ادامنىڭ دوسى سانالىپ, حالقىمىز جەتى قازىنانىڭ بىرىنە بالاعان ءتورت اياقتى جانۋاردىڭ ادامعا تيگىزەر پايداسى زور. ەلىمىزدىڭ قاۋىپسىزدىك قۇرىلىمدارى, ناقتىراق ايتساق شەكارالىق كەدەن قىزمەتى, تۇرمەدەگى كۇزەت, ايداۋىلداۋ, قوعامدىق ورىندارداعى تىنىشتىقتىڭ ساقتالۋى تاعى دا بىرقاتار قىزمەتتەردە قوسىمشا كۇش رەتىندە ارنايى ۇيرەتىلگەن اقىلدى يتتەردىڭ كومەگىنە جۇگىنەمىز. كينولوگيالىق ورتالىقتاعى يتتەر ناقتى سالا بويىنشا دايىندالادى. جارىلعىش زاتتاردى انىقتاۋ, ەسىرتكى زاتتارىن اشكەرەلەۋ, اقشا قۇرالىن ىزدەستىرۋ, باعالى اڭ مۇيىزدەرىن انىقتاۋ جۇمىستارى بويىنشا كىشكەنتاي كۇشىك كەزىنەن باستاپ بىلىكتى ماماندار قولىندا تاربيەلەنەدى. ياعني, جوعارىدا ايتىلعان ناقتى قۇرالداردىڭ ءيىسىن سەزۋگە ماشىقتاندىرىلادى. ءتىلى جوق جانۋاردى تاربيەلەپ ولاردىڭ بابىن تاۋىپ تابيعي بولمىسىن ۇعىنۋ كەز-كەلگەننىڭ قولىنان كەلەر شارۋا ەمەس.
وسى رەتتە كينولوگ مامانداردىڭ بىلىكتىلىگىن ارتتىرۋ ماڭىزدى. كينولوگيالىق ورتالىقتا اتتەستاتتاۋ كوميسسياسىمەن «ب» كورپۋسىنىڭ اكىمشىلىك مەملەكەتتىك قىزمەتشىلەرىنىڭ اتتەستاتتاۋدىڭ ءۇشىنشى اڭگىمەلەسۋ كەزەڭى اياقتالدى. اتتەستاتتاۋ كوميسسياسىنىڭ قۇرامىنا مۇشە رەتىندە قوعامدىق ۇيىمداردىڭ وكىلدەرى «گەنەرالدار كەڭەسى» رقۇ ميليتسيا گەنەرال مايورى وسمان-رۋستامبەك بيجىگىتوۆ, زاڭ عىلىمدارىنىڭ كانديداتى «قازاق ەڭبەك جانە الەۋمەتتىك قاتىناستار اكادەمياسىنىڭ» پروفەسورى جولدىباي وسپانوۆ, تۇركسىب اۋداندىق «نۇروتان» پارتياسى فيليالى توراعاسىنىڭ ءبىرىنشى ورىنباسارى نۇرلانبەك ەسكەندىر ۇلى, سونىمەن قاتار باق وكىلدەرى قاتىستى.
«ورتالىعىمىزداعى يتتەردىڭ بارلىعى دەرلىك اسىل تۇقىمدى. ولاردى ەرەكشە كۇتىممەن باپتاپ, شەبەرلىككە باۋلىپ, ەلىمىزدىڭ قاۋىپسىزدىك سالاسىنىڭ بارلىق قۇرىلىمدارىنا جىبەرەمىز. يتتەرمەن جۇمىس ىستەۋ اسقان توزىمدىلىك پەن شەبەرلىكتى تالاپ ەتەدى. سوندىقتان, ءبىزدىڭ مامانداردىڭ يىعىنا ارتىلعان جۇكتىڭ سالماعى اۋىر. كينولوگتاردىڭ بىلىكتىلىگىن ارتتىرۋ, قاۋىپسىزدىكتىڭ كۇشىن قۋاتتاۋ دەپ ەسەپتەيمىن», – دەيدى ايماقتىق كينولوگيالىق ورتالىقتىڭ باسشىسى, پولكوۆنيك رىسبەك سماكوۆ.
اڭگىمەلەسۋدەن وتكەن 12 قىزمەتكەردىڭ اراسىنان اتتەستاتتاۋدىڭ قورىتىندىسى بويىنشا 2 قىزمەتكەر اتقاراتىن مەملەكەتتىك لاۋازىمىنا ساي دەپ تانىلىپ لاۋازىمىن جوعارىلاتۋعا ۇسىنىلدى, ال 10 قىزمەتكەر اتقاراتىن مەملەكەتتىك لاۋازىمىنا ساي كەلدى.
ارمان وكتيابر,
«ەگەمەن قازاقستان»