تۇسىنە بىلگەن ادامعا قازاقستان حالقى اسسامبلەياسىنىڭ ءرولى بۇدان گورى تەرەڭدە ەكەنىنە كەشەگى ءبىر كۇندەرى اقتوبە ايماعىنىڭ كەيبىر بولىكتەرىن تاسقىن مەن توپان سۋ باسقان كەزدە تاعى دا ايقىن كوز جەتكىزە تۇستىك. راسىندا, ءبىز قازاقستان حالقىنىڭ ءبىرلىگى دەگەن ءسوزدى تەكتەن تەك قولدانبايدى ەكەنبىز. ەلىمىزدى مەكەندەيتىن وزگە ەتنوس وكىلدەرىنىڭ مەملەكەت قۇراۋشى ۇلت – قازاقتارعا دەگەن قۇرمەتى مەن ريزاشىلىعى شەكسىز دەپ جۇرگەنىمىز دە ناقتى شىندىق پەن سۋارىلعان اقىل ءسوز ءھام اسىل ءسوز بولىپ شىقتى. شىن مانىندە, ءبىز ءبىر-ءبىرىنەن ىرگەسى بولىنبەيتىن, ەنشىسى ءبىر قازاقستاندىقتار ەكەنبىز.
بۇلاي دەپ جەرىنە جەتكىزە سويلەپ وتىرعان سەبەبىمىز, جوعارىدا ايتىلعانداي, تابيعي اپات ورىن العان كەزدە جەرگىلىكتى ۇلت پەن توقساننان استام ەتنوس وكىلدەرىنىڭ ءبارى تاسقىن سۋدىڭ بەتىن قايتارۋعا ءبىر جاعادان باس, ءبىر جەڭنەن قول شىعارىپ, تاس ءتۇيىن جۇمىلا بىلگەندەرى. جۇمىلا كوتەرگەن جۇك جەڭىل دەگەندەي, اپاتتىڭ تەز ارادا اۋىزدىقتالۋىنا ەڭ الدىمەن اقتوبە وبلىستىق قازاقستان حالقى اسسامبلەياسىنىڭ قۇرامىنداعى ەتنومادەني ءبىرلەستىكتەر, سونداي-اق قوعامدىق كەلىسىم كەڭەستەرى ۇلكەن ۇلەس قوستى. ولاردىڭ تاراپىنان وبلىس جۇرتشىلىعى مەن قالا تۇرعىندارىنا تاستالعان ءجۇرەكجاردى ۇندەۋ جەردە قالعان جوق. ءبارى دە بۇل ۇندەۋدى ءبىردەن قولداپ الىپ كەتتى.
ماسەلە, تەك ۇندەۋ تاستاۋمەن عانا شەكتەلگەن جوق. وڭىرلىك اسسامبلەيا مۇشەلەرى ءتورت كوزدەرى تۇگەل وقيعا ورنىنان تابىلىپ, ولاردىڭ ءبارى سۋ تاسقىنىنان زارداپ شەككەندەردى قاۋىپسىز ايماققا كوشىرۋگە قولۇشىن بەردى. ءارى ءبىر كۇندىك ەڭبەكاقىلارى مەن تابىستارىن تاسقىنعا تاپ بولعانداردىڭ اراسىنداعى تۇرمىس دەڭگەيى تومەن وتباسىلار مەن مۇگەدەك جاندارعا اۋدارۋعا شەشىم قابىلدادى. قازىرگى كۇنى ولار قايىرىمدىلىق شارالارىن ودان ءارى جالعاستىرىپ جاتىر.
ءبىز مۇنداي دەرەكتى ەڭ الدىمەن اقتوبە وبلىستىق قازاقستان حالقى اسسامبلەياسى ءتوراعاسىنىڭ ورىنباسارى, حاتشىلىق مەڭگەرۋشىسى بۇلبۇل ەلەۋسىنوۆانىڭ اۋزىنان ەستىگەندە, اسسامبلەيانىڭ باستى ماقساتىنىڭ ءبىرى قازاق حالقىنىڭ توڭىرەگىنە توپتاسۋ ەكەندىگى ءسوز جۇزىندە ەمەس, ناقتى ءىس جۇزىندەگى توپتاسۋ ەكەنىن تاعى ءبىر تەرەڭىرەك تۇيسىنە ءتۇسكەندەي كۇي كەشتىك. البەتتە, ءبىز بۇگىندە قازاقستاندىق پاتريوتيزم مەن بىرتەكتىلىك ءجونىندە دە ءجيى ايتامىز.
وسى ارادا ءپاتريوتيزمنىڭ ءتۇپ توركىنى تەرەڭدە ەكەنىن, بۇل قاجەت بولعان قيىن دا كۇردەلى جاعدايدا ادامداردىڭ ءبىر-بىرىنە قولۇشىن سوزىپ, اپاتتى جاعدايدان قۇتقارىپ قالۋ ەكەنىن وقىرماندار نازارىنا بەرگەندى ءجون كوردىك. سونىڭ ناقتى مىسالى ءمىنبەردە ايتىلعان ادەمى سوزدەر مەن باياندامالاردان ەمەس, ءومىردىڭ وزىنەن تابىلعانى دا قاستەرلى قۇندىلىق ەمەس پە؟! ءارى بۇگىنگى اڭگىمەمىزدى اسسامبلەيا حاتشىلىعىنان الىنعان ءازىر دەرەكتەردەن ەمەس, جوعارىداعىداي ءمانى مەن ماڭىزى, ءتالىمى مەن تاعىلىمى مول ونەگەلى ءىس-قيمىلدان باستاپ كەتۋىمىزدىڭ باستى ءبىر سىرى دا وسىندا.
اشىعىن ايتقاندا, اقتوبە ايماعىنداعى اسسامبلەيا قىزمەتى سان-الۋان ءىس-شارالارعا عانا ەمەس, سونىمەن بىرگە, اتاپ ايتۋعا تۇرارلىقتاي ءبىرقاتار ەرەكشەلىكتەرگە دە تولى دەۋگە بولادى. ەندىگى كەزەكتە سونىڭ ءبىر-ەكەۋىنە توقتالا كەتكەندى ءجون دەپ سانايمىز. مۇنىڭ ءبىرىنشىسى – ءوڭىردە قوعامدىق كەلىسىم مەن مەدياتسيا كەڭەسىنىڭ جۇيەسى جۇيەلى جولعا قويىلعانى دەۋگە بولادى. مەدياتسيا, ءبىر سوزبەن ايتقاندا, تۇسىنىستىككە كەلە الماعان ەكى تاراپتىڭ سوت ارقىلى ەمەس, ءوزارا تاتۋلاسۋ جولىمەن بىتىمگەرشىلىككە كەلۋى دەگەن ءسوز. بىتىستىرەتىندەر – مەدياتورلار.
مەدياتسيانىڭ وزگەگە ەمەس, ناقتى اسسامبلەياعا تەلىنۋىنىڭ نەندەي سىرى بار دەۋى دە ءمۇمكىن بىرەۋلەر. ورىندى ساۋال. مۇنداعى باستى گاپ, جوعارىدا ايتىلعانداي, ەكى جاقتىڭ مەدياتسيا جۇيەسىنە جۇگىنۋى ارقىلى ءوزارا تاتۋلىق پەن كەلىسىمگە كەلە الۋىندا. ال بۇل ەكەۋى اسسامبلەيا باستى نەگىزدەرىنىڭ ءبىرى ەكەندىگى ايتپاسا دا تۇسىنىكتى. مەدياتسيا كەڭەستەرىنىڭ قازاقستان حالقى اسسامبلەياسىنان قاشىق تۇرمايتىنىڭ باستى سىرى دا وسىندا.
ەكىنشى ەرەكشەلىكتى ءوڭىرلىك اسسامبلەيا قۇرامىنداعى بولگار ەتنومادەني بىرلەستىگىنە قاتىستى بايىپتاۋعا بولادى. ادەتتە, ەلىمىزدەگى مۇنداي ەتنومادەني بىرلەستىكتەردىڭ بەلگىلى ءبىر تۇراقتى ورنى, ياكي كەڭسەسى, سونداي-اق جەكسەنبىلىك مەكتەپتەرىنىڭ بولۋى قالىپتى جاعداي. ايتايىن دەگەنىمىز, وبلىستىق العا اۋدانىندا بولگارلاردىڭ ءوز كەنتى بار ەكەندىگى. بۇل كەنت بولگاركا دەپ اتالادى ەكەن. بولگارلار الەمدە قازاقستانعا جەتەتىن مەملەكەت, ءدال وسىنداي جەر ءجانناتى مەن جۇماق جوق. قازاق حالقىنداي قۇشاعى كىم-كىمگە دە ايقارا اشىق ءبىر دە ءبىر حالىق جوق. قازاقستان – ءوز وتانىمىز. ءبىزدىڭ ماقساتىمىز – ەلىمىزدىڭ ودان ءارى ءوسىپ-وركەندەۋىنە ءوز ۇلەسىمىزدى قوسۋ, دەيدى.
ۇزىن ءسوزدىڭ قىسقاسى, كەڭەسىپ پىشكەن توڭ كەلتە بولماس, دەيدى دانا حالقىمىز. اقتوبە ايماعىندا كوپ ماسەلەلەردىڭ ءتۇيىنى ءوزارا كەلىسىپ ءارى كەڭەسە وتىرىپ شەشىلىپ جۇرگەنى باستى تابىس, باستى رۋحاني قۇندىلىق ەكەنى باسى اشىق اقيقات.
تەمىر قۇسايىن,
«ەگەمەن قازاقستان»
اقتوبە وبلىسى
سۋرەتتە: وڭىرلىك اسسامبلەيا عيماراتى الدىندا