العاشقى كۇنى «قازاق ءتىلىنىڭ كرەاتيۆتى وقىتۋدىڭ ۇزدىك ءتاسىلدەرى» دەگەن تاقىرىپتا جوعارى وقۋ ورىندارىنىڭ وقىتۋشىلارى مەن كوللەدج, مەكتەپ مۇعالىمدەرى قازاق ءتىلدى ەمەس توپتارعا شاعىن ساباقتار بەردى. ودان كەيىن ەسسە جازدى. وسى شارانىڭ اراسىندا «قازاق ءتىلى: بۇگىنى مەن بولاشاعى» دەگەن تاقىرىپتا وتكەن دوڭگەلەك ۇستەلدە «USTAZ» ورتالىعىنىڭ ديرەكتورى ن.يمانعاليەۆ, استانا «USTUDY» ورتالىعىنىڭ ديرەكتورى ۇ.قارمىسوۆ, نازارباەۆ ۋنيۆەرسيتەت قاۋىمداستىعىنىڭ پروفەسسورى س.ورازعاليەۆ جوعارعى قۇقىق مەكتەبىنىڭ ديرەكتورى س.پەن سەكىلدى ازاماتتار ۇلت ءتىلىنىڭ كوركەيۋى ۇلت سانىنا دا, ساپاسىنا دا قاتىستى ەكەنىن ايتىپ, قازاقتىڭ كوبەيۋ ماسەلەسىن قوزعادى. جاستاردىڭ ۇلتتى بەكىتۋ, ءتىلدى تەرەڭ ءبىلۋ جونىندەگى پىكىرلەرىنە بەلگىلى قالامگەرلەر ق.جيەنباي مەن ق.ءابىل ءۇن قوسىپ, اعالىق تىلەكتەرىمەن قاناتتاندىردى.
دوڭگەلەك ۇستەلدەن كەيىن وقۋ ورنىنىڭ ءبىرىنشى كۋرس ستۋدەنتتەرى قازاق تاريحىنان العان ءبىلىمدەرىن بەكىتۋ ماقساتىندا ۇيىمداستىرعان «باتالاسۋ» اتتى ساحنالىق قويىلىمدى جيىلعان قاۋىم نازارىنا ۇسىندى. وندا ورداباسىندا ەلدىكتى ساقتاۋ ماقساتىندا سەرتتەسكەن, باتالاسقان قازاق جاقسىلارىنىڭ بەينەسى كورىنىس تاۋىپتى. اسىرەسە, «اقتابان شۇبىرىندىعا» تۇسكەن قازاق حالقىنىڭ اۋىر تاعدىرى سىن ساعاتتا قالعاندا بوگەنباي, قابانباي, جانىبەك, مالايسارى, ەسەت, ناۋرىزباي, بايان, تايلاق باتىرلاردىڭ بىرىگىپ بىلەك بولىپ, تۋعان جەردى جاۋدان بوساتقانى ستۋدەنتتەردىڭ سومداۋىندا كەلىستى شىقتى. مەملەكەتتىك ءتىلدى دامىتۋ قورىنىڭ ديرەكتورى ا.شاۋەەۆ ايتقانداي, ناعىز وتانشىلدىق رۋح وسى دەگىزدى.
ءبىر اتاپ وتەرلىگى, ستۋدەنتتەردىڭ ماماندىقتارى بولەك بولعانىمەن, ۇلتتىق رۋحى مىقتى ەكەن. باتىرلاردىڭ ءمارتەبەسىن ارتتىرۋعا تالپىنىستارى العا قويعان ماقساتتارىنا جەتكىزدى. ولارعا سەرىك بولىپ جۇرگەن ارۋ قىزداردىڭ اقىلدى ارەكەتى كىمدى دە بولسا ويلاندىرماي قويمادى.
تاعى ءبىر ايتارىمىز, تەوريالىق ءبىلىم مەن تاجىريبەنى ۇشتاستىرۋدى ۋنيۆەرسيتەت 2014 جىلدان بەرى جۇرگىزە باستاپتى. ونىڭ باسىندا وقۋ ورنىنىڭ باسشىسى تالعات نارىكباەۆتىڭ تۇرۋى ۇلتتىق سانانىڭ جاڭعىرا باستاعانىن كورسەتسە كەرەك. ستۋدەنتتەر جىل بويى تاريح ءپانىنەن العان تەوريالىق ءبىلىمدەرىن اتا تاريحىمىزدىڭ باستاۋى بولعان جەرلەردە بولىپ, ونداعى ەسكەرتكىشتەرمەن تانىسۋدى داستۇرگە اينالدىرعان. كەيىن, سونىڭ نەگىزىندە ساحنالىق كورىنىستەر قويۋ جاراسىم تاپقان.
الداعى ەكى شارادان كەيىن سىنعا تۇسكەن وقىتۋشىلاردىڭ اراسىنان شىققان ءۇزدىكتەردى ماراپاتتاۋ ءراسىمى ءوتتى. «مۇنداي شارالار الداعى ۋاقىتتا جالعاسىن تابا بەرەدى», – دەيدى ءبىلىم ورداسىنداعى قازاق ءتىلى مەن ادەبيەتىن كرەاتيۆتى وقىتۋ ورتالىعىنىڭ ديرەكتورى كۇلاش شايمەردەنوۆا.
سۇلەيمەن مامەت, «ەگەمەن قازاقستان»