ادەتتە, مەكتەپ وقۋشىلارىنىڭ رەسپۋبليكالىق وليمپياداسى بەس ساتىدان تۇرادى. ءتورت مىڭنان استام جەتكىنشەكتىڭ اراسىنان ىرىكتەلگەن 600 وقۋشى وليمپيادانىڭ قوستانايدا ءوتكەن قورىتىندى ساتىسىنا شاقىرىلدى. ونىڭ اراسىندا ەلۋگە تارتا وقۋشى قوستاناي ءوڭىرىنەن قاتىستى. وليمپيادانىڭ اشىلۋ سالتاناتىندا دارىندى وقۋشىلاردى وبلىس اكىمى سەرگەي كۋلاگين قۇتتىقتادى. وسى ارادا ءبىر ايتا كەتەتىن جايت, بالالاردى مەكتەپكە دەيىنگى مەكەمەلەرگە قامتۋ جونىنەن ەلىمىزدە قوستاناي وبلىسىنىڭ الدىنا ءالى ەشكىم تۇسكەن جوق. سونىمەن قاتار, مەكتەپتەر مەن بالاباقشالاردىڭ 80 پايىزىنا جوندەۋ جۇمىسى جۇرگىزىلدى. وسى وقۋ جىلىنىڭ باسىنان باستاپ وبلىس وڭىرىندە «دارىن» ينتەللەكتۋالدىق مارافونى باستاۋ العان بولاتىن, ونىڭ جاقسى ناتيجەسى دە بار.
مەكتەپ وقۋشىلارىنىڭ وليمپياداسىنان تاماشا عالىمدار, دارىندى ادامدار ءوسىپ شىقتى. ماسكەۋ مەملەكەتتىك ۋنيۆەرسيتەتىن ءبىتىرىپ, بۇگىندە بوستون ۋنيۆەرسيتەتىندە ءبىلىمىن جالعاستىرىپ جاتقان رۋدنىي مەكتەبىنىڭ تۇلەگى تيمۋر جيەنتاەۆ 2004 جىلى مەكتەپ وقۋشىلارى رەسپۋبليكالىق وليمپياداسىنىڭ جەڭىمپازى اتانعان ەدى. تيمۋر وليمپيادا باستالار الدىندا وعان قاتىسۋشىلارمەن سكايپ ارقىلى تىلدەستى. ارينە, مۇنداي ۇلگى تالاپتىڭ تۇلپارىن مىنگەن بالالارعا قانات بىتىرەرى داۋسىز.
وبلىس اكىمى سەرگەي كۋلاگين ايتقانداي, وليمپيادانىڭ سوڭعى ساتىسىنا جەتۋدىڭ ءوزى وعان قاتىسىپ وتىرعان ءار وقۋشىنىڭ جەڭىسى دەپ ەسەپتەۋگە بولادى. دەگەنمەن بايگەنىڭ اتى – بايگە, شاپقاندا جۇيرىكتەن جۇيرىك وزادى. رەسپۋبليكالىق مەكتەپ وقۋشىلارى وليمپياداسىنداعى كوماندالىق ەسەپتە استانا قالاسىنان كەلگەن بالالار ءبىرىنشى ورىندى جەڭىپ الدى. ال قوستانايلىق وقۋشىلار جيناعان ۇپاي سانى ولاردى ەكىنشى ورىنعا كوتەردى. ءۇشىنشى ورىندى پاۆلوداردان كەلگەن وقۋشىلار ەنشىلەدى. ونىڭ سىرتىندا ءار ءپان بويىنشا ءبىلىم تەرەڭدىگىن كورسەتكەن وقۋشىلار جەكە ماراپاتتالدى. ولاردىڭ سانى ءۇش جۇزگە جەتىپ جىعىلادى.
قوستانايلىق بالالار وليمپيادادان 20 مەدال الدى. ولار ورىس ءتىلى مەن ادەبيەتىنەن, ورىس مەكتەبىندەگى قازاق ءتىلى مەن ادەبيەتىنەن, قازاق ءتىلى مەن ادەبيەتتەن, بيولوگيادان, فيزيكادان, ينفورماتيكادان, تاريحتان ۇزدىك ءبىلىم دەڭگەيىن كورسەتتى.
ءنازيرا جارىمبەتوۆا.
قوستاناي.