پارلامەنت سەناتى اپپاراتىنىڭ باسشىسى سەرىك سىدىقوۆ باستاعان قازاقستان دەلەگاتسياسى باس حاتشى م.-ل.پااۆولامەن جانە ەدۋسكۋنتانىڭ قۇرىلىمدىق بولىمشەلەرى مەن تۇراقتى كوميتەتتەرىنىڭ باسشىلارىمەن كەزدەستى. ودان باسقا, س.سىدىقوۆتى قازاقستانمەن پارلامەنتتىك دوستىق توبىنىڭ ءتوراعاسى, فينليانديا رەسپۋبليكاسىنىڭ بۇرىنعى سىرتقى ساۋدا جانە دامۋ ءمينيسترى ل.تويۆاككا, «سيترا» فين يننوۆاتسيا قورى بايقاۋ كەڭەسى توراعاسىنىڭ ورىنباسارى و.الا-نيسسيليا جانە فينليانديا ەكونوميكا ءمينيسترىنىڭ كەڭەسشىسى م.حالونەنمەن بىرگە باسقا دا بىرقاتار زاڭ شىعارۋشىلار قابىلدادى.
كەلىسسوزدەر بارىسىندا س.سىدىقوۆ فين تاراپىن پرەزيدەنت ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا ايتىلعان ەلىمىزدىڭ دامۋىنداعى باسىمدىقتارمەن جان-جاقتى تانىستىردى, سونداي-اق كونستيتۋتسيالىق رەفورمالاردىڭ بارىسى مەن مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىندا مازمۇندالعان جاڭارۋلاردان حاباردار ەتتى.
يننوۆاتسيالىق بەلسەندىلىككە, شاعىن جانە ورتا بيزنەس پەن يندۋستريالىق-يننوۆاتسيالىق قىزمەتتى قولداۋعا نازار اۋدارا وتىرىپ, پارلامەنتتىڭ زاڭ شىعارۋدى قامتاماسىز ەتۋ سالاسى بويىنشا پىكىر الماستى جانە ءتاجىريبە ءبولىسۋ تۇرعىسىندا اڭگىمە ورىستەدى.
ءىس جۇزىندەگى تاقىرىپتارعا ەرەكشە نازار اۋدارا وتىرىپ, تاراپتار ىنتىماقتاستىقتى قالىپتاستىرۋعا جانە كادر ساياساتى ماسەلەلەرى بويىنشا ء تاجىريبە الماسۋعا, زاڭ شىعارۋ قىزمەتىن اقپاراتتىق-تالداۋمەن قامتاماسىز ەتۋگە مۇددەلىلىك ءبىلدىردى.
مادەني-گۋمانيتارلىق ءىس-قيمىلدى كەڭەيتۋ ماقساتىندا جانە قازاقستان مەن فينليانديا اراسىنداعى ديپلوماتيالىق قاتىناستار ورناعانىنا 25 جىل تولۋىنا وراي (13 مامىر) جانە فينليانديا تاۋەلسىزدىگىنىڭ 100 جىلدىعىنا بايلانىستى حەلسينكيدە «اناعا جول» ءفيلمىنىڭ تۇساۋكەسەرى بولدى. پارلامەنت دەپۋتاتى, فين ەلىنىڭ دامۋ ماسەلەلەرى جونىندەگى بۇرىنعى ءمينيسترى پ.حااۆيستو بۇل شارانىڭ قۇرمەتتى مەيمانى بولدى. پارلامەنت مۇشەلەرى, فينليانديانىڭ سىرتقى ىستەر مينيسترلىگى مەن باسقا دا مەملەكەتتىك ورگاندارىنىڭ, ديپلوماتيالىق كورپۋستاردىڭ, قازاقستاندىق دياسپورانىڭ وكىلدەرى, سونداي-اق فينليانديادا وقيتىن ەلىمىزدىڭ ستۋدەنتتەرى قاتىستى.
ساپار بارىسىندا فينليانديا پارلامەنتىنىڭ جانىنان قۇرىلعان «سيترا» فين يننوۆاتسيا قورىنىڭ شتاب-پاتەرىندە كەزدەسۋلەر بولدى. بۇل بەدەلدى مەملەكەتتىك قۇرىلىم ەلدىڭ يننوۆاتسيالىق جانە عىلىمي-تەحنيكالىق دامۋ ستراتەگياسىمەن 50 جىل اينالىسىپ كەلەدى. قازاقستان دەلەگاتسياسى يننوۆاتسيالىق ينفراقۇرىلىمدى قۇرۋ, تەحنولوگيالىق پاركتەر مەن يننوۆاتسيالىق دامۋ ينستيتۋتتارىن باسقارۋ جونىندەگى فين تاجىريبەسىن زەردەلەدى. تۋركۋ قالاسىنداعى تەكەس تەحنولوگيا جانە يننوۆاتسيا اگەنتتىگىندە جانە عىلىمي پاركتە بولعان كەزدە دەلەگاتسيا ستارتاپ كومپانيالار مەن شاعىن جانە ورتا بيزنەس كاسىپورىندارىنىڭ جوبالارىن قارجىلاندىرۋ, جەتەكشى فين تەحنوپاركتەرى ءبىرىنىڭ قىزمەتىن باسقارۋ تاجىريبەلەرىمەن تانىستى.
پورۆوو جانە تۋركۋ قالالارىنداعى مۋنيتسيپاليتەتتەردىڭ باسشىلىعىمەن كەزدەسۋ بارىسىندا قازاقستاندىق تاراپقا ايماقتاعى يننوۆاتسيالىق قاۋىمدار مەن الدىڭعى قاتارداعى تەحنولوگيالىق جوبالاردى ەنگىزۋ تاجىريبەسى كورسەتىلدى. فين جاعى بيزنەس ينفراقۇرىلىمىنداعى «سمارت» ۇيىمداستىرۋداعى جاڭالىقتارىمەن, تەحنولوگيالىق پاركتەرىن دامىتۋ جانە يننوۆاتسيانى مەملەكەتتىك قولداۋ ءتاجىريبەسىمەن ءبولىستى.