«جىل سايىن وتەتىن جارىسقا بىرنەشە جىلدان بەرى ءجۇزۋ سپورتى دا قوسىلدى. ىشكى ىستەر دەپارتامەنتى قىزمەتكەرلەرىنىڭ جاتتىعۋى ءۇشىن بارلىق جاعداي جاسالعان. زاماناۋي تير, مىلتىق اتۋدان نۇسقاۋشى, جۇزۋگە باسسەين بار», دەيدى «دينامو» دەنەشىنىقتىرۋ-سپورت قوعامىنىڭ وبلىستىق فيليالى توراعاسىنىڭ ورىنباسارى, زاپاستاعى پوليتسيا پولكوۆنيگى ۆيكتور چەرنياۆسكي.
ءۇشسايىس جارىسىنداعى مىلتىق اتۋدان پوليتسيا لەيتەنانتى ازامات بايماعامبەتوۆ ۇزدىك كورسەتكىشكە جەتتى. جارىستىڭ ەكىنشى ساتىسى – 50 جانە 100 مەترگە ەركىن جۇزۋدەن پوليتسيا مايورى تايىر اقانوۆ ارىپتەستەرىنە دەس بەرمەدى. جارىستىڭ ءۇشىنشى ساتىسىنداعى ۇزىندىققا سەكىرۋدەن پوليتسيا مايورى ميراسبەك اقمۇحامبەتوۆ جاقسى كورسەتكىشكە جەتتى.
تورەشىلەر جارىسقا قاتىسقانداردىڭ جاسى بويىنشا بارلىق ۇپاي ساندارىن جيناپ, جۇلدەلى ورىندارىن بەلگىلەدى. جارىس پوليتسەيلەر ءۇشىن تەك جۇلدەلى ورىن الۋىمەن ەمەس, ءوز قىزمەتى ءۇشىن شەبەرلىگىن شىڭداۋ بولىپ تابىلادى. سوندىقتان پوليتسەيلەر ۇشسايىسقا قاتىسۋدى ءوزىنىڭ بىلىكتىلىگىنىڭ ارتقانى دەپ بىلەدى.
ءنازيرا جارىمبەتوۆا,
«ەگەمەن قازاقستان»
قوستاناي