«ءبىزدىڭ كەزدەسۋىمىز قازاقستان-قىتاي ىنتىماقتاستىعىنىڭ جوعارى دەڭگەيىن راستايدى. بيىل ەكىجاقتى ديپلوماتيالىق قارىم-قاتىناستاردىڭ ورناعانىنا 25 جىل تولدى. وسى ۋاقىت ىشىندە ەلدەرىمىز اراسىنداعى ىنتىماقتاستىق ۇدايى ءوسۋ ءجانە نىعايۋ جولىمەن دامىپ كەلەدى. بۇل, كوبىنەسە, ءبىزدىڭ مەملەكەت باسشىلارىمىزدىڭ تۇراقتى بايلانىستارى ارقىسىندا مۇمكىن بولىپ وتىر», – دەدى ق. ءابدىراحمانوۆ.
كەلىسسوزدەر بارىسىندا تاراپتار ساياسي جانە ساۋدا-ەكونوميكا سالالارىنداعى, ونىڭ ىشىندە, ترانسشەكارالىق سۋ رەسۋرستارىن پايدالانۋ مەن كونسۋلدىق ءماسەلەلەر بويىنشا ءىس-قيمىل جاساۋ سالاسىنداعى ىنتىماقتاستىق ماسەلەلەرىن قاراستىردى. وزەكتى ماسەلەلەر بويىنشا ۇنقاتىسۋدى ستراتەگيالىق ارىپتەستىك رۋحىندا دامىتۋ ماڭىزدىلىعى اتاپ كورسەتىلدى.
سونداي-اق, مينيسترلەر پرەزيدەنت نۇرسۇلتان نازارباەۆتىڭ بيىلعى 14-15 مامىردا بەيجىڭدە وتەتىن «ءبىر بەلدەۋ, ءبىر جول» اتتى حالىقارالىق فورۋمعا قاتىسۋىنا, قحر توراعاسى سي تسزينپين-
ءنىڭ 7-9 ماۋسىمدا استاناعا رەسمي ساپارىنا دايىندىق ماسەلەلەرىن تالقىلادى. ەكى مەملەكەت باسشىسىنىڭ قاتىسۋىمەن 8-9 ماۋسىمدا استانادا وتەتىن شانحاي ىنتىماقتاستىق ۇيىمىنىڭ ءسامميتى دە ءىرى حالىقارالىق وقيعاعا اينالماق.
قحر سىرتقى ىستەر ءمينيسترى قازاقستان مەن قىتاي اراسىنداعى ستراتەگيالىق سەرىكتەستىك جاڭا سيپاتتا داميتىنىنا سەنىم ءبىلدىردى. ونىڭ پىكىرىنشە, ىنتىماقتاستىقتى كۇشەيتۋدە ەكى ەل ليدەرلەرى اراسىنداعى جەكە دوستىق, ءجيى بايلانىستار مەن ءوزارا سەنىم ەرەكشە رولگە يە.
«پرەزيدەنت نۇرسۇلتان نازارباەۆتىڭ باسشىلىعىمەن قازاقستان حالقى قارىشتى ءوسۋ مەن تۇراقتى دامۋ جولىنا كوشتى. ەل ماڭىزدى رەفورمالاردى ىسكە اسىرا وتىرىپ, زاماناۋي قادامدار جاساۋدا», – دەدى قىتايلىق مينيستر.
كەلىسسوزدەر قورىتىندىسى بويىنشا, تاراپتار قازاقستان مەن قىتاي سىرتقى ىستەر مينيسترلىكتەرى اراسىنداعى 2017-2019 جىلدارعا ارنالعان ىنتىماقتاستىق تۋرالى مەموراندۋمعا قول قويدى. بۇل – الداعى ۇشجىلدىق كەزەڭگە ارنالعان سىرتقى ىستەر مينيسترلىكتەرى اراسىنداعى ەكىجاقتى ءوزارا ءىس-قيمىل جاساۋدىڭ «جول كارتاسىنا» اينالاتىن قۇجات.
مينيسترلەر قازاقستان-قىتاي ەكىجاقتى ىنتىماقتاستىعىنىڭ وزەكتى ءماسەلەلەرى مەن حالىقارالىق ىستەر بويىنشا, ونىڭ ءىشىندە قازاقستان رەسپۋبليكاسىنىڭ بۇۇ قاۋىپسىزدىك كەڭەسىندەگى 2017-2018 جىلدارداعى تۇراقتى ەمەس مۇشەلىگى شەڭبەرىندە كەزدەسۋلەر مەن كونسۋلتاتسيالار وتكىزىپ تۇرۋعا ۋاعدالاستى.
تاراپتار ازياداعى ءوزارا ءىس-قيمىل ءجانە سەنىم شارالارىن نىعايتۋ ماڭىزدىلىعىن اتاپ ءوتتى. سونداي-اق, ازياداعى ءوزارا ءىس-قيمىل جانە سەنىم شارالارى ءجونىندەگى كەڭەس شەڭبەرىندە ىنتىماقتاستىقتى دامىتۋعا ۋاعدالاستى.
«بۇگىن ۇيىمعا قاتىسۋشىلار اراسىنداعى ىنتىماقتاستىق پەن سەنىمدى نىعايتۋعا ىقپال ەتەتىن كوپجاقتى ديپلوماتيانىڭ ءتيىمدى قۇرالى رەتىندە اوسشك-گە قاتىستى وڭ كوزقاراس قالىپتاستى», – دەلىنگەن قۇجاتتا.
ايدار ورىسباەۆ,
«ەگەمەن قازاقستان»