القالى جيىندى ايماق باسشىسى قۇمار اقساقالوۆ كىرىسپە سوزبەن اشىپ, ەلباسىنىڭ اۋىل شارۋاشىلىعى داقىلدارىن ءارتاراپتاندىرۋ جونىندەگى تاپسىرمالارىن ەسكە سالدى. وڭىردە بيىل 4 ميلليون 377,5 مىڭ گەكتار جەرگە ورنالاستىرىلاتىن اۋىل شارۋاشىلىق داقىلدارىنىڭ 3 ميلليون 117,8 مىڭ گەكتارىن ءداندى جانە بۇرشاق داقىلدارى قۇرايدى. مايلى داقىلدار 700 مىڭ گەكتارعا دەيىن ۇلعايتىلعان.
كەڭەستە كەيبىر اگروقۇرىلىمداردىڭ توپىراق قۇنارلىعىن ارتتىرۋ, اۋىسپالى ەگىس جۇيەسىن ساقتاۋ جۇمىستارىن ءوز دەڭگەيىندە جۇرگىزە الماي وتىرعانى اشىپ ايتىلدى. 4 جانە 5 سۇرىپتى ءداندى جانە بۇرشاقتى داقىلدار تۇقىمىن جوعارى ونىمدىلىك تۇرلەرىنە اۋىستىرۋ دا – كوكەيتەستى ماسەلەلەردىڭ ءبىرى. ەگىس ناۋقانىنا قاجەتتى جانار-جاعارماي الۋ جايى دا كوڭىل كونشىتپەيدى. قاجەتتى 65 مىڭ توننا ديزەل وتىنىنىڭ جارتىسىنا عانا شارت جاسالعان. مينەرالدى تىڭايتقىشتار الۋدا شارۋاشىلىقتاردىڭ 9 پايىزى عانا كەلىسىمگە قول جەتكىزگەن.
وسىنداي وزەكتى ماسەلەلەردى تىلگە تيەك ەتە كەلىپ, وبلىس اكىمىنىڭ ءبىرىنشى ورىنباسارى ايداربەك ساپاروۆ وڭىرىمىزدە «سىباعا», «قۇلان», «التىن اسىق» باعدارلامالارى ارقىلى مال باسى كوبەيگەنمەن, تۇرعىنداردى جىل بويى جۇمىسپەن قامتۋدا ءتۇيىندى ماسەلەردىڭ بارىن جاسىرمادى.
ا.ي.باراەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ ديرەكتورى جەكسەنباي قاسقىرباەۆ سەپتەريوز اۋرۋىنىڭ ءورشۋى سالدارىنان مول استىقتىڭ 30-70 پايىزىنان ايرىلاتىنىمىزدى كولدەنەڭ تارتتى. اۋىل شارۋاشىلىعى قۇرىلىمدارى ماماندارىنىڭ بىلىكتىلىگىن جەتىلدىرۋگە, كاسىبي شەبەرلىگىن ارتتىرۋعا ءمان بەرىلمەگەندىكتەن, عىلىم جەتىستىكتەرى مەن جاڭالىقتار ەسكەرىلمەي جاتادى.
سينوپتيكتەر بيىل اۋا رايى قۇبىلمالى بولادى دەگەن بولجام جاساپ وتىر. سوندىقتان كوكتەمنىڭ ءار كۇنىن ۇتىمدى پايدالانعان ماڭىزدى.
«سوڭعى جىلدارى اۋىل شارۋاشىلىعى قۇرىلىمدارىن قولداۋعا «اگروونەركاسىپ كەشەندەرىن دامىتۋ» باعدارلاماسى اياسىندا 240 ميلليارد تەڭگە بولىنگەن. الايدا, بىلتىر ەڭبەكاقى قورى 13,5 ميلليارد تەڭگەنى عانا قۇراعان. ەڭبەكاقى قورى اۋىل شارۋاشىلىعى سالاسىنا بولىنگەن سۋبسيديا كولەمىنەن ەكى جارىم ەسە از. ءبىر سوزبەن ايتقاندا, مەملەكەت سۋبسيديا ارقىلى سىزدەردىڭ جۇمىسشىلارىڭىزدىڭ ەڭبەكاقىسىن تولەپ وتىر. بولىنگەن قارجىنىڭ ءتيىمدى جۇمسالۋىن باستى نازارعا الۋ قاجەت», – دەدى ق. اقساقالوۆ.
ول اگروقۇرىلىم باسشىلارىنىڭ جۇمىسشىلارىنا لايىقتى ەڭبەكاقى تولەمەي وتىرعانىن, سونىڭ سالدارىنان كادر تۇراقتاماۋشىلىعىن قاتتى سىنعا الدى. اۋدان اكىمدەرىنە اۋىل شارۋاشىلىعى تاۋارىن وندىرۋشىلەرمەن ەڭبەكاقىنى كوتەرۋ ماسەلەسىن شەشۋدى تاپسىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى