ەر-رياد قالاسىندا ساۋد ارابياسىنىڭ كورولى سالمان بەن ءابدەل ءازيز قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆتى قابىلدادى. سىرتقى ىستەر ءمينيسترى ساۋد ارابياسى كورولىنە 2017 جىلعى 10-11 قىركۇيەكتە استانا قالاسىندا وتەتىن تاريحتاعى العاش يسلام ىنتىماقتاستىعى ۇيىمىنىڭ عىلىم جانە تەحنولوگيالار بويىنشا سامميتىنە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ شاقىرۋ حاتىن تابىس ەتتى. قازاقستاندىق ديپلوماتتىڭ ءسوزىنە سۇيەنسەك, كورولدىڭ يسلام الەمىندەگى ەڭ ءىرى مەملەكەتتەردىڭ ءبىرىنىڭ باسشىسى رەتىندە سامميتكە قاتىسۋى ونىڭ تابىستى وتۋىنە ماڭىزدى ۇلەس قوسادى.
ءوز كەزەگىندە, ساۋد ارابياسىنىڭ كورولى شاقىرۋعا العىسىن بىلدىرە وتىرىپ, ونى مۇقيات قاراستىراتىندىعىنا ءۋادە بەردى. ونىڭ ايتۋىنشا, ساۋد ارابياسى قازاقستاندى جاقىن ءارى ماڭىزدى مەملەكەت رەتىندە قاراستىرادى جانە ەكىجاقتى قارىم-قاتىناستى دامىتۋ مەن نىعايتۋ قاجەت دەپ سانايدى.
مونارح سيريادا بەيبىتشىلىك پەن قاۋىپسىزدىك ورناتۋدا استانا پروتسەسىنىڭ ماڭىزدىلىعىن ايتىپ, اتالعان باعىتتاعى قازاقستان رەسپۋبليكاسى باسشىسىنىڭ ۇلكەن ۇلەسىن ايتىپ ءوتتى.
ءوز كەزەگىندە مينيستر قازاقستان تاراپىنىڭ ەر-ريادپەن ءوزارا ءتيىمدى ىنتىماقتاستىقتى نىعايتۋعا دەگەن ۇمتىلىسىن ايتىپ, ەلباسىنىڭ حالىقارالىق باستامالارى مەن مەملەكەتتىڭ الەۋمەتتىك-ەكونوميكالىق دامۋىنداعى ماڭىزدى جوبالاردى قولداعانى, استانا قالاسىنىڭ قۇرىلىسى مەن الداعى ەكسپو-2017 كورمەسىنە قاتىساتىنى ءۇشىن ريزاشىلىق ءبىلدىردى.
جاراسىمدى اڭگىمەنى قورىتىندىلاي كەلە, ساۋد ارابياسىنىڭ كورولى پرەزيدەنت نۇرسۇلتان نازارباەۆقا زور دەنساۋلىق, باقىت, الداعى ۋاقىتتا جۇمىسىنا تابىس ءتىلەدى جانە بارشا قازاقستان حالقىنا يگى تىلەگىن جەتكىزۋدى ءوتىندى.
سىرتقى ىستەر ءمينيسترىنىڭ كۋۆەيتكە ساپارى اياسىندا قايرات ءابدىراحمانوۆتى كۋۆەيت مەملەكەتىنىڭ ءامىرى شەيح ساباح ءال-احمەد اس-ساباح قابىلدادى. كۋۆەيت باسشىسىنا استانا قالاسىندا وتەتىن يسلام ىنتىماقتاستىعى ۇيىمىنىڭ عىلىم جانە تەحنولوگيالار ءجونىندەگى سامميتىنە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ شاقىرۋ حاتى تابىستالدى. الەمدە بۇل تاياۋ شىعىس ەلىنىڭ كۇردەلى حالىقارالىق كەزەڭدە بىتىمگەرلىك جانە گۋمانيتارلىق باستامالارعا ساياسي ءارى قارجىلىق قولداۋ كورسەتەتىن كونسترۋكتيۆتى كۇشتەردىڭ ءبىرى رەتىندە قاراستىرىلاتىندىعى اتاپ ءوتىلدى.
ءامىر قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ شاقىرۋىنا ريزاشىلىعىن ءبىلدىردى, سونىمەن قاتار, وسىنداي ءسامميتتىڭ ءوتۋىن قولدايتىندىعىن جانە وعان قاتىسۋعا نيەتتى ەكەنىن حابارلادى. سونداي-اق, كۋۆەيت استانانىڭ بارلىق بەيبىت ماقساتتاعى باستامالارىن ىسكە اسىرۋدا سەنىمدى سەرىكتەس بولاتىندىعىن جەتكىزۋدى ءوتىندى. ەكى ەل بەيبىتشىلىك پەن قاۋىپسىزدىكتى قامتاماسىز ەتۋ ءۇشىن جانجالداردى اسكەري جولمەن ەمەس, بەيبىت باستامالار, گۋمانيتارلىق كومەك, ساياسي پروتسەستەر ارقىلى رەتتەگەندى ءجون كورەدى.
قايرات ءابدىراحمانوۆ كۋۆەيت پرەمەر-ءمينيسترىنىڭ ورىنباسارى, سىرتقى ىستەر ءمينيسترى شەيح ساباح ءال-حالەد اس-ساباحپەن كەلىسسوز جۇرگىزدى. جاراسىمدى اڭگىمە بارىسىندا ىشكى ساياسات جانە وڭىرلىك, جاھاندىق ارەنادا اشىقتىق, ۇستامدىلىق, تولەرانتتىلىق پرينتسيپتەرىن ۇستانۋدا ەكى ەلدىڭ ۇقساستىعى اتاپ ءوتىلدى. بۇل تۇرعىدا, تاراپتار بىرىككەن ۇلتتار ۇيىمى شەڭبەرىندە ىنتىماقتاستىق ءماسەلەلەرىن جانە كۋۆەيت مەملەكەتىنىڭ 2018-2019 جىلدارى قاۋىپسىزدىك كەڭەسىنە مۇشە بولۋ كانديداتۋراسىن تالقىلادى.
كۋۆەيت سىرتقى ىستەر مينيسترلىگىنىڭ باسشىسى قازاقستان پرەزيدەنتىنىڭ بەيبىتشىلىك باستاماسىن قولدايتىنىن جانە قازاقستان ەلورداسىندا وتكەن سيرياداعى جاعدايدى رەتتەۋ بويىنشا كەلىسسوزدەر پروتسەسىنە ەرەكشە ءمان بەرە وتىرىپ, حالىقارالىق كۇش ءۇشىن قازىرگى كەزدەگى كۇردەلى جانجالداردى رەتتەۋگە بايلانىستى استانا ءرولىنىڭ ماڭىزدىلىعى ارتىپ كەلە جاتقانىن اتاپ ءوتتى.
قايرات ءابدىراحمانوۆ ءوز كەزەگىندە ءارىپتەسىنە كۋۆەيتتىڭ ازىق-ت ۇلىك قاۋىپسىزدىگى جونىندەگى يسلام ۇيىمى جار-
عىسىن العاشقى مۇشە مەملەكەتتەر قاتارىندا راتيفيكاتسيالاعانى ءجانە قازاقستاندا اتوم ەنەرگياسى ءجونىن-
دەگى حالىقارالىق اگەنتتىكتىڭ حالىقارالىق تومەن بايىتىلعان ۋران بانكىن قۇرۋدا 10 ملن اقش دوللارى كولەمىندە قارجىلاي ۇلەس قوسقانى ءۇشىن ريزاشىلىعىن ءبىلدىردى. سونداي-اق, يەمەن قاقتىعىسىن شەشۋ جولىنداعى ايماقتىق كۇشكە ءجاردەمدەسۋ ءجونىندەگى كۋۆەيت ديپلوماتياسىنىڭ جۇمىسىن قولدادى.
كۋۆەيت جەكە بيزنەسىنىڭ قازاقستاندىق قىزمەت سەكتورىنا سالعان ءبىرىنشى ينۆەستيتسيالارىن ەسكەرىپ, تاراپتار ەكى ەل اراسىنداعى ەكونوميكالىق ىنتىماقتاستىقتى كەڭەيتۋ ماڭىزدىلىعىن اتاپ ءوتتى. سونداي-اق, مۇناي-گاز سالاسى مەن يسلامدىق قارجىلاندىرۋ قۇرالدارىن دامىتۋ بويىنشا ىسكەرلىك قارىم-قاتىناستار قۇرۋدىڭ بولاشاعى زور ەكەنى مالىمدەلدى. وسىعان وراي, قازاقستان-كۋۆەيت ۇكىمەتارالىق كوميسسياسىنىڭ 4-ءشى وتىرىسىنا دايىندىق قاجەتتىگى كولدەنەڭ تارتىلدى.
كۋۆەيتتىڭ اراب ەكونوميكالىق دامۋ قورىنىڭ گرانتى ەسەبىنەن استانانىڭ تەحنيكالىق-ەكونوميكالىق ينفراقۇرىلىمىنىڭ نەگىزدەمەسى ازىرلەندى, قازاقستان رەسپۋبليكاسى اۋىل شارۋاشىلىعى مينيسترلىگىنىڭ عيماراتى سالىندى, سونداي-اق, قىزىلوردا وبلىسىندا سۋمەن جابدىقتاۋ, سانيتاريا, دەنساۋلىق ساقتاۋ سالالارىنداعى بىرقاتار جوبالار ىسكە اسىرىلعاندىعىن ايرىقشا اتاپ ءوتۋ قاجەت.
قازاقستان رەسپۋبليكاسى سىرتقى ءىستەر ءمينيسترىنىڭ اتالعان وڭىرلەرگە ساپارى اراب ەلدەرىمەن كوپتەگەن وڭىرلىك جانە جاھاندىق كۇن تارتىبىندەگى وزەكتى ءماسەلەلەر بويىنشا, اسىرەسە, استانا پروتسەسى بويىنشا ۇستانىمداردى سالىستىرۋعا مۇمكىندىك بەردى.
كەزدەسۋلەر بارىسىندا 2016 جىلى يسلام ىنتىماقتاستىعى ۇيىمىنىڭ ىستانبۇلداعى سامميتىندە ماقۇلدانعان «يسلام الەمىندەگى تاتۋلاسۋ» باستاماسىن ىسكە اسىرۋدىڭ اسپەكتىلەرى بەلسەندى تۇردە تالقىلاندى. تاراپتار ەكىجاقتى قارىم-قاتىناستاردىڭ, اسىرەسە, ەكونوميكالىق ديپلوماتيا باعىتىنداعى دامۋ پروگرەسىن اتاپ كورسەتتى.