ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىن جۇزەگە اسىرۋ اياسىندا اقتوبە وبلىسىندا 4,8 ملرد-تان اسا تەڭگە ءبولىندى.
سونىڭ اياسىندا ەڭبەك نارىعىندا سۇرانىسقا يە ماماندىقتار مەن كاسىپكەرلىكتىڭ نەگىزدەرىنە وقىتاتىن ازاماتتاردى جاپپاي وقىتۋ ۇيىمدارىن, تەحنيكالىق جانە كاسىپتىك ءبىلىمى بار كادرلاردى قايتا دايارلاۋ شارالارى قابىلدانۋدا.
ايتا كەتەيىك, جۇمىسپەن قامتۋ ورتالىقتارى نەعۇرلىم سۇرانىسقا يە 36 ماماندىقتىڭ ءتىزىمىن جاسادى. ءموبيلدى وقۋ ورتالىقتارىن اشۋ شالعاي اۋداندارداعى تۇرعىنداردىڭ كاسىبي ءبىلىم الۋلارىنا مۇمكىندىك بەردى. وقۋدى اياقتاعانداردىڭ جۇمىسقا ورنالاسۋلارىنا كومەك كورسەتىلەدى. سونىمەن قاتار, «باستاۋ بيزنەس» جوباسى, الەۋمەتتىك جۇمىس ورىندارىن ۇيىمداستىرۋ جۇمىستارى, ينفراقۇرىلىمدى دامىتۋ مەن تكش ەسەبىنەن جۇمىسقا ورنالاستىرۋ بويىنشا كاسىپكەرلىك نەگىزدەرىنە وقىتۋ جۇرگىزىلۋدە, قالا مەن اۋىلدا شاعىن نەسيە بەرۋدى كەڭەيتۋ قاراستىرىلعان.
بيىل ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىمەن 5 مىڭ ادام قامتىلاتىن بولادى دەپ جوسپارلانۋدا, الايدا قاتىسۋشىلار سانىنىڭ ءوسۋ مۇمكىندىگىنە شەك قويىلماعان.
جۇمىسپەن قامتۋ ماسەلەسىن ءتيىمدى شەشۋ ءۇشىن ەڭبەك جانە الەۋمەتتىك قورعاۋ مينيسترلىگىمەن بىرگە بارلىق 148 اۋىلدىق وكرۋگتەر مەن اۋداندىڭ ماڭىزى بار قالالاردا «ە-حالىق» اقپاراتتىق جۇيەسى ەنگىزىلۋدە. 20 ساۋىردەگى مالىمەت بويىنشا, اقپاراتتىق جۇيەگە 478 مىڭ ادام, ياعني حالىقتىڭ جالپى سانىنىڭ 57 % -ى تۋرالى مالىمەت ەنگىزىلدى.