– جىل سايىن وتكىزىلىپ كەلە جاتقان ءداستۇرلى «ۇزدىك مامان» كونكۋرسى بىلتىر ەل تاۋەلسىزدىگىنىڭ 25 جىلدىعىنا ارنالعان بولاتىن. ال, بيىل قازاقستاندى گازبەن جابدىقتايتىن ەڭ ءىرى «قازترانسگاز» اكتسيونەرلىك قوعامىنىڭ ەنشىلەس كومپانياسى «ينتەرگاز ورتالىق ازيانىڭ» 20 جىلدىعىنا ورايلاستىرىلىپ ۇيىمداستىرىلدى. وسى 20 جىلدىڭ ىشىندە ەلىمىزدەگى ماگيسترالدى گاز قۇبىرلارى جۇيەلەرىنىڭ ۇزىندىعى 18 مىڭ شاقىرىمعا جەتتى. جاڭا گاز قۇبىرلارىنىڭ قۇرىلىستارى ءجۇرگىزىلىپ, گاز تاسىمالداۋ جۇيەلەرىنىڭ وزگە دە نىساندارى سالىندى. الەۋمەتتىك ينفراقۇرىلىم دامىدى. كومپانيا قالىپتاسۋ جانە دامۋ كەزەڭدەرىنەن ءوتتى. 20 جىلدا «ينتەرگاز ورتالىق ازيا» تاسىمالداعان گازدىڭ جالپى كولەمى 2 ترلن تەكشە مەتردەن اسادى. وسى جەتىستىكتەر – بىلىكتى مامانداردان قۇرالعان ۇلكەن ۇجىمنىڭ ەڭبەگىنىڭ ناتيجەسى. بۇل بايقاۋعا ءوز كاسىبىن جاقسى مەڭگەرگەندەر جينالعان. وسىندا كەلگەن ارقايسىلارىڭىز كومپانيانىڭ ماقتانىشىسىزدار, ۇجىمنىڭ تابىستى دامۋىنىڭ نەگىزى دە سىزدەرسىزدەر. سىزدەر ءوز شەبەرلىكتەرىڭىزدى تانىتۋعا, ءۇزدىكتەردىڭ ۇزدىگى اتانۋعا لايىقسىزدار. مۇنداي اتاقتى ەلىمىزدىڭ ەڭ ءىرى گاز تاسىمالداۋ كومپانياسىنان الۋ ۇلكەن ءمارتەبە ءارى زور جاۋاپكەرشىلىك, – دەدى جارىستىڭ اشىلۋ سالتاناتىندا «ينتەرگاز ورتالىق ازيا» اق باس ديرەكتورىنىڭ ءبىرىنشى ورىنباسارى مۇقاتاي شاڭباتىروۆ.
شاڭباتىروۆ مىرزانىڭ ايتۋىنشا, ەلىمىزدە ءىرى گاز قۇبىرلارى سالىنىپ جاتىر. باتىستان وڭتۇستىككە باعىتتالعان بەينەۋ – بوزوي – شىمكەنت گاز قۇبىرى ىسكە قوسىلدى. حالىقارالىق ترانزيت شەڭبەرىندە 4 مىڭ شاقىرىمنان استام ماگيسترالدى گاز قۇبىرى, وتە جوعارى قىسىمدى 13 كومپرەسسور سالىندى. سوڭعى تەحنولوگيامەن انگليا, فرانتسيادا جاسالعان قوندىرعىلاردى يگەرۋ ءۇشىن كوپ وقىپ ىزدەنۋمەن قاتار وندىرىستىك تاجىريبە دە جيناۋ كەرەك. ونىڭ بويىنا كوپتەگەن جوعارى تەحنولوگيالىق اگرەگاتتار ورناتىلعان. سولاردى يگەرۋ ءۇشىن ماماندارىمىز سول دارەجەدە بولۋى كەرەك. مۇندايدا جوعارى تەحنولوگيالاردى قولدانا وتىرىپ مامانداردىڭ كاسىبي شەبەرلىكتەرىن شىڭدايتىن «ۇزدىك مامان» بايقاۋىنىڭ بەرەرى مول. ەڭبەك جانە ءوندىرىس قاۋىپسىزدىگى ەرەجەلەرىن ساقتاۋدى ناسيحاتتايتىن جارىس 2002 جىلدان بەرى وتكىزىلىپ كەلەدى. جىل سايىن ۇيىمداستىرىلاتىن بۇل بايقاۋعا بۇگىنگە دەيىن 3 مىڭداي مامان قاتىسىپ, باقتارىن سىناعان. قانشاماسى ۇزدىكتەر اتاندى دەسەڭىزشى...
ەكى كەزەڭنەن تۇراتىن جارىستا نەگىزگى ءتورت باعىتتاعى – گاز سىعىمداۋ ستانسالارى, ماگيسترالدى گاز قۇبىرلارى, گاز تاراتۋ قۇبىرلارى جانە جەر استى گاز ساقتاۋ قويمالارىنىڭ قىزمەتكەرلەرى 15 اتالىم بويىنشا كاسيبي بىلىكتىلىكتەرىن ورتاعا سالدى.
بايقاۋعا قاتىسۋعا نيەت ءبىلدىرۋشىلەر ءوز بەتىنشە تەوريالىق بىلىمدەرىن جەتىلدىرۋى ءتيىس ەكەن. ويتكەنى, ولار تاپسىراتىن تەوريالىق تەست ەكى بلوكتان تۇردى. العاشقىسىندا جالپىعا ورتاق ەڭبەك جانە ءوندىرىس قاۋىپسىزدىگى ەرەجەلەرىن ساقتاۋ سۇرالسا, ەكىنشىسىندە وزدەرىنىڭ ماماندىقتارى بويىنشا تەوريالىق بىلىمدەرى سىنالدى.
ەكىنشى كەزەڭدە قاتىسۋشىلار ەڭبەك قاۋىپسىزدىكتەرىن بىلەتىندەرىن پراكتيكالىق تۇرعىدا دالەلدەۋگە ۇمتىلدى. مۇندا گازدان ۋلانۋ, توكقا ءتۇسىپ قالۋ, ەسىن جوعالتۋ, جوعارىدان قۇلاۋ, جاراقات الۋ جاعدايلارىندا العاشقى مەديتسينالىق كومەك كورسەتۋ سەكىلدى تاپسىرمالاردى ورىنداۋ مىندەتتەلدى.
ءۇشىنشى كەزەڭدە جۇمىسشىلاردى ءوز ماماندىعى بويىنشا وندىرىستىك سىناقتار كۇتىپ تۇردى. ولار قازىلار القاسىنىڭ ۇيعارىمىنا قاراي كەشەندى جۇمىستاردى جۇزەگە اسىرۋمەن اينالىستى.
قازىلار القاسى اتالعان ءۇش كەزەڭنىڭ ناتيجەلەرىن ءۇش كۇن وتىرىپ شىعاردى. باعالاۋدىڭ جيىنتىق كورسەكىشتەرى بويىنشا ۇزدىكتەردى انىقتادى. قازىلار القاسىنىڭ قۇرامىندا باس ديرەكتوردىڭ ورىنباسارى – كوميسسيا توراعاسى, كاسىپوداق ءتوراعاسى, وندىرىستىك قاۋىپسىزدىك ءجانە ەڭبەكتى قورعاۋ دەپارتامەنتىنىڭ ديرەكتورى – كوميسسيا ءتوراعاسىنىڭ ورىنباسارى, ماگيسترالدى قۇبىرلاردا گاز سىعىمداۋ ستانسالارىن ەكسپلۋاتاتسيالاۋ دەپارتامەنتىنىڭ ديرەكتورى جانە بارلىق ماماندىقتار بويىنشا كاسىبي ماماندار بولدى.
بايقاۋ قورىتىندىسىندا 15 اتالىم بويىنشا جەڭىمپازداردىڭ العاشقى ۇشتىكتەرى ارنايى ديملومدارمەن ماراپاتتالدى. جالپى سانى 45 ادامعا باعالى سىيلىقتار مەن جىل بويى بەرىلەتىن قارجىلاي ۇستەماقىلار تاپسىرىلدى. ال ءبىرىنشى ورىندى يەلەنگەن ۇزدىكتەردىڭ ومىراۋلارىندا «ۇزدىك مامان-2017» توسبەلگىلەرى جارقىرادى.
– مەنىڭ شىمكەنتكە كەلۋىمنىڭ ءوزى ۇلكەن قۋانىشپەن باستالدى. العاشقى كۇنى اقتاۋدان وتباسىم حابارلاسىپ, ءسۇيىنشى سۇرادى. كەلىنىم ەكىنشى پەرزەنتىن ومىرگە اكەلدى, – دەيدى قوس قۋانىشىن جاسىرا الماعان, «تەحنولوگيالىق كومپرەسسورلار ءماشينيسى» اتالىمى بويىنشا ۇزدىك مامان اتانعان نۇربەرگەن جاقاشەۆ تولقىپ تۇرىپ. – بۇعان دەيىن دە گراموتالارمەن ماراپاتتالعانمىن. بىراق مەن ءۇشىن بۇل جەڭىستىڭ ءجونى ءبىر بولەك. ۇزدىك مامان اتانۋ زور مارتەبە بولعانىمەن, مۇنداي اتاقتىڭ جاۋاپكەرشىلىگى دە ۇلكەن.
27 جىلدان بەرى وسى سالادا ەڭبەك ەتىپ كەلە جاتقان ۇزدىك مامان راس ايتادى. ۇزدىك مامان اتانۋ ۇلكەن جاۋاپكەرشىلىك جۇكتەيدى.
عالىمجان ەلشىباي,
«ەگەمەن قازاقستان»