كەشە ۇكىمەت ۇيىندە ەكونوميكالىق دامۋ جانە ساۋدا ءمينيسترى قايرات كەلىمبەتوۆ, «دامۋ» كاسىپكەرلىكتى دامىتۋ قورى» اق باسشىسى ءلاززات يبراگيموۆا جانە ازيا دامۋ بانكىنىڭ ۆيتسە-پرەزيدەنتى شاويۋ جاونىڭ قاتىسۋىمەن شاعىن جانە ورتا بيزنەس سۋبەكتىلەرىن قولداۋ ماقساتىندا ەلىمىزگە قارجى ءبولۋ تۋرالى شەكتى كەلىسىمگە قول قويىلدى. قول قويۋ راسىمىنە پرەمەر-مينيستر كارىم ءماسىموۆ قاتىستى. كەلىسىم بويىنشا قازاقستاننىڭ شاعىن جانە ورتا بيزنەس سەكتورىن دامىتۋعا 500 ملن. اقش دوللارى سوماسىندا قارىز بەرىلمەك.
ەكونوميكالىق دامۋ جانە ساۋدا مينيسترلىگى 2010 جىلدىڭ كوكتەمىنەن بەرى ەلدەگى شاعىن جانە ورتا بيزنەستى قولداۋ ماقساتىمەن ازيا دامۋ بانكى قاراجاتىن تارتۋ بويىنشا تۇراقتى جۇمىس ءجۇرگىزىپ كەلەدى. ال بۇل كەلىسىم ءوز سيپاتى بويىنشا قازاقستان ەكونوميكاسىن ءارتاراپتاندىرۋ جانە دامۋى ارقىلى جاڭا جۇمىس ورىندارىن قۇرۋعا ىقپال جاسايتىن شوب-تى قولداۋ جونىندەگى ينۆەستيتسيالىق باعدارلامانى قارجىلاندىرۋدىڭ كوپ ترانشتى تەتىگى بولىپ وتىر. تارتىلىپ وتىرعان قاراجات ازيا دامۋ بانكى تاريحىندا شوب سەكتورىن دامىتۋعا بەرگەن ەڭ ۇلكەن قارىز كورىنەدى. سونداي-اق بۇل قارجى حالىقارالىق قارجى ينستيتۋتتارىنىڭ قارىز الۋشى ەلدىڭ ۇلتتىق ۆاليۋتاسىندا بەرىپ وتىرعان ءبىرىنشى قارىزى ەكەندىگىن ايتا كەتكەن ءلازىم.
ينۆەستيتسيالىق باعدارلاماعا ساي, «دامۋ» قورى ازيا دامۋ بانكى بولگەن قارجىنى بىرنەشە كەزەكپەن الادى. كولەمى 150 ملن.اقش دوللارى بولاتىن نەسيەنىڭ العاشقى ترانشىن مامىر ايىنىڭ سوڭىنا دەيىن الۋ جوسپارلانۋدا. ال قالعان قارجى العاشقى قارجىنى يگەرۋگە بايلانىستى تارتىلا بەرمەك. ورتا مەرزىمدى قارىز تەڭگەنىڭ بەلگىلەنگەن باعامى بويىنشا مەملەكەتتىك كەپىلدەمە ارقىلى بەرىلىپ, ودان ءارى باعدارلاماعا قاتىسۋشى قازاقستاندىق بانكتەرگە بەرىلەدى. بۇل ءۇشىن ادب ءوز تاراپىنان ينۆەستيتسيالىق زەرتتەۋ جۇرگىزىپ, جوبا بويىنشا ارىپتەس بانكتەر تاڭداپ الدى. ولاردىڭ قاتارىندا «قازكوممەرتسبانك» اق, «تسەنتركرەديت بانك» اق جانە «اليانس بانك» اق بار. ازيا دامۋ بانكى ۇستانعان ساياساتىنا سايكەس شوب-قا ارنالعان نەسيەنى نارىق تالاپتارىنا ساي بەرەدى. ال قازىرگى ۋاقىتتا نارىقتا شوب-تى نەسيەلەۋ ءۇشىن جىلدىق پايىزدىق ءمولشەرلەمە 14%-دى قۇراپ وتىر. جوبا بويىنشا سوڭعى قارىز الۋشىلار ءۇشىن دە پايىزدىق مولشەرلەمە دەڭگەيى وسىلاي قالا بەرەدى دەپ كۇتىلۋدە. قارىز ۇلتتىق ۆاليۋتادا بەرىلەتىن بولعاندىقتان قازاقستاندىق ارىپتەس بانكتەر جانە سوڭعى قارىز الۋشىلاردىڭ باعدارلاما بويىنشا ۆاليۋتالىق جانە پايىزدىق تاۋەكەلدەرىنىڭ ءتومەندەۋىنە ءمۇمكىندىك بار. بۇل قاراجات ەسەبىنەن شوب-تى نەسيەلەۋ ەلىمىزدىڭ بارلىق ايماقتارىندا ءجۇزەگە اسىرىلادى. سونداي-اق قارىزدىڭ 40%-دان كەم ەمەس بولىگى الماتى جانە استانا قالالارىنان تىس جەرلەردە ورنالاستىرىلادى.
«دامۋ» قورىنىڭ باسشىسى ءلاززات يبراگيموۆا جۋرناليستەرمەن اڭگىمە بارىسىندا شەكتى كەلىسىم ءمانىنىڭ تاريحيلىعىن جەتكىزدى. مەملەكەت كەپىلدەمەسى ارقىلى الىناتىن زاەم شوب دامۋىنا جۇمسالادى. سونداي-اق ەڭ باستىسى, بۇل زاەمنىڭ شوب سۋبەكتىلەرىنە تەڭگەمەن بەرىلەتىندىگى. بۇل بيزنەسمەن ءۇشىن ەڭ الدىمەن ۆاليۋتالىق تاۋەكەلدىلىكتىڭ ءتومەندىگى, دەدى ول. قور باسشىسى وسى ايدىڭ سوڭىنا دەيىن زايم تۋرالى كەلىسىمگە قول قويىلىپ, سونىمەن قاتار, ونىڭ پايىزدىق ستاۆكاسى بەلگىلى بولاتىندىعىن جەتكىزدى.
ۆەنەرا تۇگەلباي.