زاڭ جوباسىمەن ەلىمىزدىڭ بيۋدجەت كودەكسىنە, «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسكە (سالىق كودەكسى) جانە «دەنە شىنىقتىرۋ جانە سپورت تۋرالى» زاڭعا وزگەرىستەر مەن تولىقتىرۋلار ەنگىزىلەدى. اتاپ ايتقاندا, ۇلتتىق وليمپيادا كوميتەتىنە 2018 جىلعى 1 قاڭتاردان باستاپ دەنە شىنىقتىرۋ جانە سپورت سالاسىنداعى مەملەكەتتىك تاپسىرمانى الۋعا جانە وعان قاتىسۋعا قۇقىق بەرۋدى كوزدەيدى. سونداي-اق سپورت تۇرلەرىن سارالاۋ جۇيەسىن ەنگىزۋ ۇسىنىلدى. ۋاكىلەتتى ورگان مەن جەرگىلىكتى اتقارۋشى ورگاندارعا قوسىمشا مىندەتتەر بەرىلەدى.
زاڭ جوباسىنداعى بىرقاتار ەرەجەلەر بويىنشا قىزۋ پىكىرسايىس ورىستەدى. سەناتورلار جابال ەرعاليەۆ پەن ءالي بەكتاەۆ شەتەلدىك لەگيونەرلەردى تارتۋعا كەتەتىن ەلەۋلى قارجىنىڭ شىعىسىنا الاڭداۋشىلىق ءبىلدىردى. دەپۋتاتتاردىڭ ايتۋىنشا, ايماقتارداعى سپورتتى قارجىلاندىرۋعا بولىنەتىن قارجىنىڭ 40-50 پايىزى كاسىبي فۋتبول توپتارىنا بەرىلەدى. دەگەنمەن, دەنە شىنىقتىرۋ جانە سپورت سالاسىنداعى فۋتبول مەن سپورتتىڭ كەيبىر باسقا تۇرلەرىنىڭ ناتيجەسى تومەن دەڭگەيدە قالىپ وتىر.
ءبىزدىڭ ەلىمىزدەگى لەگيونەرلەرگە بولىنەتىن قارجىنىڭ جالپى سوماسى تۋرالى دەپۋتات ۆلاديمير رەدكوكاشيننىڭ قويعان ساۋالىنا دەنە شىنىقتىرۋ جانە سپورت ءمينيسترىنىڭ ورىنباسارى ساكەن مۇسايبەكوۆ ناقتى جاۋاپ ايتا المادى. ءمينيستردىڭ ورىنباسارى كاسىبي فۋتبول كلۋبتارى بيۋدجەتىنىڭ جابىقتىعىن ايتا وتىرىپ, كلۋبتاردىڭ مەملەكەت قارجىسى ەسەبىنەن قارجىلاندىرىلاتىنىن جەتكىزدى. مينيسترلىك وكىلى سپورتتىڭ جەكەلەگەن تۇرلەرى تۇرلەرى بويىنشا لەگيونەرلەردى تارتۋ ءوزىن ءوزى اقتاعانىن ايتتى.
سەناتورلار جابال ەرعاليەۆ, ءالي بەكتاەۆ جانە سەرىك بەكتۇرعانوۆ ۇلتتىق سپورت تۇرلەرىن قولداۋعا شاقىرىپ, دارىندى بالالارعا ارنالعان وبلىستارداعى سپورتتىق مەكتەپ-ينتەرناتتارعا قالعان قارجىنى بەرۋ داعدىسىنا نازار اۋداردى.
پىكىرسايىستى قورىتىندىلاي كەلىپ, الەۋمەتتىك-مادەني دامۋ جانە عىلىم كوميتەتىنىڭ توراعاسى بىرعانىم ءايتىموۆا قابىلدانعان ەرەجەلەر وسى سالانىڭ ايقىندىعىن قاماتاماسىز ەتەتىنىنە, وليمپيالىق جانە پاراوليمپيالىق قوزعالىستاردى, ۇلتتىق سپورت تۇرلەرىن دامىتۋعا قىزمەت ەتەتىنىن ءۇمىت ارتاتىنىن جەتكىزدى.
زاڭ جوباسى پالاتانىڭ قاراۋىنا جىبەرىلدى.