وتانىمىزدىڭ ەڭ ماڭىزدى مەيرامدارىنىڭ بىرىنە ارنالعان مەرەكەلىك شاراعا وبلىس اكىمى جانسەيىت تۇيمەباەۆ قاتىسىپ, بارشا وڭتۇستىكقازاقستاندىقتاردى بىرلىك كۇنىمەن قۇتتىقتادى.
«حالقىمىزدا «باق قايدا باراسىڭ − ىنتىماققا بارامىن» دەگەن دانا ءسوز بار. ەلدىك بولمىسىمىزعا ءتان بۇل ۇعىمدى تاۋەلسىزدىكتىڭ تۇعىرلى, مەملەكەتتىڭ عۇمىرلى بولۋىنا وزەك ەتتىك. بىرلىكتى باستى بايلىعىمىز – تاۋەلسىزدىكتىڭ ارقاۋى ەتىپ ايشىقتادىق. ەلباسىمىز ۇسىنعان جول, جۇرت بولىپ جۇمىلا ۇستانعان ساياسات شيرەك عاسىردا جەمىستى ناتيجەسىن بەردى. بۇگىنگى قازاقستان بىرلىگى بەكەم, تىرلىگى كەلىسكەن, ىنتىماعى جاراسقان ەلگە اينالدى.جەتكەن جەتىستىكتەرىمىز بەن العان اسۋلارىمىز از ەمەس. بۇگىن ءبىز ۇلى دالانىڭ ۇلاعاتىمەن ماڭگىلىك ەل قۇرۋعا قادام باستىق. كۇن سايىن قۇبىلعان زامانانىڭ يىرىمىنە توتەپ بەرەتىن قۋاتتى مەملەكەتتى جاساقتاۋدىڭ قامىنا كىرىستىك. ەلەۋلى وزگەرىستەر قوعامنىڭ بارلىق سالاسىن قامتىپ وتىر. جالپىۇلتتىق جاڭعىرۋ ساياسي-ەكونوميكالىق سالالارمەن قاتار, ازاماتتىق ساناعا دا سەرپىلىس الىپ كەلمەك», - دەدى اكىم
سالتاناتتى جيىندا ايماق باسشىسى ەلدەگى ەتنوسارالىق تاتۋلىق پەن قوعامدىق-ساياسي تۇراقتىلىقتى ساقتاۋعا سۇبەلى ۇلەس قوسقان وڭىردەگى 18 ەتنومادەني بىرلەستىكتەرگە وبلىس اكىمىنىڭ «باۋىرمال» سىيلىعىن تابىستادى.
ەلىمىزدىڭ باستى مەرەكەلەرىنىڭ ءبىرىن تويلاۋعا كەلگەن جۇرتشىلىق «اق كوگەرشىن» كومپوزيتسياسىن تاماشالاپ, ىنتىماعى جاراسقان ءتۇرلى ەتنوس وكىلدەرى ونەرپازدارىنىڭ ءانىن تىڭدادى. مۇنىمەن بىرگە, جيىلعان جۇرتشىلىق ءبىر مەزەتتە 1 مىڭ دومبىراشىنىڭ ورىنداعان كۇيىن تىڭداسا, «ماڭگىلىك ەل» وبرازىندا بەزەندىرىلگەن ماشينا, التىن ادام كيىمىندەگى 20 سالت اتتىلار شەرۋىن كوردى.
ايتا كەتەيىك, وڭتۇستىك قازاقستاندا بۇگىنگى تاڭدا 100-دەن استام ەتنوس وكىلدەرى تاتۋ-ءتاتتى ءومىر ءسۇرىپ, بىرلەسە ەڭبەك ەتىپ كەلەدى. ال وبلىستاعى 20 ەتنومادەني ورتالىق پەن اۋدان, قالالارداعى 51 فيليالدا ءار ەتنوستىڭ سالت-داستۇرىنە, ادەپ-عۇرپىنا, مادەنيەتىنە بايلانىستى ءتۇرلى ءىس-شارالاردى وتكىزۋىنە بارلىق مۇمكىندىكتەر جاسالعان.
سونىمەن قاتار, ەتنومادەني ورتالىقتار جانىندا 17 جاستار قاناتى مەن 11 جەكسەنبىلىك مەكتەبى بار.