كەشە سەنات توراعاسىنىڭ ورىنباسارى الەكساندر ءسۋديننىڭ توراعالىق ەتۋىمەن پارلامەنت دەپۋتاتتارىنىڭ ناتو باس حاتشىسىنىڭ كاۆكاز جانە ورتالىق ازيا جونىندەگى ارنايى وكىلى دجەيمس اپپاتۋرايمەن كەزدەسۋى بولدى, دەپ حابارلادى وسى پالاتانىڭ ءباسپاسوز قىزمەتى.
سەناتورلار ب.يماشەۆ, ا.احمەتوۆ, ر.احمەتوۆ قاتىسقان كەزدەسۋ بارىسىندا قازاقستان مەن ناتو-نىڭ, ونىڭ ىشىندە پارلامەنتتىك ۇنقاتىسۋ دەڭگەيىندەگى ىنتىماقتاستىعىن ودان ءارى دامىتۋ ماسەلەلەرى تالقىلاندى.
تاراپتار ءوزارا ءىس-قيمىلدىڭ جوعارى دەڭگەيىنە قاناعاتتانعاندىق ءبىلدىرىپ, جاھاندىق جانە ايماقتىق قاۋىپسىزدىكتى نىعايتۋدا ىنتىماقتاستىقتى جاقتايتىندارىن ايتتى.
جۇزدەسۋشىلەردىڭ پىكىرىنشە, ارىپتەستىك ءىس-قيمىلداعى جەكە جوسپاردىڭ ەكىنشى ساتىسىن ىسكە اسىرۋ قازاقستان مەن ناتو ءارىپتەستىگىن ساپالىق تۇرعىدا جاڭا دەڭگەيگە كوتەرەدى. ول قورعانىس, ازاماتتىق توتەنشە جوسپارلاۋ, عىلىمي جوبالاردى جۇزەگە اسىرۋ سالاسىنداعى ارىپتەستىكتى تابىستى دامىتۋعا مۇمكىندىك بەرەدى.
ساياسي ۇنقاتىسۋدا پارلامەنتتىك بايلانىستاردىڭ ماڭىزدىلىعىن اتاپ وتە كەلىپ, تاراپتار قازاقستان مەن ناتو ىنتىماقتاستىعىن ءاليانستىڭ پارلامەنتتىك اسسامبلەياسى اياسىندا ءورىستەتۋ تۋرالى ايتتى.
ناتو پارلامەنتتىك اسسامبلەياسىندا قازاقستاننىڭ پارلامەنتتىك دەلەگاتسياسى «بايقاۋشى» مارتەبەسىنە يە. پارلامەنت دەپۋتاتتارى اسسامبلەيا اياسىندا ۇيىمداستىرىلعان شارالارعا بەلسەندى تۇردە قاتىسادى.
«قازاقستان ناتو-نىڭ ايماقتاعى نەگىزگى ارىپتەسى بولىپ تابىلادى», – دەدى د.اپپاتۋراي جانە ول ءبىزدىڭ ەلىمىزدىڭ الەمدىك ارەناداعى ماڭىزدى ءرولىن اتاپ ءوتتى. ونىڭ پىكىرىنشە, ەكىجاقتى ىنتىماقتاستىقتى ودان ءارى نىعايتا ءتۇسۋدىڭ زور الەۋەتى بار.
اۋعانستانداعى جاعدايدىڭ رەتتەلۋىنە وراي حالىقارالىق كۇش-جىگەردى قولداعانى ءۇشىن قازاقستاندىق تاراپقا العىس ايتا كەلىپ, د.اپپاتۋراي اتالعان ەلدى قالپىنا كەلتىرۋدەگى قازاقستاننىڭ ۇلەسىن جوعارى باعالادى.