قازاقستان پاۆيلونىنىڭ رەسمي وپەراتورى - «ۇلتتىق كينەماتوگرافيا ونەرى مەن عىلىمدارىنىڭ اكادەمياسى» قوعامدىق بىرلەستىگى (قب). اتالعان قب 70-ءشى كانن حالىقارالىق كينوفەستيۆالىندە ەلىمىزدىڭ كينويندۋسترياسىن تانىستىرماق. ءبىرىنشى قازاقستاندىق پاۆيلون «Le Village International» كينونارىعى اۋماعىندا فەستيۆالدەر سارايى قاسىندا بولادى.
19 مامىر كۇنى فرانتسيانىڭ ۇلتتىق كينەماتوگرافيا ورتالىعىنىڭ الاڭىندا قازاقستان پاۆيلونىنىڭ اشىلۋىنا وراي رەسمي قابىلداۋ شاراسى وتپەك. باعدارلامادا كامەرالىق ىشەكتى ءانسامبلدىڭ سۇيەمەلدەۋىمەن ايمان مۇساقوجاەۆا مەن ديماش قۇدايبەرگەن ونەر كورسەتەدى.
وعان كانن كينوفەستيۆالى مەن كينونارىعىنىڭ قوناقتارى, قىزمەتشىلەرى, فرانتسياداعى قر ەلشىلىگىنىڭ وكىلدەرى, كوكشىل جاعالاۋداعى مۋنيتسيپالدى بيلىكتەر مەن كينوكوميسسيالاردىڭ وكىلدەرى شاقىرىلعان.
«قازاقستان ۇلتتىق پاۆيلونى - كانن كينونارىعىندا قازاقستاندىق كينەماتوگرافيستەردىڭ جۇمىس ىستەۋىنە ارنالعان الاڭ. وپەراتور رەتىندەگى كينواكادەميانىڭ مىندەتى, ەلىمىزدىڭ كينويندۋسترياسىنىڭ قاتىسۋشىلارىنا, ونىڭ ىشىندە كينووندىرۋشىلەرگە, پروكات جاساۋشىلارعا, رەنتال ستۋديالارعا, كينوجەلىلەرگە پاۆيلوندى پايدالانۋعا مۇمكىندىك تۋعىزۋ», - دەدى كينواكادەميا پرەزيدەنتى راشيد نۇعمانوۆ.
ەڭ الدىمەن, پاۆيلون اۋماعىندا كاسىبي كەزدەسۋلەر وتكىزىلىپ, فيلمدەردى, جوبالاردى ىلگەرىلەتۋ مەن قىزمەتتەر جونىندە كەلىسسوزدەر جۇرگىزۋگە جول اشىلماق.