ەندى ءساۋىردىڭ العاشقى اپتاسىنان باستاپ جاڭا جۇلدىزدارىن تابۋعا اسىققان XII رەسپۋبليكالىق «جۇلدىزاي-2017» فەستيۆالى جاڭا قادامعا بارىپ وتىر.
بىرىنشىدەن, بيىل العاش رەت الماتى قالاسىنىڭ باس ساحناسى – رەسپۋبليكا سارايىندا فەستيۆالدىڭ فينالى مەن گالا-كونتسەرتى وتەدى. ويتكەنى, بيىل قالا اكىمدىگى جوبانىڭ باس سەرىكتەسى بولدى. بۇعان دەيىن ءداستۇرلى فەستيۆال ەلوردامىز استانادا ءوتىپ كەلگەن-ءدى. جانە ءبىرىنشى رەت فەستيۆال جەكەمەنشىك-مەملەكەتتىك فورماتتا ۇيىمداستىرىلماق.
وعان قوسا, قازىلار القاسى ۇستىمىزدەگى جىلدىڭ 4 ساۋىرىنەن باستاپ جەر جەرلەردە ىرىكتەۋ تۋرلارىن وتكىزۋ ءۇشىن ەلىمىزدىڭ 16 قالاسىن ارالاپ شىعادى. بۇلار – استانا, الماتى, تالدىقورعان, شىمكەنت, تاراز, قىزىلوردا, اتىراۋ, اقتاۋ, اقتوبە, ورال, وسكەمەن, پاۆلودار, كوكشەتاۋ, پەتروپاۆل, قوستاناي, قاراعاندى قالالارى.
وسى جىلعى جوبانىڭ تاعى ءبىر ەرەكشەلىگى – ەرەكشە بالالارعا ارنالعان I رەسپۋبليكالىق سپارتاكيادا فەستيۆالمەن قاتار باستالادى. ميني-فۋتبول, ۇستەل تەننيسى, جەڭىل اتلەتيكا جانە اسىق اتۋ سىندى سپورت تۇرلەرىنىڭ جەڭىمپازدارى الماتى قالاسىندا وتەتىن جارىسقا كەلەدى. سونىمەن, 2017 جىلدىڭ 26 مامىرى مەن 1 ماۋسىمى ارالىعىنا بەلگىلەنگەن سپارتاكيادا مەن گالا-كونتسەرتكە 10-18 جاس ارالىعىنداعى 700-گە جۋىق بالا قاتىسادى دەپ كۇتىلۋدە.
جۋرناليستەرمەن وتكەن باسپاسوز ءماسليحاتى كەزىندە بيىل جاس دارىنداردى ىرىكتەۋ ۆوكال, ىمداۋ, اسپاپتىق ورىنداۋ, حورەوگرافيا, بەينەلەۋ جانە ساندىك-قولدانبالى ونەر تۇرلەرى بويىنشا وتەتىندىگى ءمالىم بولدى. ارينە, بۇل سىننان وتكەن بالالاردى كەلەسى كەزەكتە الماتىنىڭ باس ساحناسىندا ونەر كورسەتۋ, شەبەرلىك دارىستەرى, ەكسكۋرسيالار, كورمەلەر, تانىمال ونەرپازدارمەن كەزدەسۋ جانە تاماشا مەرەكەلىك كوڭىل-كۇي كۇتىپ تۇر.
ءبىز جوعارىدا بيىل ءبىرىنشى رەت «جۇلدىزاي» فەستيۆالى جەكەمەنشىك-مەملەكەتتىك تۇرعىدا وتكەلى وتىرعانىن ايتتىق. ياعني, فەستيۆالدىڭ گالا-كونتسەرتى مەن جۇلدە قورىن جانە برەندتەلگەن كيىمدەرمەن قامتاماسىز ەتۋدى BI Group كومپانياسى تاعى دا موينىنا الدى. ونىڭ ۇستىنە بيىل جەڭىمپازدارعا بەرىلەتىن جۇلدە قورى ەكى ەسەگە كوبەيتىلىپ, 30 ميلليون تەڭگەگە جەتىپ وتىر.
– «جۇلدىزاي» فەستيۆالى − ەرەكشە تالاپ-مۇقتاجدىقتارى بار بالالار ءۇشىن اسا ماڭىزدى شارا. ەرەكشە تۋعان تالانتتار شىعارماشىلىق قابىلەتىن, سپورتتىق ماشىعىن دامىتا الادى. الماتىنىڭ كورىكتى جەرلەرىن ءوز كوزدەرىمەن كورەدى. وزدەرىندەي بالالارمەن ارالاسىپ, دوس تابادى. تانىمال ونەر ادامدارىمەن ديدارلاسادى. بيىل ءبىز دە وسى فەستيۆالعا قولداۋ كورسەتۋگە شەشىم قابىلدادىق. جانە ءمۇمكىندىگى شەكتەۋلى بالالار اراسىندا وتەتىن سپارتاكياداعا ۇلتتىق سپورت ءتۇرىن قوستىق. فەستيۆال بالالارعا ۇناۋ ءۇشىن بارىمىزدى سالىپ جاتىرمىز, – دەيدى الماتى قالاسى دەنەشىنىقتىرۋ جانە سپورت باسقارماسىنىڭ باسشىسى ءابىل دونباەۆ.
BI Group كومپانياسىنىڭ «مجك-الماتى» ديۆيزيونىنىڭ باس ديرەكتورى ايدوس مۇقاتاەۆ «BI-جۇلدىزاي» قورىنا كومپانيانىڭ قىزمەتكەرلەرى 11 جىلدان بەرى ەرىكتى تۇردە قاراجات اۋدارىپ وتىرعانىن ايتادى. اتالمىش كومپانيانىڭ قىزمەتكەرلەرى قازىر قازاقستان مەن تمد ەلدەرىندەگى 85 قۇرىلىس نىسانىندا جۇمىس ىستەپ جاتىر. وسى ارادا قاناتسىز قۇستاي كىشكەنتاي دارىنداردىڭ ساحناعا شىعىپ, وعان قوسا سال اۋرۋىنا ۇشىراعان (دتسپ) بالالاردىڭ ەمىنە وسى كومپانيانىڭ جۇمىسشىلارى سەپتەسىپ كەلە جاتقانىن ايتۋ ءلازىم. اتالمىش كومپانيا بيىل العاش رەت الماتى قالاسى اكىمدىگىمەن بىرىگىپ, فەستيۆالدى اۋقىمدى دەڭگەيگە كوتەرە العاندارى ءۇشىن قۋانىشتى.
– وسى فەستيۆالدى ۇيىمداستىرىپ جۇرگەنىمىزگە ون جىلدان استى. ءبىزدىڭ جوباعا قاتىسقان بالالاردىڭ كوپشىلىگى ومىردەن جولىن تاۋىپ كەتكەنىنە قۋانامىز. بىراق ءبىزدىڭ كوزدەگەنىمىز – دارىندى بالالاردى تانىتىپ قانا قويماي, وزىنە دەگەن سەنىمدى وياتۋ. وسى فەستيۆالدىڭ ارقاسىندا كوزگە تۇسكەن تالاي تالانتتى جەتكىنشەك جوعارى وقۋ ورىندارىنا ءتۇستى. ولار ءوزدەرىندە جىگەر مەن قابىلەت بار ەكەندەرىنە كوزدەرى جەتتى. ەڭ باستىسى, «جۇلدىزاي» فەستيۆالىنە قاتىسقىسى كەلەتىن ۇل-قىزداردىڭ سانى جىل سايىن كوبەيىپ كەلەدى. مۇمكىندىگى شەكتەۋلى بالالاردىڭ ومىرگە دەگەن قۇلشىنىسىن وياتۋعا قول جەتكىزە العانىمىز ءۇشىن قۋانامىز, – دەيدى «BI-جۇلدىزاي» فەستيۆالى ديرەكتورىنىڭ ورىنباسارى التىناي تاڭىربەرگەنوۆا.
سونىمەن, «جۇلدىزاي» رەسپۋبليكالىق فەستيۆالى ءداستۇر بويىنشا 1 ماۋسىمدا – حالىقارالىق بالالاردى قورعاۋ كۇنىندە ۇلكەن كونتسەرتپەن اياقتالماق. وسى جىلى فەستيۆالدىڭ باستى الاڭى – الماتى قالاسىنداعى رەسپۋبليكا سارايى بولادى.
وسى ارادا «جۇلدىزاي» فەستيۆالى ءبىلىم جانە عىلىم مينيسترلىگى, وبلىستىق ءبىلىم بەرۋ باسقارمالارىنىڭ قولداۋىمەن 2005 جىلدان بەرى ۇزدىكسىز ءوتىپ كەلە جاتقانىن ايتۋعا بولادى.
فەستيۆالدىڭ 11 جىلدىق تاريحىندا وعان قازاقستاننىڭ تۇكپىر-تۇكپىرىنەن 36 مىڭنان استام بالا قاتىسقان. 7 مىڭعا جۋىق بالا ەلوردامىزدىڭ ەڭ تانىمال ساحنالارىندا ونەر كورسەتتى. ولاردىڭ كوپشىلىگى وسى جوبانى ىسكە اسىرۋ ناتيجەسىندە ەلىمىزدىڭ شىعارماشىلىق جوعارى وقۋ ورىندارىنا قابىلدانعان.
ايناش ەسالي,
«ەگەمەن قازاقستان»
الماتى