"سوڭعى بەس جىل بولدى, استانانى دامىتۋعا ارنالعان وتىرىستاردا ماعان قالادا اقىلدى باعدارشامدار ورناتىلاتىنىن ايتىپ كەلەدى. قايدا ول باعدارشامدار؟ بىزدەگى كولىك كەپتەلىسىنە قاراڭىزدار. ەكسپو كەزىندە نە بولادى؟ ادامدار ميلليونداپ كەلەدى. كىم سارالادى وسىنى؟ ەكسپو ماڭىزدىلىعىن تۇسىنەسىڭدەر مە, ءبىزدىڭ بەدەلىمىزگە نە بولادى, مەيماندار كورمەدە ەمەس, كوشەدە - كەپتەلىستە تۇرسا؟! قازىردەن باستاپ, وزگە قالالار قانداي شارالار قولداناتىنىن زەرتتەۋىمىز كەرەك. توكيو, لوندون, ەۋروپا قالالارىنداعى كەپتەلىستەر قالاي شەشىمىن تاۋىپ جاتىر. سوندىقتان ماسەلەنى شەشىڭدەر", - دەدى ەلباسى.
مەملەكەت باسشىسىنىڭ ايتۋىنشا, ءتيىمدى ترافيك پەن ءتيىمدى قوزعالىس جۇيەسى باسقا قالالارمەن سالىستىرعاندا, وزىق بولۋى ءتيىس.
"ول ءۇشىن ءبىز IVECO-نىڭ 380 اۆتوبۋسىن ساتىپ الدىق. ولاردىڭ ارقايسىسى 120 ميلليون تەڭگە تۇرادى. قازىر ولاردى جۇرگىزەتىن ادام جوق ەكەنى انىقتالدى. بىلىكتىلىگى بار جۇرگىزۋشى جوق. دايىنداۋ جانە وقىتۋ جۇمىستارىمەن ەشكىم اينالىسپايدى. بۇل وسى اۆتوبۋستاردى ساتىپ الۋ كەلىسىمشارتتارىندا كورسەتىلۋى ءتيىس ەدى. اۆتوبۋستارعا قىزمەت كورسەتەتىن ورتالىقتار جوق", - دەدى ن. نازارباەۆ.
ءوز كەزەگىندە استانا اكىمىنىڭ ورىنباسارى سەرگەي حوروشۋن بۇل ماسەلە نازاردان تىس قالىپ كەتكەندىگىن مويىندادى.
"راسىندا, جۇرگىزۋشىلەر بويىنشا جۇمىستى كەزىندە ەسكەرمەدىك. قازىر ول ولقىلىقتى تۇزەتىپ جاتىرمىز. العاشقى 30 اۆتوبۋس كەلدى, 200 جۇرگىزۋشى وقىتىلدى. اپتا سايىن 80 اۆتوبۋستان جەتكىزىلىپ وتىرادى. ەكسپو كورمەسىنە دەيىن 380 اۆتوبۋس تولىق ەلوردادا بولادى", - دەدى استانا اكىمىنىڭ ورىنباسارى سەرگەي حوروشۋن.
"قازىر اسىعىپ, نەشە ءتۇرلى جۇرگىزۋشىلەردى اۆتوبۋسقا وتىرعىزىپ قويماڭدار, كوشەدە ادام قاعىپ جۇرمەسىن. وسىنى قولعا ال!", - دەدى پرەزيدەنت حوروشۋنعا قاراتىپ ايتقان سوزىندە.
ءوز كەزەگىندە اسەت يسەكەشەۆ ەلباسىنا كولىك ينفراقۇرىلىمى جايىندا باياندادى.
«اۋەجايدىڭ جاڭا تەرمينالى مەن تەمىرجول ۆوكزالى ۋاقىتىلى پايدالانۋعا بەرىلەدى. قر ينۆەستيتسيالار جانە دامۋ مينيسترلىگى بارلىق قاجەتتى قوسىمشا پويىزداردى, اۋە رەيستەردى پىسىقتادى. ۇكىمەتتىڭ قولداۋىمەن اۆتوبۋستار ساتىپ الىندى. 110 اۆتوبۋستى حالىقارالىق دەلەگاتسيالارعا بولدىك. 167 اۆتوبۋستى شاتتل-باستىڭ 7 باعدارىنا جىبەرەمىز, ياعني بۇل ارنايى ەكسپرەسستەر مەيمانداردى ەكسپو اۋماعىنا تاسىمالدايدى. سونىمەن قاتار «استانا تاكسي» قىزمەتى قۇرىلدى», - دەدى اكىم.
ونىڭ سوزىنە قاراعاندا, ەكسپو-قالاشىعى اۋماعىنا كەلەتىن كولىكتەر تۇراقتارمەن قامتاماسىز ەتىلەدى.
«قاۋىپسىزدىك بويىنشا وسىندا ارنايى كوميسسيا جۇمىس ىستەيدى. قالا تاراپىنان ءبىز احۋالدىق ورتالىقتى قۇردىق. وندا قالاداعى بارلىق قىزمەتتەر قامتىلادى. 3 مىڭ بەينە كامەرا بارلىق قاجەتتى ورىنداردى قامتىپ, اتالعان ورتالىققا مالىمەتتەردى بەرەدى», - دەدى يسەكەشەۆ.
مۇنىمەن قوسا ول كورمە كەزىندەگى مەديتسينالىق كومەك بويىنشا قر دەنساۋلىق ساقتاۋ مينيسترلىگىمەن پىسىقتالعانىن جەتكىزدى. ەكسپو اۋماعىندا 7 مەديتسينالىق پۋنكت جۇمىس ىستەيتىن بولادى, ال قالا اۋماعىندا 13 مەديتسينالىق مەكەمە دايىندالدى.