كورەيالىق دەلەگاتسيانى ەلدىڭ مەملەكەتتىك باسقارۋ جانە ىشكى ىستەر ۆيتسە-ءمينيسترى سونگ-رەل كيم باسقارىپ كەلسە, قازاقستاندىق دەلەگاتسياعا اقپارات جانە كوممۋنيكاتسيالار ءمينيسترى داۋرەن اباەۆ جەتەكشىلىك جاسادى. كەزدەسۋ بارىسىندا تاراپتار ەلەكتروندى ۇكىمەت سالاسىنا قاتىستى ءوزارا ىنتىماقتاستىقتى تەرەڭدەتۋ مۇمكىندىكتەرىن قاراستىردى. «تسيفرلى قازاقستان» باعدارلاماسى اياسىندا مەملەكەتتىك-جەكە مەنشىك ارىپتەستىك مودەلى بويىنشا بىرلەسكەن جوبالاردى ازىرلەۋگە قاتىستى كەلىسسوزدەر جۇرگىزۋ تۋرالى ۋاعدالاستى.
ەلىمىزدىڭ اقپارات جانە كوممۋنيكاتسيالار ءمينيسترى داۋرەن اباەۆ اتاپ وتكەندەي, بۇل سەمينار وتكەن جىلدىڭ قاراشا ايىندا بۋسان قالاسىندا جاسالعان مەموراندۋمنان كەيىنگى ارالىقتا وتكىزىلىپ وتىرعان العاشقى شارا. الداعى ۋاقىتتا وسى تەكتەس باسقا دا شارالاردى ۇيىمداستىرۋ جوسپارلانعان.
كەزدەسۋ بارىسىندا داۋرەن اباەۆ:
– بۇگىندە قازاقستاندا ەلەكتروندى ۇكىمەتتىڭ ينفراقۇرىلىمى جاسالدى, بازالىق كومپونەنتەرى ىسكە قوسىلدى. سونىڭ ارقاسىندا مەملەكەتتىك قىزمەتتىڭ 700 ءتۇرىن ەلەكتروندى تۇردە الۋعا بولادى. 2012 جىدان بەرگى ارالىقتا بارلىق ليتسەنزيالار تەك ەلەكتروندى تۇردە بەرىلىپ كەلەدى. سول سياقتى, موبيلدىك ۇكىمەت ارقىلى 80 ءتۇرلى قىزمەتتى پايدالانۋعا جاعداي جاسالعان,– دەپ اتاپ ءوتتى.
جيىنعا قاتىسۋشىلار «اقىلدى قالالار», «پراكتيكالىق ۇكىمەت» سىندى جوبالاردى ودان ءارى دامىتۋ جايىن جان-جاقتى تالقىلادى. كورەيا رەسپۋبليكاسى ۇلتتىق ارحيۆىنىڭ قىزمەتكەرى كيم دجەپايونگ قازاقستاندىق ماماندار ءۇشىن ارنايى سەمينار وتكىزدى.
جالپى, اقپاراتتىق تەحنولوگيالار, ەلەكتروندى ۇكىمەت سالاسىندا كورەيا الەمدەگى كوشباسشى ەلدەردىڭ بىرەگەيى سانالادى. بۇل ورايدا, قازاقستان 193 ەلدىڭ ىشىندە 33-ورىندا تۇرعانىن اتاپ وتكەن ءجون. ياعني, ءبىزدىڭ ەلىمىز ءۇشىن كوريالىق ارىپتەستەرىنىڭ وزىق تاجىريبەسىمەن تانىسىپ, ارتىقشىلىقتارىن مەڭگەرۋدىڭ پايداسى زور.
بيىل قازاقستان مەن كورەيا رەسپۋبليكاسى اراسىندا ديپلوماتيالىق قارىم-قاتىناستاردىڭ ورناعانىنا بيىل 25 جىل تولىپ وتىر. وسى ۋاقىت ارالىعىندا ەكى ەل بارلىق دەڭگەيدە ساياسي ديالوگ ورناتىپ, ەكىجاقتى ساۋدا-ەكونوميكالىق جانە ينۆەستيتسيالىق بايلانىستا ۇلكەن ناتيجەلەرگە قول جەتكىزدى دەۋگە تولىق نەگىز بار. وتكەن جىلدىڭ قاراشا ايىندا ەلباسىنىڭ كورەياعا جاساعان مەملەكەتتىك ساپارى ەكىجاقتى قارىم-قاتىناستىڭ ودان ءارى دامۋىنا تىڭ سەرپىن بەرىپ, ارىپتەستىك بايلانىستار نىعايا ءتۇستى. سول ساپاردا بۋسان قالاسىندا ەكى ەلدىڭ ءتيىستى مينيسترلىكتەرى اراسىندا مەموناردۋمعا قول قويىلعانىن جوعارىدا اتاپ وتتىك. استانادا وتكەن كەزدەسۋ بارىسىندا اقپارات جانە كوممۋنيكاتسيالار ءمينيسترى داۋرەن اباەۆ پەن كورەيا رەسپۋبليكاسى مەملەكەتتىك باسقارۋ جانە ىشكى ىستەر ۆيتسە-ءمينيسترى سونگ-رەل كيم ءوزارا ءىس-قيمىل جونىندەگى حاتتاماعا قول قويعانىن جوعارىدا اتاپ وتتىك.
بۇگىنگى تاڭدا ەلىمىزدە اقپاراتتىق-كوممۋنيكاتسيالىق تەحنولوگيالاردى دامىتۋ جۇيەلى تۇردە جۇرگىزىلىپ كەلە جاتىر دەۋگە بولادى. ەلىمىزدىڭ بارلىق قالالارى بايلانىستىڭ 4G تۇرىمەن قامتىلعان, حالىقتىڭ 73 پايىزى ينتەرنەتكە قول جەتكىزگەن. دەگەنمەن وسى جەتىستىكتەرگە شەكتەلىپ قالۋعا استە بولمايتىنى تۇسىنىكتى. بۇل تۋرالى داۋرەن اباەۆ:
– ءبىز قازىر ەلىمىزدە ودان ءارى تسيفرلاندىرۋ, مەملەكەتتىك تاراپتان بەرىلەتىن قىزمەتتى ودان ءارى وڭتايلاندىرۋدى قاراستىرىپ وتىرمىز. وسى شارالاردا ەكى-ءۇش مەملەكەت توپباسشى بولىپ كەلەدى. سونىڭ ءبىرى – كورەيا. كورەيانىڭ ۇلگىسىن قازاقستانعا الىپ كەلەمىز. سەبەبى, بۇل سالانى ودان ءارى دامىتۋىمىز كەرەك. حالىققا قىزمەت كورسەتۋ ورتالىقتارىندا ادامدار نەگە كەزەكتە تۇرادى؟ سەبەبى, ءتيىستى قۇجاتتى ەلەكتروندى ۇكىمەت ارقىلى الاتىن ادامداردىڭ ۇلەسى سول قۇجاتتى حقو-عا بارىپ الاتىندار سياقتى كوپ ەمەس. جاڭا تەحنولوگيالار ارقىلى ءبىز «ەلەكتروندى ۇكىمەتتى» دامىدامىز. ياعني, ەلىمىزدىڭ ازاماتتارى حقو-عا بارىپ الاتىن قۇجاتتاردى ۇيلەرىندە وتىرىپ الا بەرەتىن بولادى. ازاماتتاردىڭ دا, حقو قىزمەتكەرلەرىنىڭ دە ۋاقىتى ۇنەمدەلەدى. ءبىز وسى تەكتەس جۇمىستاردىڭ بارىنشا ساپالى بولعانىن قالايمىز. بۇگىن قول قويىلعان حاتتامانىڭ اياسىندا كورەيانىڭ تاجىريبەسىن ۇيرەنۋ, ينۆەستيتسيانى قايدا سالۋ كەرەكتىگىن مەڭگەرۋ, قانداي جۇمىستاردى جاقسارتۋ كەرەكتىگىن ءتۇسىنۋ قاراستىرىلعان. سونىڭ ەسەبىنەن قاراجات تا ايتارلىقتاي ۇنەمدەلەدى,– دەدى.
كورەيا رەسپۋبليكاسى مەملەكەتتىك باسقارۋ جانە ىشكى ىستەر ۆيتسە-ءمينيسترى سونگ-رەل كيم دە حاتتاماعا قول قويۋ راسىمىنەن كەيىن جۋرناليستەرگە سۇحبات بەردى. ونىڭ ايتۋىنشا, الداعى ۋاقىتتا ەلەكتروندى ۇكىمەتتىڭ «سمارت قالا», كيبەرقاۋىپسىزدىك, داتا-ورتالىق سالۋ جانە باسقا دا سالالارىندا ەكىجاقتى ىنتىماقتاستىق داميدى.
– بۇگىندە كورەيادا حالىقتىڭ 80 پايىزى ەلەكتروندى ۇكىمەتتىڭ قىزمەتىنە جۇگىنەدى. بۇل سالاداعى اقپاراتتىق تەحنولوگيالاردى دامىتۋ بويىنشا ۇزدىك ەلدەردىڭ ساناتىندامىز. الداعى ەلۋ جىلعا ارنالعان باعدارلاما ازىرلەپ, «Smart nation» سىندى جوبانى جۇزەگە اسىرماقپىز. قازاقستان دا اقپاراتتىق تەحنولوگيالاردى دامىتۋ بويىنشا ورتالىق ازيادا كوش باستاپ كەلە جاتقان مەملەكەت. سوندىقتان سىزدەرمەن ارادا ءوزارا ءتيىمدى ارىپتەستىك ورناتۋعا دايىنبىز. حالىققا قىزمەت كورسەتۋ ساپاسىن جاقسارتۋ ءۇشىن قانداي شارالار قولعا الىنۋى كەرەك بولسا, سول باعىتتا تاجىريبە بولىسەمىز,– دەدى سونگ-رەل كيم.
وسى كەزدەسۋدە بەلگىلى بولعانداي, بيىل قازاقستاندىق ساراپشىلار مەن بىرقاتار لاۋازىمدى تۇلعالار ەلەكتروندى ۇكىمەت سالاسىنداعى ءبىلىمىن جەتىلدىرىپ, ماشىقتارىن ارتتىرۋ ماقساتىندا ءتيىستى باعدارلاماعا قاتىسپاق. قازاقستاندىق تاراپ كورەيالىق ارىپتەستەرىن ەلوردادا وتەتىن ەكسپو-2017 كورمەسىنە قاتىسۋعا, ءوزارا تاجىريبە الماسۋعا شاقىردى.
ارنۇر اسقار,
"ەگەمەن قازاقستان"
سۋرەتتەردى تۇسىرگەن ەرلان وماروۆ,
«ەگەمەن قازاقستان»