«قارسىلاسىم 30 جاستا. ونىڭ كەمشىلىكتەرى مەن مىقتى تۇستارىن ازىرگە بىلمەيمىن. وسىعان دەيىن وتكىزگەن ءبىر عانا جەكپە-جەگىن كورىپ شىقتىم. 28 ءساۋىر كۇنى ءبارى بەلگىلى بولادى دەپ ويلايمىن», – دەدى 26 جاستاعى بوكسشى.
اسحات ءۋاليحانوۆ سوڭعى ايقاسىن جەلتوقسان ايىندا وتكىزگەن بولاتىن. ودان بەرى بەس ايعا جۋىق ۋاقىت ءوتتى.
«مەن ءۇشىن ءبىراز ءۇزىلىس بولىپ قالدى. قازىر تەك رەيتينگتىك كەزدەسۋلەر وتكىزىپ ءجۇرمىن. بەس ايدا ءبىر دە ءبىر ايقاس وتكىزبەۋىمە ۆيزالىق قيىندىقتار سەبەپ بولدى. وسى ارالىقتا قازاقستانعا ۆيزا جاساتۋ ءۇشىن بارىپ كەلدىم», – دەپ ءتۇسىندىردى بوكسشى.
سونداي-اق, اسحات بيىل قانشا كەزدەسۋ وتكىزەتىنىن ناقتى ايتا المادى.
ء«بارى ۋاقىتتىڭ ەنشىسىندە. ازىرگە ەشنارسە ايتا المايمىن. ءىس جۇزىندە ءبارى جاقىن ارادا بەلگىلى بولادى», – دەپ قىسقا قايىردى.
ءبىر قىزىعى, قازاقستاندىق بىلعارى قولعاپ شەبەرىنىڭ قارسىلاستارى تەك لاتىنامەريكالىقتار. باپكەرلەرى ءستيلى جاعىنان ىڭعايلى بوكسشىلاردى تاڭداي ما ەكەن الدە كەزدەيسوقتىق پا؟ ءۋاليحانوۆ بۇل تۇرعىدا جاتتىقتىرۋشىلارىنىڭ ويىن بىلمەيتىنىن, كەزدەيسوقتىق بولار دەدى.
ال مۇحيتتىڭ ارعى بەتىندەگى ومىرگە تولىقتاي ۇيرەندى مە؟ ء«بارى جاقسى. امەريكاعا تولىقتاي ۇيرەندىم. تەك ءتىل بىلمەۋىم ازداپ قيىنداۋ بولىپ تۇر», – دەدى ءۋاليحانوۆ.
استانادا EXPO-2017 كەزىندە بوكس كەشى ۇيىمداستىرىلاتىنى بەلگىلى. اسحات ءوز ەلىندە جۇدىرىقتاسقىسى كەلەتىنىن جاسىرمادى.
ء«وز ەلىمدە, جانكۇيەرلەرىمنىڭ الدىندا شارشى الاڭعا شىققىم كەلەدى. بىراق قاي جەردە جۇدىرىقتاسۋ كەرەك ەكەنىن مەن شەشپەيمىن. ەگەر ۇيىمداستىرۋشىلار مەنەدجەرىممەن كەلىسىمگە كەلىپ جاتسا, قازاقستاندا قۋانا-قۋانا جەكپە-جەك وتكىزەر ەدىم», – دەدى 26 جاستاعى بىلعارى قولعاپ شەبەرى.
اسحات ءۋاليحانوۆ ءبىرىنشى جارتىلاي ورتا سالماقتا بوكستاسادى. بىرنەشە اي بۇرىن ول ءوز ديۆيزيونىنداعى ۇزدىك بوكسشىنىڭ ەسىمىن اتاعان بولاتىن.
«قازىرگى ۋاقىتتا تەرەنەس كروۋفورد چەمپيون. وسى سالماقتا ونى ۇزدىك دەپ سانايمىن. ءبىرىنشى جارتىلاي ورتا سالماقتا مىقتى بوكسشىلار جەتەرلىك. ال وزىمە كەلەر بولسام, ولاردىڭ دەڭگەيىنە جەتۋ ءۇشىن كوپ دايىندالۋىم كەرەك», – دەگەن ەدى قازاقستاندىق بوكسشى.
تەرەنس كروۋفورد – امەريكالىق بوكسشى. اۋەسقوي بوكستا 2007 جىلى پانامەريكالىق ويىنداردىڭ چەمپيونى اتانعان. كاسىپقوي بوكستا 2014-2015 جىلدار ارالىعىندا جەڭىل سالماقتا WBO بەلبەۋىنە يە بولعان. قازىرگى ۋاقىتتا ءبىرىنشى جارتىلاي ورتا سالماقتا WBC (2016 جىلدان بەرى), WBO (2015 جىلدان بەرى), The Ring (2016 جىلدان بەرى) تۇجىرىمدارى بويىنشا الەم چەمپيونى. كاسىپقوي رينگتە 30 جەكپە-جەك وتكىزىپ, بارىندە جەڭىسكە جەتكەن. 21 كەزدەسۋىن ۋاقىتىنان بۇرىن اياقتادى.
ايتا كەتەيىك, اسحات ءۋاليحانوۆ – جامبىل وبلىسى, شۋ اۋدانىندا تۋعان. كاسىپقوي بوكسقا دەيىن دۇنيەجۇزىلىك بوكس سەرياسىنىڭ ەكى دۇركىن چەمپيونى – «Astana Arlans» كومانداسىنىڭ نامىسىن قورعادى. قازىرگى ۋاقىتتا بوكسشى ماديار اشكەەۆپەن بىرگە ءبىر كوماندادا جاتتىعىپ ءجۇر. كاسىپقوي بوكستا ەكى رەت جۇدىرىقتاستى. العاشقى جەكپە-جەگىن وتكەن جىلدىڭ تامىز ايىندا مەكسيكالىق دەنيەل باستيەنمەن وتكىزدى. كەزدەسۋدىڭ ءۇشىنشى راۋندىندا تورەشىنىڭ گونگ دىبىسىن ەستىمەي, مەكسيكالىقتى ۇرىپ جىبەرۋىنە بايلانىستى اسحاتقا تەحنيكالىق جەڭىلىس بەردى. ال جەلتوقسان ايىندا نيكاراگۋالىق كارلوس اگيلەرامەن قولعاپ ءتۇيىستىرىپ, ەكىنشى راۋندتا تەحنيكالىق نوكاۋتپەن جەڭىسكە جەتتى.