«ءبىرىنشى تالقىلاۋعا ماڭعىستاۋ وبلىسى اكىمدىگى مەن بالىقشىلار قاتىستى. قارسىلىق جوق سياقتى. دەگەنمەن, بۇل ماسەلە ءالى دە ورتاعا سالىنىپ, ۇسىنىس-پىكىرلەر تىڭدالادى. سەبەبى, بۇگىندە وسى ايماقتا بالىق شارۋاشىلىعىمەن اينالىساتىندار از ەمەس», دەدى باسقارما باسشىسى. ول بالىق اۋلاۋعا تىيىم نەمەسە ۋاقىتشا شەكتەۋ سالۋ ءۇشىن بيولوگيالىق نەگىزدەمە كەرەك ەكەنىن العا تارتىپ, جاقىندا وتكەن العاشقى وتىرىستا اتالعان قۇجاتتى ازىرلەۋ تۋرالى شەشىم شىعارىلعانىن جەتكىزدى. سول كەزدە عانا كاسپي تەڭىزىندە بالىق اۋلاۋعا تولىعىمەن تىيىم سالىنادى نەمەسە شەكتەۋ ەنگىزىلەدى. سوندىقتان قازىر ناقتى ناتيجە كۇتىلۋدە.
جيىن بارىسىندا ناريمان ءجۇنىسوۆ ايدىڭ باسىندا اتىراۋداعى «امانگەلدى» وندىرىستىك كووپەراتيۆى ۇستاعان سالماعى 160 كيلو بولاتىن اقسەركە بالىعى جايىندا ايتىپ بەردى. «ءساۋىردىڭ 1-ءى كۇنى اقسەركەنىڭ ۇرعاشىسى ۇستالعان بولاتىن. سالماعى – 160 كيلو. ءساۋىردىڭ 18-ءى كۇنى بالىقتان 30 كيلو 600 گرامم ۋىلدىرىق الىندى. ول شامامەن 1 ميلليون 200 مىڭ دانا ۋىلدىرىق بولادى. ولاردى جاساندى جولمەن ۇرىقتاندىرعاننان كەيىن ينكۋباتسيالىق اپپاراتتارعا ورنالاستىردى. شىلدە ايىندا كادىمگى بالىقتاردى تەڭىزگە جىبەرەتىن بولامىز», دەدى ول.
باسقارما باسشىسىنىڭ ايتۋىنشا, بۇگىندە باتىس قازاقستان وبلىسىندا اقسەركە وسىرەتىن ەكى زاۋىت بار. كاسىپورىندار اعىمداعى جىلى شامامەن 7 ميلليون اقسەركە بالىعىن تەڭىزگە جىبەرۋدى جوسپارلاپ وتىر.
اسحات رايقۇل,
«ەگەمەن قازاقستان»