ەلباسىنىڭ: «قازاق دالاسىندا سان ءتۇرلى ۇلت وكىلدەرى قونىس تەپكەن. تەگى باسقا بولعانىمەن تەڭدىگى ءبىر, قانى بولەك بولعانىمەن جانى ءبىر, ارمانى ورتاق ءبىرتۇتاس حالىققا اينالدىق» – دەگەن ءسوزى جادىمىزدا جاتتاۋلى. سوندىقتان, كەڭبايتاق قازاق جەرىنىڭ قاي وڭىرىندە ءومىر سۇرەيىك, ماقساتىمىز ورتاق, ارەكەتىمىز بەن مۇددەمىز ءبىر. مىسالى, وڭتۇستىك قازاقستان وبلىسىندا 35 مىڭنان استام تاجىك ەتنوسىنىڭ وكىلدەرى تۇرادى. ولاردىڭ بارلىعى, ونىڭ ىشىندە مەن دە وسى ەلدىڭ پاتريوتىمىز. جۇرەگىم دە, كوڭىلىم دە قازاق جەرى دەپ سوعادى. ونىڭ بولاشاعى – مەنىڭ دە بولاشاعىم. ەگەر مەملەكەتىمىزدىڭ ەكونوميكاسى نىعايسا, وسى جەردە عۇمىر كەشىپ جاتقان بارلىق حالىقتاردىڭ دا ءال-اۋقاتى, تۇرمىس جاعدايلارى جاقساراتىندىعى بەلگىلى.
وسى ورايدا, مەملەكەت باسشىسى ن.نازارباەۆتىڭ تاپسىرماسى بويىنشا ۇكىمەت ىسكە اسىرۋعا كىرىسكەن «ءناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسىنىڭ ەل تۇرعىندارىنا بەرەرى مول. ەڭبەككە قابىلەتتى ازامات ءوزىنىڭ كۇش-قۋاتىن ەلدىڭ دامۋىنا ۇلەس قوسۋ ءۇشىن, ءتىپتى, ءوز وتباسى تۇرمىسىن جاقسارتۋ ءۇشىن قاي وڭىردە بولسىن جۇمىس ىستەۋگە دايىن بولۋى ءتيىس. مىنە وسى تۇرعىدان العاندا حالقى تىعىز ورنالاسقان, دەموگرافيالىق ءوسىمى جوعارى وڭتۇستىك ءوڭىرىنىڭ ەڭبەككە بەلسەندى ازاماتتارى اراسىندا سولتۇستىك وبلىستاردا جۇمىس ىستەۋگە نيەت بىلدىرۋشىلەر كوبەيىپ كەلەدى. كۇنى كەشە وبلىس اكىمدىگىنىڭ, ءتيىستى مينيسترلىكتىڭ ۇيىمداستىرۋىمەن سارىاعاش, ماقتاارال اۋداندارىندا وتكەن ءىس-شارالار جەرگىلىكتى تۇرعىندارعا ناقتى باعىت-باعدار بەردى. وڭتۇستىككە ارنايى كەلگەن قوستاناي, پاۆلودار, سولتۇستىك قازاقستان, شىعىس قازاقستان وبلىستارىنىڭ وكىلدەرى كوپتەگەن ۇسىنىستار ايتتى. وڭىرلەردەگى جاعدايمەن جاقىن تانىستىرىپ, بوس جۇمىس ورىندارى جونىندە كەڭ ماعلۇمات بەردى. ماقتاارال اۋدانى تۇرعىندارىنىڭ قىزىعۋشىلىعىن تۋدىردى. بولە جارعانىم ەمەس, ءسولتۇستىك وڭىرلەرگە بارىپ جۇمىس ىستەۋگە نيەت ءبىلدىرىپ وتىرعان تاجىك باۋىرلارىمنىڭ قاتارى كوبەيدى. وتباسىمىزبەن, اۋلەتىمىزبەن بىرگە كوشىپ بارساق دەپ وتىرعان تاجىك جاستارى كوپ. ۇكىمەت, جەرگىلىكتى اكىمدىك جەر تەلىمدەرىن بەرەمىز, جۇمىسپەن قامتاماسىز ەتەمىز, العاشقى كەزدە جاعداي جاسايمىز دەپ وتىرسا, نەگە بارماسقا؟! ەندى الداعى ۋاقىتتا ماقتاارال اۋدانىنىڭ اكىمى عالىم ىبراي ۇلى ءىس-شارا جوسپارىن جاساپ, سوعان سايكەس جۇمىس ورىندارىن ۇسىنىپ وتىرعان وبلىستارداعى جاعدايمەن تانىسىپ قايتپاقپىز. بارىپ كەلگەن سوڭ ەڭبەككە بەلسەندى ازاماتتاردى, جاستاردى سول جاققا جۇمىسقا الىپ بارۋعا كىرىسەمىز. كوشۋگە نيەتتىلەردىڭ اراسىندا اۋىل شارۋاشىلىعى سالاسى بويىنشا ماماندىق العان جاستار دا كوپ. جەر بولىنسە, تەر توگىپ ەڭبەگىنىڭ جەمىسىن كورگىسى كەلەتىن ديقاندار دا از ەمەس. مادەنيەت, ءبىلىم, سپورت سالاسىندا ەڭبەك ەتكىسى كەلەتىندەر دە بارشىلىق. جوعارىدا ايتىپ ءوتكەنىمدەي, ماقتاارال اۋدانىندا حالىق تىعىز ورنالاسقان. ونىڭ ىشىندە, 9-10 ۇل-قىز تاربيەلەپ وتىرعان كوپبالالى تاجىك وتباسىلارى كوپ. ولاردىڭ بارلىعىنا اۋداندا جۇمىس تابىلا بەرمەيدى. سوندىقتان دا, ەلىمىزدىڭ وزگە وڭىرلەرىندە ەڭبەك ەتۋگە قۇلشىنىس تانىتۋدا. قىسقاسى, حالقى تىعىز ورنالاسقان ايماقتاعى جۇمىس كۇشىن وزگە وڭىرلەر ارقىلى ءتيىمدى پايدالانۋدى كوزدەپ وتىرعان ەڭبەك جانە حالىقتى الەۋمەتتىك قورعاۋ مينيسترلىگىنىڭ, وبلىس اكىمدىكتەرىنىڭ بۇل باستامالارى جەرگىلىكتى جەرلەردە قولداۋ تابۋدا.
جولداس سۇلتانوۆ,
«وڭتۇستىك قازاقستان وبلىستىق تاجىك مادەني ورتالىعى» قوعامدىق بىرلەستىگى توراعاسىنىڭ مىندەتىن اتقارۋشى