تالقىلاۋعا ۇكىمەتتىك ەمەس ۇيىمداردىڭ وكىلدەرى, بەلگىلى جۋرناليستەر, سونداي-اق «اتامەكەن» ۇلتتىق كاسىپكەرلەر پالاتاسىنىڭ وكىلدەرى قاتىستى. جيىن باسىندا ءسوز العان مينيستر د.اباەۆ مەملەكەت باسشىسى ۆەدموستۆونىڭ الدىنا ەلىمىزدىڭ اقپارات كەڭىستىگىن نىعايتۋ, وتاندىق اقپارات قۇرالدارىنىڭ دەڭگەيىن كوتەرۋ, كوممeنيكاتسيالىق ينفراقۇرىلىمدى دامىتۋ بويىنشا بىرقاتار مىندەتتەر جۇكتەگەنىن ايتتى. «ءبىز وسى مىندەتتەردى باسشىلىققا الا وتىرىپ, زاڭ جوباسىن ازىرلەۋگە وعان اقپارات سالاسى ماماندارىنىڭ, ۇكىمەتتىك ەمەس ۇيىمداردىڭ, جالپى قوعام وكىلدەرىنىڭ جان-جاقتى اتسالىسۋىنا مۇمكىندىك بەرگەنبىز. جوبا ءازىرلەنگەننەن بەرگى ۋاقىتتا كوپتەگەن تالقىلاۋلار مەن قىزۋ پىكىرتالاستار وتكىزىلدى. بۇگىنگى تاڭدا كوپشىلىكتىڭ ۇسىنىس-پىكىرلەرى ەسكەرىلە كەلە, جوبانىڭ نەگىزگى باعىتتارى بويىنشا ۇستانىمدارىمىز ءبىر ارنادان تابىلۋدا دەۋگە بولادى», دەدى مينيستر.
جاڭا قۇجات تالقىلاۋعا شىعارىلعاننان كەيىنگى ارالىقتا وعان قاتىستى 200-دەن استام ۇسىنىس ءتۇسىپ, سونىڭ 70 پايىزى قۇجاتقا ەنگىزىلگەن. جالپى العاندا, قۇجاتقا 250-گە جۋىق تۇزەتۋلەر قاراستىرىلعان. وسى تۇزەتۋلەر نەگىزىندە 4 كودەكس پەن 12 زاڭعا وزگەرىستەر مەن تولىقتىرۋلار ەنگىزىلمەك.
زاڭ جوباسى قوعام تالقىسىنا ۇسىنىلعان توعىز ايعا جۋىق ۋاقىت ىشىندە ءتيىستى جۇمىس توبىنىڭ ءۇش وتىرىسى ءوتىپ, ەلىمىزدىڭ بارلىق وڭىرىنەن كەلگەن وكىلدەردىڭ قاتىسۋىمەن قوعامدىق تالقىلاۋلار ۇيىمداستىرىلعان بولاتىن. مينيسترلىك جانىنداعى قوعامدىق كەڭەستە دە تالقىلانعان.
«زاڭ جوباسىمەن جۇمىس بارىسىندا قاراپايىم ازاماتتار تاراپىنان دا كوپتەگەن وتىنىشتەر ءتۇستى. اسىرەسە, بالالاردى قورعاۋعا باعىتتالعان بەينەلەرى مەن جەكە دەرەكتەرىن جاريالاۋدى شەكتەۋگە, «بالانىڭ جاسىنا ساي اقپارات» ۇعىمىن ەنگىزۋ سىندى شارالار قابىلداندى», دەدى مينيستر.
د.اباەۆتىڭ ايتۋىنشا, بۇگىنگى تاڭدا «كيبەربۋللينگ», ياعني الەۋمەتتىك جەلىلەر, بايلانىس قۇرالدارى ارقىلى قۋدالاۋ, ار-نامىسىنا نۇقسان كەلتىرەتىن ارەكەت جاساۋ ماسەلەسى وتە وزەكتى بولىپ وتىر. مينيسترلىك زاڭ جوباسىندا وسى تەكتەس ماسەلەلەردى نازارعا الۋعا نيەتتى.
زاڭ جوباسى بارلىق ورتالىق مەملەكەتتىك ورگاندارمەن, پرەزيدەنتكە ەسەپتى قىزىعۋشىلىق تانىتقان ورگاندارمەن, سونداي-اق 14 وبلىستىڭ, استانا مەن الماتى قالالارىنىڭ اكىمدىكتەرىمەن, باس-اياعى 35 ورگانمەن كەلىسىلگەن. قازىرگى تاڭدا قۇجات جوباسى ۇكىمەتتە قارالۋدا.
جيىن بارىسىندا اقپارات جانە كوممۋنيكاتسيالار مينيسترلىگى باق سالاسىنداعى مەملەكەتتىك ساياسات دەپارتامەنتىنىڭ ديرەكتورى ەلدوس ءناشىرالى باق-تاردىڭ ەكونوميكالىق جۇكتەمەسىن جەڭىلدەتۋ, ياعني ۇساق زاڭ بۇزۋشىلىقتار بويىنشا تيراجدى تاركىلەۋ نەمەسە باق-تىڭ جۇمىسىن ۋاقىتشا توقتاتۋ سىندى نورمالاردى الىپ تاستاۋ ۇسىنىلىپ وتىرعانىن ايتتى. بۇدان باسقا, مەملەكەتتىك ورگاندار, ۇيىمدار جانە باق-تار اراسىندا ءوزارا ءىس-قيمىل جونىندەگى ارنايى وكىلدەر, قۇرىلىمدىق ءبولىمشەلەر تۋرالى دا وزگەرىس ەنگىزىلىپ وتىر.
جالپى, زاڭ جوباسى باق, تەلەراديو تاراتىلىمى, اقپاراتتاندىرۋ جانە بايلانىس سالالارىنداعى قاتىناستاردى قۇقىقتىق تۇرعىدا رەگلامەنتتەۋگە باعىتتالعان.
ارنۇر اسقار,
«ەگەمەن قازاقستان»
سۋرەتتەردى تۇسىرگەن ەرلان وماروۆ,
«ەگەمەن قازاقستان»