ۇستىمىزدەگى جىلدىڭ 8 مامىرىندا تاشكەنتتەگى قازاق ۇلتتىق ورتالىعىمەن بىرلەسە وتىرىپ, وسىندا تۇراتىن قانداستارىمىزدىڭ اراسىنان ۇلى وتان سوعىسىنا قاتىسقان ارداگەرلەرگە قازاقستان ەلشىلىگىندە قۇرمەت كورسەتىلدى. قابىلداۋدا قازاقستاننىڭ وزبەكستانداعى توتەنشە جانە وكىلەتتى ەلشىسى ءبورىباي جەكسەنبين ءسوز سويلەپ, سوعىس ارداگەرلەرى مەن تىل ەڭبەككەرلەرىنىڭ جانقيارلىق ەرلىكتەرى مەن ەڭبەكتەرى بۇگىنگى ۇرپاققا ءاردايىم ۇلگى بولاتىنىن اتاپ ءوتتى. قابىلداۋدا ءسويلەگەن ارداگەرلەر ەكى مەملەكەتتىڭ اراسىنداعى تۋىستىق قاتىناستاردىڭ تەرەڭدەي تۇسۋىنە تىلەكتەستىك ءبىلدىردى. كەلگەن ارداگەرلەردىڭ ءبارى دە قازاقستان ەلشىلىگى تاراپىنان سىي-سياپاتتارعا يە بولدى.
وسى كۇنى تاشكەنتتىڭ ورتالىق مادەنيەت سارايىندا جەڭىس كۇنى مەن قازاقستان جانە وزبەكستان مەملەكەتتەرى تاۋەلسىزدىگىنىڭ 20 جىلدىعىنا ارنالعان حالىقارالىق اقىندار ايتىسى وتكىزىلدى. وعان قازاقستان مەن وزبەكستان عانا ەمەس, موڭعوليادان كەلگەن اقىندار دا قاتىستى. اشىلۋ سالتاناتىندا سويلەگەن سوزىندە ب.جەكسەنبين مادەني شارا ەلباسى ن.نازارباەۆتىڭ 2010 جىلى تاشكەنتكە جاساعان ساپارىندا قول جەتكىزىلگەن ەكى ەلدىڭ اراسىنداعى مادەني ىنتىماقتاستىقتى دامىتۋ باعدارلاماسى اياسىندا ءوتىپ وتىرعانىن اتاپ ءوتتى. ايتىستا باس جۇلدەنى تارازدىق اقىن اينۇر تۇرسىنباەۆا جەڭىپ الىپ, اۆتوكولىكتىڭ كىلتىن يەلەندى.
ال ۇلى جەڭىستىڭ 66 جىلدىعى كۇنى قازاقستان ەلشىلىگىنىڭ ۇيىمداستىرۋىمەن «مۋستاكيلليك» الاڭىندا ورنالاسقان قايعىلى انا ەسكەرتكىشى مەن ماڭگىلىك الاۋعا جانە تاشكەنتتەگى باۋىرلاستار زيراتىنا گۇل شوقتارىن قويۋ ءراسىمى بولدى. بۇل شاراعا ءوزبەكستان رەسپۋبليكاسىندا تىركەلگەن 40-قا جۋىق حالىقارالىق ۇيىمدار مەن ديپلوماتيالىق وكىلدەر باسشىلارى قاتىستى. سول كۇنى قازاقستان ەلشىلىگىندە ب.جەكسەنبيننىڭ اتىنان قابىلداۋ بولدى. وندا قازاقستاننىڭ ۇلى وتان سوعىسىنداعى جەڭىسكە قوسقان ۇلكەن ۇلەسى تۋرالى اقپارات بەرىلدى. شاراعا وزبەكستان سىرتقى ىستەر ءمينيسترىنىڭ ورىنباسارى ب.يسلاموۆ جانە باسقالار قاتىستى.
«ەگەمەن-اقپارات».