدە باسقا وڭىرلەردە ماجبۇرلەپ تۇرعىزىلعان ءوندىرىس نىساندارى, ورتالىقتىڭ ساياساتىن ناسيحاتتاۋ ءۇشىن سالىنعان مادەني وشاقتار, قۋعىن-سۇرگىنگە ۇشىراعان جەرگىلىكتى حالىقتىڭ ءومىرى مەن تارتقان زاردابى جايلى تىڭ دەرەكتەر مولىنان قامتىلعان. سونداي-اق پرەزيدەنت مۇراعاتىنان الىنعان دەرەكتەرگە سۇيەنە وتىرىپ, 1941 جىلى قازاق اسپانىندا بولعان اسا ءىرى اۋە اپاتىنىڭ سەبەبى مەن سالدارىن, بۇگىنگى ازاماتتىق اۆياتسيانىڭ احۋالىن كوتەرگەن كولەمدى ەڭبەك تە وسى جيناقتا. كىتاپ «1940 جىلدارعى كۇشتەپ جەر اۋدارۋ ءىسىنىڭ تاريحى» جانە «قازاقستان ەۆرەيلەرىنىڭ تاريحى» اتتى ەكى بولىمنەن تۇرادى.
تۇساۋكەسەردە «ميتسۆا» اسسوتسياتسياسىنىڭ توراعاسى ا.بارون, دەموگراف-عالىم م.ءتاتىموۆ, مۇراجاي ءىسىنىڭ مامانى ب.ناسەنوۆ سەكىلدى بىرقاتار ازاماتتار حالىقارالىق كونفەرەنتسيانىڭ كوتەرگەن تاقىرىپتارى مەن كەلتىرگەن دەرەكتەرىنىڭ قۇندىلىعىنا باعا بەرىسىپ, ساياسي قۋعىن-ءسۇرگىنگە ۇشىراعان تاعدىرلاس ۇلتتاردىڭ بۇگىنگى قازاقستان مەملەكەتىندەگى جايما-شۋاق تىرشىلىگىن تىلگە تيەك ەتىستى.
قانات ەسكەندىر.
الماتى.