كاۆكاز اۋماعىنان جىلجىپ كەلە جاتقان انتيتسيكلون اسەرىنەن باتىس قازاقستان اۋماعىندا الداعى ءۇش تاۋلىكتە اۋا رايى جاۋىن-شاشىنسىز بولادى جانە جىلىنادى دەپ بولجانۋدا. بۇل تۋرالى «قازگيدرومەت» رمك ءباسپاسوز قىزمەتى حابارلايدى.
ەلىمىزدىڭ قالعان ايماقتارىندا پوليارلى اتموسفەرالىق فرونتتار اركتيكانىڭ سۋىق فرونتتارىنا ۇلاسادى. وسى فرونتتاردىڭ اسەرىنەن, جاڭبىرلى, نايزاعايلى اۋا رايى كۇتىلەدى. ەلىمىزدىڭ وڭتۇستىگىندە جانە وڭتۇستىك-شىعىسىندا كەي جەرلەردە قاتتى جاڭبىر, بۇرشاق جاۋىپ, ەكپىندى جەل جانە اۋا رايىنىڭ سالقىنداۋى بايقالادى.
ەگەر وتكەن تاۋلىك, 25 ساۋىردە, اۋا تەمپەراتۋراسى (باتىس اۋدانداردى قوسپاعاندا) 4-8ºس نورمادان جوعارى بولسا, 28-29 ساۋىردە ەلىمىزدىڭ ورتالىعىندا, وڭتۇستىگىندە جانە وڭتۇستىك-شىعىسىندا تەمپەراتۋرا كليماتتىق نورمادان 2-5ºس دەيىن تومەندەيدى.