بۇل جايىندا وبلىستىق كاسىپوداق ۇيىمىنىڭ توراعاسى عاني قارابەكوۆ بىلاي دەگەن:
− شىمكەنت – اتاۋىنىڭ ءوزى ايتىپ تۇرعانداي جاسىل قالا. بىراق, قالا ورتالىعىنداعى پاركتەر, سكۆەرلەردىڭ ىشىنە قۇرىلىس جۇرگىزىلىپ, جاسىل قالا دەگەن مارتەبەسىنەن ايىرىلىپ قالا جازدادى. سوندىقتان, وبلىس اكىمى جانسەيىت تۇيمەباەۆ قالا كوشەلەرىن اباتتاندىرۋ ماسەلەسىنە ايرىقشا كوڭىل بولۋدە. ساياباقتار سانىن كوبەيتۋ ءۇشىن «شاتقال» باعدارلاماسىن قابىلداپ, بۇگىنگە دەيىن 400 مىڭعا جۋىق كوشەت وتىرعىزىلدى.
وسىنداي يگى ىستەن كاسىپوداق ۇيىمى قالاي شەت قالادى. جول بويىندا اعاشتار وسكەنىمەن, جيەگىندەگى جەر تومپەشىك, ويلى-قىرلى بولىپ, جابايى ءشوپ ءوسىپ, قالانىڭ ءارىن قاشىرۋدا. ادامدار «مىنانى ۇكىمەت نەمەسە وبلىس قاشان قولعا الادى؟» دەپ كەتپەننىڭ سابىنان قاراۋىل قاراماي, وزدەرى ىسكە كىرىسۋى كەرەك. ءبىر ۇيلەرگە باراسىڭ, اۋلاسى بوتانيكالىق باق, سىرتقا اتتاپ شىقساڭ اينالاسى ايتاقىر. ءبىر قالادا تۇرىپ جاتقان سوڭ سەنىكى, مەنىكى بولماي, تازالىعى, ادەمىلىگى ءۇشىن پاتريوتتىق سەزىممەن جۇمىس جاساۋ كەرەك. ءبىزدىڭ باستامامىزدىڭ ماقساتى وسى. سول سەبەپتى, «گۇلدى قالا» دەگەن ۇرانمەن گۇل وتىرعىزۋ اكتسياسىن باستاپ كەتتىك.
وبلىستىق كاسىپوداق ۇيىمى مەن سالالىق كاسىپوداق وداقتارىنىڭ كۇش سالۋىمەن بۇل كۇنى قازىبەك بي جانە جەلتوقسان, ءا.جىلقىشيەۆ كوشەلەرىنىڭ قيىلىسىنداعى ارىق اتىزدار تازالاندى, تروتۋار جيەگىندەگى جەر تەگىستەلىپ, گۇلدەر ەگىلدى.
– «ءبىز وسىندا تۇرامىز». ءاربىر شىمكەنتتىك ءوز قالاسى ءۇشىن وسىنداي ماقتانىش سەزىمدە بولۋ كەرەك, – دەيدى كاسىپوداق ۇيىمىنىڭ ءتوراعاسى. – ءبىزدىڭ بۇل اكتسيامىز ءبىر كۇندىك ەمەس, ءار سەنبى سايىن ءوزىمىزدىڭ اۋلامىزعا سەنبىلىك جاسايمىز. ءبىز بۇگىنگى اكتسيانى ءارى قاراي جالعاستىرۋ ءۇشىن وبلىستىق كاسىپكەرلەر پالاتاسىنا ۇسىنامىز. ولار ءارى قاراي باسقا مەكەمەگە تابىستايدى. ادامداردىڭ بىرلەسە كۇش سالۋىنان كەيىن شىمكەنت ناعىز جاسىل قالاعا, گۇلگە ورانعان ادەمى قالاعا اينالادى.
مۇنداعى ۇلكەن ماقسات – ەلباسىنىڭ ۇلتتىق جاڭعىرۋ جونىندەگى «ەگەمەندە» جاريالانعان ماقالاسىنا تۋعان جەرىن تۇلەتكەن ازاماتتاردىڭ جاۋابى. ءبىز اڭگىمەگە تارتقان كاسىپوداق مۇشەلەرى ءسوزىنىڭ ءتۇيىنى وسىعان سايادى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى