بوكس كەشى قىتايدىڭ سانە قالاسىندا ءوتتى. جەرلەستەرىمىز جيناقىلىق تانىتىپ, 3:2 ەسەبىمەن جەڭىسكە جەتتى.
الدىمەن شارشى الاڭعا 52 كيلوداعى بوكسشىلار كوتەرىلدى. نۇرلان اقۇرپەكوۆ ءانۋار مۇزاپپاروۆقا سەنىم ارتقان ەكەن. وكىنىشكە قاراي, ءانۋار سەنىمدى اقتاي العان جوق. قىتايلىق قارسىلاسى گۋو جاننان جەڭىلىپ قالدى.
گۋو جان – ءانۋار مۇزاپپاروۆ – 3:0 (49:46, 49:46, 49:46).
وسى ماۋسىمدا جانكۇيەرلەردى جەلپىندىرىپ جۇرگەن جىگىتتەردىڭ ءبىرى زاكىر سافيۋللين. شىمكەنتتىك سايىپقىران 60 كيلودا جۇدىرىقتاسىپ, سەن ۆاندى ساباسىنا ءتۇسىردى. وسىلايشا تارازى باسى تەڭەستى.
سەن ۆان – زاكىر سافيۋللين – 1:2 (46:49, 46:49, 48:47).
قازاق بوكسشىلارىنىڭ 69 كيلودا وزگەلەرگە ۇتىلۋى سيرەك ەكەنىن كوزىقاراقتى جانكۇيەر جاقسى بىلەدى. ءدال وسى سالماقتا ءتورت ءبىردەي وليمپيادانىڭ التىنىن ەنشىلەگەن ءبىزدىڭ وعلاندار باسقا جارىستا دا جەڭىلە قويمايتىن. بىراق بۇل جولى اۋليەاتا ءوڭىرىنىڭ تۋماسى اسلانبەك شىمبەرگەنوۆ حۋريچابيليگتەن ايلاسىن اسىرا المادى.
ريچابيليگە حۋريچابيليگ – اسلانبەك شىمبەرگەنوۆ – 3:0 (49:48, 49:48, 49:48).
ەسەسىنە, ارمان رىسبەك باپكەرلەر شتابى مەن جانكۇيەرلەردىڭ ءۇمىتىن اقتادى. بۇعان دەيىن تارازدا رەسەيلىك پاۆەل سيلياگيندى قاپى قالدىرعان ارمان بۇل جولى ليد ۆاندى نوكاۋتقا ءتۇسىرىپ, ەسەپتى ەكىنشى رەت تەڭەستىردى. ارمان رىسبەك ءدال قازىر سپورتتىق بابىندا ءجۇر. ۇلتتىق قۇراما باپكەرلەرى وسى بوكسشىنىڭ الەۋەتىن ەسكەرىپ, الەم چەمپيوناتىنا اپارسا دا بولار ەدى.
ليد ۆان – ارمان رىسبەك (رىسبەك 1-راۋندتا تەحنيكالىق نوكاۋتپەن ۇتتى).
سوڭعى شەشۋشى كەزەڭدە كەرەكۋلىك ولجاس بوقاەۆ كومانداعا جەڭىس سىيلادى. ول جيباو ۆاندى ءتورتىنشى راۋندتا تەحنيكالىق نوكاۋتپەن ۇتتى.
جياباو ۆان – ولجاس بوقاەۆ (بوقاەۆ 4-راۋندتا تەحنيكالىق نوكاۋتپەن ۇتتى).
سونىمەن, توپتىق كەزەڭدى ءبىرىنشى ورىنمەن اياقتاعان «استانا ارلاندارى» ءتۋرنيردىڭ كەلەسى كەزەڭىنە جولداما الدى.
ايتا كەتەيىك, WSB اياسىنداعى جەتىنشى ماۋسىمنىڭ توپتىق كەزەڭىندە 12 كوماندا ونەر كورسەتتى. ولار ءۇش قۇرلىق بويىنشا ءبولىندى. توپتىق كەزەڭنىڭ قورىتىندىسى بويىنشا كەلەسى كەزەڭگە ءار توپتان ۇزدىك كوماندا عانا شىعادى. ازيا قۇرلىعىنىڭ توبى ەڭ قيىنى بولعاندىقتان, بۇل جولى ەكى كومانداعا مۇمكىندىك بەرىلدى. ال ەۋروپا مەن امەريكا قۇرلىعىنان تەك ءبىر كوماندا عانا پلەي-وفف كەزەڭىنە جولداما الدى.
بەك تولەۋوۆ,
جۋرناليست
استانا