بىرنەشە جىلدان بەرى ەكى وتباسىن شەكسىز قايعىعا دۋشار ەتكەن قىلمىستىق ءىستىڭ بەتى اشىلعانداي بولعانىن كۇنى كەشە بۇقارالىق اقپارات قۇرالدارىنان ەستىپ-بىلگەن ەل-جۇرتىمىز ءدۇر سىلكىندى. «نۇربانكتىڭ» توپ مەنەدجەرى قىزمەتىن اتقارعان جولداس تەمىراليەۆ پەن ايبار حاسەنوۆتىڭ ءىزىم-عايىم جوعالعانى, ولاردى ىزدەستىرۋگە قۇقىق قورعاۋ سالاسىنىڭ قىزمەتكەرلەرى قانشاما تەر توككەنى ءمالىم. بۇل قىلمىس اليەۆ, كوشلياك, مۇساەۆتىڭ باسشىلىعىمەن جانە باسقالاردىڭ قاتىسۋىمەن جاسالعانى بەلگىلى بولدى.
ەلىمىزدىڭ اتا زاڭىندا ءاربىر ادام ءومىر سۇرۋگە قۇقىلى دەلىنگەن. ەندەشە, وسى وقيعاعا باعا بەرۋ بارىسىندا زاڭىمىزدى قۇرمەتتەمەيتىن, جەكە باسىنىڭ پايداسى ءۇشىن قانداي ىستەن بولسىن تارتىنبايتىن قاتىگەزدەردىڭ بار ەكەنىن بىلگەن سايىن ولارعا دەگەن ىزا-كەگىمىز ەسەلەنە تۇسەدى.
باس پروكۋراتۋرا رەسمي وكىلىنىڭ ءمالىمدەۋىنە قاراعاندا, الماتى قالاسىنىڭ تاۋ بوكتەرىندەگى «قازتەلەراديونىڭ» قويمالار بازاسىنىڭ اۋماعىندا اسقان ايۋاندىقپەن ولتىرىلگەن ەكى ادامنىڭ ءمايىتى تابىلىپتى. جاقىن تۋىستارىنىڭ ايعاقتى ءدالەلدەمەلەرىنە قاراعاندا, بۇل مايىتتەر ءىز-ءتۇزسىز جوعالىپ كەتكەن جولداس تەمىراليەۆ پەن ايبار حاسەنوۆتىڭ ءمايىتى دەگەن جوباعا سايكەس كەلەدى ەكەن.
مەن ءوزىم بار سانالى عۇمىرىمدى قۇقىق قورعاۋ سالاسىندا, ونىڭ ىشىندە پروكۋراتۋرادا وتكەرگەن اداممىن. سوندىقتان دا مۇنداي مالىمدەمە جايدان-جاي جاسالمايتىنى بەلگىلى. دەمەك, ارىپتەستەرىمنىڭ ىزدەنىستەرىنە جوعارى باعا بەرەم. ال ءوزىنىڭ تۋعان ەلىندە باس پايداسىنىڭ قامى ءۇشىن جان ءتۇرشىگەرلىك قىلمىس جاساپ, سودان كەيىن شەت مەملەكەتتە بوي تاسالاپ جۇرگەن قولى قاندى ادامدارعا ەندى نە دەۋگە بولادى. قازاقستان سوتى اليەۆ, كوشلياك, مۇساەۆ, ساپوجنيكوۆ, يماشەۆقا كەزىندە سىرتتاي ءتيىستى جازا بەلگىلەگەن بولاتىن. ەندى قىلمىس تولىق دالەلدەنەتىنىنە سەنىمدىمىن. سوندىقتان, اۆستريانىڭ اۋماعىندا سوت تورەلىگىنەن جالتارىپ, ىستەگەن قىلمىستارى ءۇشىن جازالانباي جۇرگەن ولاردى ەلگە قايتارىپ, ءادىل ۇكىم شىعارىلعانىن قالايمىز. سوندا بۇل وزگەلەرگە دە ساباق بولار ەدى.
تالاپ قالياكپەروۆ, اعا ادىلەت كەڭەسشىسى, الماتى وبلىسىنىڭ قۇرمەتتى ازاماتى.
الماتى وبلىسى.