جىلۋ: دەرەك پەن دايەك

«قىس شاناڭدى جاز سايلا» دەگەن ءتامسىلدى باسشىلىققا العان قىزىلوردالىقتار الداعى جىلۋ ماۋسىمىنىڭ قارەكەتىنە وسى باستان كىرىسىپ كەتتى. اتاپ ايتقاندا, الداعى جىلۋ ماۋسىمىندا قا­جەت­تى وتىن قورىن ساتىپ الۋ ءۇشىن 5,5 ميلليارد تەڭگە قاراستى­رى­لىپ جاتىر. بۇل سوماعا 46,2 شا­قىرىم سۋ-كارىز جۇيەلەرى, 20,2 شا­قىرىم جىلۋ جەلىلەرى, 12 ۇل­كەن قازان­دىققا جوندەۋ جۇمىس­تا­رى جۇرگى­زىلەدى. سونىمەن قاتار 78,5 مىڭ توننا قاتتى وتىن, 57,6 مىڭ توننا سۇيىق وتىن ساتىپ الىنادى. بۇدان بولەك, وبلىس بويىنشا 71 كىشى قازاندىق جوندەۋ جۇ­مىس­تارىن قاجەت ەتەدى ەكەن. سونداي-اق 301 ءبىلىم مەكەمەسىنە, 338 دەن­ساۋلىق ساقتاۋ ورتالىعىنا, 277 ما­دەنيەت نىسانىنا جانە 543 تۇر­عىن ۇيگە جوندەۋ جۇرگىزۋ جوس­پارلانىپ وتىر. تاعى ءبىر ايتا كەتەرلىگى, بۇ­گىن­دە قىزىلوردا قالاسى بويىنشا كوممۋنالدىق تولەم قارىزدارى 1,4 ميلليارد تەڭگەگە جەتكەن. ونىڭ 519 ميلليون تەڭگەسى تۇر­عىن­داردىڭ موينىندا بولسا, قال­عانى جىلۋ ورتالىقتارىنا تيەسىلى ەكەن.

ەرجان بايتىلەس, قىزىلوردا.

8,1 ملرد. تەڭگە وڭىردە ۇدەمەلى يندۋستريالىق-يننوۆاتسيالىق دامۋ باعدارلاماسى بويىنشا  جالپى قۇنى وسىنشا قارجى بولاتىن 8 جوبانى  جۇزەگە اسىرۋ كوزدەلگەن. مەملەكەت باسشىسىنىڭ جول­داۋ­­لارىندا يندۋستريالىق-ين­نو­ۆا­تسيالىق دامۋ باعدارلاماسى ار­قىلى ءوندىرىستى وركەندەتۋگە اي­رىقشا كوڭىل ءبولىنىپ كەلەدى. وت­كەن جىلى وڭىردە وسى باعىتتا ىسكە قوسىلعان ىرگەلى كاسىپ­ورىن­داردا جاڭا جۇمىس ورىندارى اشى­لىپ, حالىقتىڭ كۇنكورىسى اي­تار­لىقتاي جاقسارا ءتۇستى. سولار­دىڭ قاتارىندا قۇرىلىسى قار­قىندى جالعاسقان رەسپۋبليكالىق كارتاداعى «مويناق» سۋ ەلەكتر ستانساسى مەن جەتىگەن – قورعاس تە­مىر جول جەلىسىنىڭ اعىمداعى جىلى ەل يگىلىگىنە بەرىلەتىنى قۋانىشتى. تاۋەلسىزدىك مەرەيىنە ارنال­عان تولىمدى تارتۋلاردىڭ قاتا­رىن­دا يندۋستريالىق-يننوۆا­تسيا­لىق باعدارلاما اياسىندا جالپى قۇنى 8,1 ملرد. تەڭگە بولاتىن 8 ين­ۆەستيتسيالىق جوبانى ورىنداۋ كۇن تارتىبىنە قويىلعان. باع­دار­لامانىڭ تياناعى كەلتىرىلگەندە, جاڭا جۇمىس ورىندارى اشىلادى جانە ونىڭ ءوڭىر ەكونوميكاسىنا تىڭ سەرپىن قوساتىن بولادى.

كۇمىسجان بايجان, الماتى وبلىسى.

200 000 000 رۋدنىي جولدارىنا وسىنشا تەڭگە بولىنەدى. بۇرىن  رۋدنىي قالاسىنداعى ىشكى جولداردى جاماپ-جاسقاۋعا جىل سايىن 15-20 ميلليون تەڭگە بولىنەتىن. ال بيىل وسى ماقسات جولىندا  200 ميلليون تەڭگە يگەرىلمەك. قالانىڭ ءبىراز جىل­دار­دان بەرى جوندەۋ كورمەي, ويىلىپ كەتكەن جولدارىنىڭ بارلىعى  قال­پىنا كەلتىرىلەدى.  بۇل قالا كوركىن ارتتىرۋمەن قاتار, كولىك پەن جۇرگىنشىلەرگە قولايلىلىق تا تۋعىزادى. وتكەن جىلى جازدا قالانىڭ  قاق ورتاسىنداعى  ۇزىن كوشە جوندەلگەن بولاتىن. سونىمەن قاتار, قالاداعى  جى­لۋ  قۇبىرلارى دا جاماۋعا ءزارۋ بولىپ تۇر.  قالانىڭ ورتا­لىق جىلۋ قۇبىرىن جوندەۋگە وب­لىس بيۋدجەتىنەن قوماقتى قارجى ءبولىندى. سوكولوۆ-سارىباي كەن ءون­دىرۋ بىرلەستىگى ىشكى كوشە­ارا­لىق جىلۋ قۇبىرلارىن   قالپىنا كەلتىرۋدى ءوز موينىنا الىپ وتىر.  ءوندىرىس الىبى وسى ماقساتقا 200 ميلليون تەڭگە قاراستىرىپ تا قويدى. جاز بويى كەنشىلەر قالاسىنىڭ  كوشەلەرى جوندەۋ-قۇرىلىس الاڭىنا اينالادى.

ءنازيرا جارىمبەتوۆا, رۋدنىي.