“قازترانسگاز” اق شاعىن فۋتبولدان وقۋشىلار اراسىندا تۋرنير وتكىزدى
قولى بوس, ىستەرگە شارۋاسى جوق بالالار جامان ادەتتەرگە ۇيىرسەك كەلەدى. ءىس ناسىرعا شاپقاندا عانا “قاپ-اي” دەپ سان سوعاتىن ساتتەر از ەمەس. بالاعا بوس ۋاقىتىن پايدالى, شىمىر بولىپ ءوسۋ ءۇشىن سپورت الاڭدارى كەرەك. مۇندايدا ءبارىن مەملەكەتتىڭ موينىنا سالىپ, ءبىر شەتتە تىمپيىپ وتىرۋعا بولمايدى. ەلىم, جەرىم دەيتىن ازاماتتار ارتىلعان قارجىسىنىڭ ءبىر بولىگىن سپورت الاڭدارىن سالۋعا پايدالانسا نۇر ۇستىنە نۇر بولار ەدى.
“قازتراسگاز” اق وسى يگىلىكتى شارانى باستاپ كەتتى. بىلتىر شىمكەنتتە مەكتەپتەر جانىنان 3 جازعى سپورت الاڭىن سالىپ بەرگەن مۇناي-گاز باسشىلارى بيىل دا قالاداعى №50 مەكتەپتىڭ قاسىنان بىرەۋىن قوستى.
شەتەلدە مۇنداي جازعى الاڭشالاردى بيىك ۇيلەردىڭ جانىنان كوپ كورەسىز. شاعىن فۋتبولعا ارنالعان جاساندى ءشوپ جابىندىسى, كورەرەمەندەر وتىراتىن ورىندىقتارى بار الاڭدا فۋتبولدان ءبولەك باسكەتبول, ۆولەيبول دا ويناي بەرۋگە بولادى. جان-جاعىندا پروجەكتور شامدارى بار, تۇندە دە قىزمەتىڭىزگە ءازىر. “قازترانسگاز” اق جازعى الاڭ سالىپ بەردىم, ەندى نە ىستەيمىن دەسەڭ ءوزدەرىڭ ءبىلەسىڭدەر دەمەپتى, بيىل قازاقستاننىڭ تاۋەلسىزدىگىنە 20 جىل تولۋى مەرەكەسىنە وراي ەلىمىزدە 2001 جىلى تۋىلعان بالالار اراسىندا شاعىن فۋتبولدان رەسپۋبليكالىق جارىس وتكىزۋگە مۇرىندىق بولعان.
“قازترانسگاز” اق قوعامدىق بايلانىس دەپارتامەنتىنىڭ باستىعى باۋىرجان بورىبەك سۇحباتىندا وسىنداي الاڭداردى كورشى وبلىستاردا دا سالۋدى جالعاستىرىپ جاتقاندىقتارىن ايتقان. جالپى, ەلىمىزدىڭ مۇناي-گاز سالاسىنا يەلىك ەتىپ وتىرعان “قازمۇنايگاز” كومپانياسى قازاقستان بويىنشا 60 جازعى سپورت الاڭىن سالۋدى جوسپارلاسا, سونىڭ 12-ءىن ىسكە قوسۋ “قاز-ترانسگاز” اق-عا تيەسىلى.
بۇگىندە 2001 جىلى دۇنيەگە كەلگەن بالالاردىڭ اراسىنداعى شاعىن فۋتبولدان وتكىزىلىپ جاتقان ءتۋرنيردى ءار ايماق بويىنشا “قازمۇنايگازدىڭ” ەنشىلەس كاسىپورىندارى وتكىزىپ جاتىر.
ءار وبلىستا ۇزدىك شىققان ەكى كوماندا, بۇنىڭىز ون-وننان 20 بالا جانە 5 جاتتىقتىرۋشى استانادا وتەتىن ۇلكەن كۋبوكتى ساراپقا سالۋعا قاتىسادى. ءار ايماق بويىنشا. ءوڭتۇستىك ءوڭىرگە جاۋاپتى بولعان “قازترانسگاز” اق جيىرما وقۋشى مەن بەس جاتتىقتىرۋشىنىڭ استاناعا بارۋ شىعىندارىن تۇگەلدەي ءوز مويىندارىنا الادى.
شىمكەنتتە وسى ىرىكتەۋ جارىسىنا 18 كوماندا قاتىستى. ادىلدىك ءۇشىن ارنايى مامانداندىرىلعان فۋتبول مەكتەپتەرىنىڭ وقۋشىلارى قاتىستىرىلعان جوق.
سوندىقتان دا, ويىن شيرىعىپ باستالدى. جارىستىڭ ەكىنشى كۇنىندە 18 كوماندادان جۇلدەلى ورىنداردى ءبولىسۋ ءۇشىن 3 كوماندا قالعان. ويىن №50 مەكتەپتىڭ جاڭادان سالىنعان الاڭشاسىندا ءوتتى.
ء“وز الاڭىڭدا قابىرعا دا كومەكتەسەدى” دەگەن قاناتتى ءسوز شەبەرلىككە جۇرمەيدى ەكەن. مەكتەپ وقۋشىلارى مەن ۇستازدارى جاق بولىپ تۇرسا دا وسى مەكتەپتىڭ فۋتبولشىلارى №64 مەكتەپ وقۋشىلارىنىڭ اسۋىنان وتە المادى. 3-0 ەسەبىمەن جەڭىلدى.
ءسال تىنىعىپ العاننان كەيىن ماعجان جۇماباەۆ اتىنداعى №39 مەكتەپتىڭ وقۋشىلارىنا قارسى شىققان. بارماقتاي بالالار ەرەسەكتەر قىزىعاتىنداي ويىن ورنەگىن كورسەتتى.
العاشقى تايمنىڭ وزىندە №50 مەكتەپ قاقپاسىنا جاۋاپسىز 4 دوپ سالىندى. كوماندا كاپيتانى نيكيتا جويقىن شابۋىلشى ەكەن. ايىپ دوبىنىڭ ءبارىن سول تەبەدى. ستاندارتتان ۇرىپ گول كىرگىزىپ جىبەردى. كوماندادا جاقسى ويىن ءورنەگى بار. ءبىر-ءبىرىن ەمەۋرىننەن تۇسىنەدى, دوپ الىپ بارا جاتقان ويىنشىنىڭ پاس بەرەتىن جەرىنەن تابىلا كەتەدى.
ەكى جاقتىڭ جاتتىقتىرۋشىلارى ەكى قاپتالدا جانىعىپ ءجۇر. قۇددى, 10 جاسار بالعىنداردىڭ اراسىندا الەم چەمپيوناتى ءوتىپ جاتقانداي. ەسەپ 4-1.
ءۇشىنشى ورىن بەلگىلى بولدى. كوماندالار ءبىراز تىنىستاپ العاننان كەيىن الاڭعا قايتا شىقتى. جۇلدە - ءۇلكەن كۋبوك جانە ءبىرىنشى ورىن دەمەسەڭىز, استاناعا وسى ەكى كوماندا دا بارادى.
№39 مەكتەپ وقۋشىلارى باياعى ويىن ورنەگىنە سالار دەگەنبىز. بۇل ءبىزدىڭ ىشكى ويىمىز عانا ەكەن.
كەزىندە جولبارىستاي جىلدام, ارىستانداي قايراتتى ديەگو مارادونانى ورتاڭقول كومانداسىنا شاقىرعاندا “جالعىز جۇلدىز نە بىتىرەدى, كلۋب سول ورنىندا قالادى” دەگەندەر بولعان. جالعىز اعاشتىڭ جان قىسىلعاندا ورمان دا بولا الاتىنىن سول مارادونا كورسەتىپ, كومانداسىن ەل چەمپيوناتىندا باس بايگەگە ىلىكتىرىپ ەدى.
№64 مەكتەپتىڭ ورتالىق شەبىندەگى ويىنشى, بويى دا قارسىلاستارىنا قاراعاندا ۇزىنداۋ نۇربەك ويىن ورنەگىن مۇلدە وزگەرتىپ جىبەردى. ويلى ويىنعا قارسى تەگەۋرىن قوستى. دەربيدە قارسىلاسىنىڭ ادىمىن اشىرمايدى. ءبىرىنشى تايم 0-0 بولىپ بەيبىت تارقاسقانىمەن №64 مەكتەپتىڭ وقۋشىلارى تەگەۋرىندى شابۋىلدى كۇشەيتىپ جىبەردى.
قارسىلاستارى ساسقالاقتاپ, بىلگەنىنەن جاڭىلدى. قاتەلەسۋلەرى كوبەيدى. وسى ءساتتى قۇرداستارى جاقسى پايدالاندى. اپاي-توپاي ەكى گول سوعىپ الدى. وسى ەسەپتى ويىن سوڭىنا دەيىن ۇستاعان. سونىمەن ءبىرىنشى ورىندى №64, ەكىنشى ورىندى №39, ءۇشىنشى ورىندى №50 مەكتەپتىڭ وقۋشىلارى ءبولىستى. جارىس سوڭىنان ۇزدىك قاقپاشى, ۇزدىك شابۋىلشى, ۇزدىك قورعاۋشى جانە ۇزدىك ويىنشى ماراپاتتالدى.
“قازترانسگاز” اق-نىڭ دەپارتامەنت باسشىسى باۋىرجان بورىبەك وسى تۋرنيردى ۇيىمداستىرۋعا شىمكەنت اكىمدىگى, وبلىستىق جانە قالالىق وقۋ باسقارمالارىنىڭ اتسالىسقانىن ايتقان.
ءبىز وبلىستىق ءبىلىم باسقارماسىنىڭ باستىعى مىرزابەك تۋعانباەۆتى اڭگىمەگە تارتتىق.
– ەلىمىز تاۋەلسىزدىگىنىڭ 20 جىلدىعىن لايىقتى اتاپ ءوتۋ ارقايسىمىزدىڭ پارىزىمىز, – دەيدى وبلىستىڭ باس مۇعالىمى. – اتتىڭ جالى, ءتۇيەنىڭ قومىندا وسكەن, ەر ازاماتتارى جالاڭ قىلىشىمەن ەلدىڭ ازاتتىعىن قورعاعان, بوداندىقتىڭ قامىتىنان قۇتىلۋدى اڭساعان جىلداردان وسىنداي تاماشا زامانعا وتتىك. بۇل – ەلباسىمىزدىڭ سىندارلى ساياساتىنىڭ, مەملەكەتىمىزدىڭ ءوركەندەگەنىنىڭ جەمىسى.
وقۋ-تاربيە جۇمىستارىندا وسىنى اڭعارتۋعا كۇش سالىپ جاتىرمىز. وتانىن سۇيگەن ءاربىر ازامات مەنىڭ ەلىمە سىڭىرەتىن ۇلەسىم قانداي دەگەن ۋاقىتتا تۇرمىز. وسى رەتتە “قازترانسگاز” جىگىتتەرىنىڭ ەلگە ءسىڭىرىپ جاتقان جۇمىستارى سۇيسىنتەدى.
بۇگىنگى 10 جاسار بالالار اراسىنداعى تۋرنير سونىڭ ءبىر كورىنىسى عانا. مەكتەپ وقۋشىلارى وزىنە كەرەگىنە قول جەتكىزۋى كەرەك. سپورت ويىندارى ولاردىڭ كۇش-قۋاتىن ەسەلەپ قانا قويماي, ساباعىن جاقسى وقۋىنا, ءتارتىپتى, ءتاربيەلى بولىپ وسۋلەرىنە ءوز ۇلەسىن قوسادى. بۇگىندە تۋرنير قالا مەكتەپتەرىندە عانا ءوتىپ جاتىر. نەگىزىندە, ءبىز اۋىل, اۋدان بالالارى اراسىندا دا وسىنداي جارىس وتكىزۋدى قولعا الىپ جاتىرمىز.
جارىس اياقتالدى. ەندى 24 مامىر كۇنى جەڭىمپازدار مەن جۇلدەگەرلەر جاتتىقتىرۋشىلارىمەن بىرگە «قازمۇنايگاز» ۇك» اق ۇيىمداستىراتىن ۇلكەن كۋبوكتى ساراپقا سالۋ ءۇشىن استاناعا جولعا شىعادى.
– “قازترانسگازداعى” اعالارعا راحمەت, – دەيدى 10 جاسار فۋتبولشى نۇرداۋلەت قۋانىشباەۆ. – جاقسى جارىس وتكىزىپ بەردى. بارىمىزگە سپورتتىق كيىمدەر كيگىزدى, سىيلىقتار بەردى. ال, ويىن كەرەمەت ءوتتى. ءبىز جەڭدىك. استانادا دا جەڭىسكە جەتسەك تاماشا بولار ەدى.
جەڭىلۋدى ويلاپ بارا جاتقان جوقپىز. كورەمىز عوي.
فۋتبول – ەڭ كورەرمەنى كوپ ويىن. بۇگىندە الەمنىڭ كوز قۇرتى بولعان مەسسي, رونالدۋ, كاكا, وزيل سياقتى ويىنشىلار وسىنداي بالعىن فۋتبولشىلار اراسىنان شىقتى عوي. بۇل بالالاردا ەندى ءوز فۋتبول الاڭدارى بار. ونداي بولماق قايدا دەۋگە بولمايدى.
باقتيار تايجان, شىمكەنت.