بەيبىتشىلىك پەن كەلىسىم سارايىندا ءوتىپ جاتقان قازاقستان حالقى اسسامبلەياسىنىڭ XXV سەسسياسىندا ەلباسى قازاقستان حالقىنىڭ ينتەراكتيۆتى كارتاسىن ازىرلەۋدى تاپسىردى.
«كابينەتىمدە ءىلىنىپ تۇرعان قازاقستاننىڭ ۇلكەن كارتاسىنا ۋاق-ۋاق قاراپ قويامىن جانە وبلىستاردىڭ, اۋدانداردىڭ, قالالاردىڭ, اۋىلداردىڭ اتاۋلارىنا عانا كوز جۇگىرتىپ قويماي ەلىمىزدىڭ بايتاق اۋماعىندا بارلىعىمىز بىرگە اتقارىپ جاتقان زور جۇمىستاردى ەلەستەتەسىڭ», - دەپ ەلباسى قازاقستان حالقىنىڭ ينتەراكتيۆتى تاريحي كارتاسىن ازىرلەۋدى ۇسىندى.
قر پرەزيدەنتىنىڭ ايتۋىنشا, ەلەكتروندى كارتا ەجەلگى قازاق جەرىندەگى بارلىق ۇلتتاردىڭ شوعىرلانۋ پروتسەسىن اشىق كورسەتىپ, مەملەكەت قۇراۋشى قازاق حالقىنىڭ ايرىقشا ميسسياسىن پاش ەتەتىن بولادى.
«ءبىلىم جانە عىلىم مينيسترلىگىنە اسسامبلەيامەن بىرلەسە وتىرىپ, عىلىمي نەگىزدە وسىنداي ينتەراكتيۆتى كارتانى ازىرلەۋدى جانە ونى كەلەسى جىل العىس كۇنىندە تانىستىرۋدى تاپسىرامىن», - دەدى نۇرسۇلتان نازارباەۆ.