جەكەشەلەنەتىن ۇيىمدار تىزبەسى ناقتىلاندى
جيىندا جەكەشەلەندىرۋ جايىندا ۇلتتىق ەكونوميكا ءمينيسترى تيمۋر سۇلەيمەنوۆ باياندادى. ءمينيستردىڭ مالىمدەۋىنشە, بيىل – 280 ۇيىم, ال كەلەسى جىلى 84 ۇيىم ساتۋعا شىعارىلادى. «ەير استانا» اق, «قازاتومونەركاسىپ» ۇاك اق, «قازاقتەلەكوم» اق, «قازمۇنايگاز» ۇك» اق, «قازپوشتا» اق, «سامۇرىق-ەنەرگو» اق, «قازاقستان تەمىر جولى» ۇك» اق, «تاۋكەن سامۇرىق» ۇك» اق ءتارىزدى ەلىمىزدىڭ 8 ءىرى اكتيۆىن IPO/SPO-عا 2019-2020 جىلدارى شىعارۋ جوسپارلانعان.
2016 جىلدىڭ سوڭىندا جۇرگىزىلگەن ۆەدومستۆوعا باعىنىشتى ۇيىمداردى تۇگەندەۋدىڭ قورىتىندىسى بويىنشا كەشەندى جەكەشەلەندىرۋ جوسپارىنا قوسىمشا 105 ۇيىم مەن قىزمەتتەرىن مەملەكەتتىڭ قاتىسۋىمەن جانە ونىمەن ۇلەستەس تۇلعالارمەن اق جانە جشس اتقارا الاتىن, ۇكىمەتتىڭ قىزمەت تۇرلەرىن ايقىندايتىن قاۋلىسىنا ساي كەلمەيتىن 32 ۇيىم ەنگىزىلگەن.
«نىساندار ءتىزىمىن جاساعاندا ءبىز تۇگەندەۋ ناتيجەلەرىن نەگىزگە الدىق, وعان سايكەس مەملەكەت مەنشىگىندە 6003 ۇيىمدى ساقتاپ قالۋ ۇسىنىلدى, ونىڭ ىشىندە 88 پايىزدان استامى الەۋمەتتىك سالا ۇيىمى بولسا, 447 كومپانيا – كۆازيمەملەكەتتىك سەكتوردان, سونىمەن قوسا 243 ۇيىمدى تاراتۋ ۇسىنىلدى», دەدى ت.سۇلەيمەنوۆ.
ءمينيستردىڭ ايتۋىنشا, جەكەشەلەندىرۋدىڭ اشىقتىعى مەن ءتيىمدىلىگىن قامتاماسىز ەتۋ, الەۋەتتى ينۆەستورلاردى بارىنشا كوپ تارتۋ ماقساتىندا «KAZNEX INVEST» اق قوسىمشا ينتەرنەت-رەسۋرسىن اشقان. مۇندا جەكەشەلەندىرىلەتىن نىساندار جونىندەگى اقپاراتتار ۇسىنىلعان جانە كەشەندى جەكەشەلەندىرۋ جوسپارى ورىندالۋىنىڭ جۇزەگە اسىرىلۋ بارىسى جاريالانۋدا.
2016 جىلدان باستاپ جەكەشەلەندىرۋدىڭ كەشەندىك جوسپارى بويىنشا 51 ملرد تەڭگە سوماسىنا 198 نىسان, سونىڭ ىشىندە 7 ملرد تەڭگەگە رەسپۋبليكالىق مەنشىكتىڭ 18 نىسانى, 5 ملرد تەڭگەگە كوممۋنالدىق مەنشىكتەگى 95 نىسان, 39 ملرد تەڭگەگە كۆازيمەملەكەتتىك سەكتوردىڭ 85 نىسانى وتكىزىلدى.
ال قارجى ءمينيسترى باقىت سۇلتانوۆتىڭ حابارلاۋىنشا, مەملەكەت باسشىسىنىڭ تاپسىرمالارىن ىسكە اسىرۋ اياسىندا 2017 جىلى 325 نىساندى ساتۋ جوسپارلانعان, سونىڭ ىشىندە رەسپۋبليكالىق مەنشىكتىڭ 30 نىسانى, كوممۋنالدىق مەنشىكتىڭ 177 نىسانى, ۇلتتىق حولدينگتەردىڭ 67 نىسانى مەن الەۋمەتتىك-كاسىپكەرلىك كورپوراتسيالاردىڭ 51 نىسانى بار. 2018 جىلى 61 نىساندى ساتۋ كوزدەلگەن.
«2017 جىلى 29 تارتىمدى نىساندى ساتۋ جوسپارلانعان, ونىڭ ىشىندە – «سامۇرىق-قازىنا» ۇاق» اق-قا قاتىستى 20 نىسان, «بايتەرەك» ۇبح» اق-قا قاتىستى 1 جانە رەسپۋبليكالىق مەنشىكتەگى 8 نىسان بار. ال 2018 جىلعا جوسپارلانعان 21 تارتىمدى نىساننىڭ بىرەۋى كوممۋنالدىق مەنشىككە, 10 «سامۇرىق-قازىنا» ۇاق» اق-قا, 3 «ءبايتەرەك» ۇبح» اق-قا, 3 «قازاگرو» ۇبح» اق-قا جانە 4-ەۋى رەسپۋبليكالىق مەنشىككە تيەسىلى», دەدى ب.سۇلتانوۆ. سونداي-اق, «سامۇرىق-قازىنا» ۇاق» اق-تىڭ 18 ءىرى كومپانياسىن وتكىزۋ 2019-2020 جىلدارعا جوسپارلانعان.
ماسەلە جان-جاقتى تالقىلانعان سوڭ پرەمەر-مينيستر باقىتجان ساعىنتاەۆ قازاقستانداعى جەكەشەلەندىرۋ باعدارلاماسىن ودان ءارى ىسكە اسىرۋ بويىنشا بىرقاتار تاپسىرمالار بەردى.
ۇكىمەت باسشىسى جەكەشەلەندىرۋ نىساندارىن وتكىزۋدىڭ جاڭا كەستەلەرى قايتا بەكىتىلگەنىن, سونداي-اق ءار نىسان بويىنشا جول كارتالارى ولاردى وتكىزۋدىڭ ناقتى مەرزىمدەرىمەن مەملەكەتتىك م ۇلىك تىزىلىمىنە ەنگىزىلگەنىن اتاپ ءوتتى. وسىعان بايلانىستى مەملەكەتتىك ورگاندارعا جانە حولدينگتەرگە بەكىتىلگەن كەستەلەردى ناقتى ساقتاۋدى قامتاماسىز ەتۋ قاجەت. سونداي-اق, بۇگىندە مەملەكەتتىك مەنشىكتە قالۋى ءتيىس نىساندار ءتىزىمىن جاساۋ بويىنشا جۇمىس جۇرگىزىلۋدە. وعان قوسا, «Yellow Pages» قاعيدالارىنا سايكەس كەلمەيتىن جۇزدەن استام نىسان جەكەشەلەندىرۋگە جاتاتىن نىساندار تىزىمىنە قوسىمشا ەنگىزىلەدى. مەملەكەتتىك مەنشىكتەگى قالعان نىساندار جابىلۋى نەمەسە قايتا ۇيىمداستىرىلۋى ءتيىس. وسىعان بايلانىستى پرەمەر-مينيستر مەملەكەتتىك ورگاندارعا, اكىمدىكتەرگە جانە ۇلتتىق حولدينگتەرگە اعىمداعى جىلدىڭ سوڭىنا دەيىن اتالعان جۇمىستى اياقتاۋدى تاپسىردى. بۇدان وزگە, باقىتجان ساعىنتاەۆ ۇكىمەتتىڭ كەڭەيتىلگەن وتىرىسىندا مەملەكەت باسشىسى مەملەكەتتىك قاتىسۋى بار بارلىق نىسانداردى ولاردى باسەكەلى ورتاعا بەرۋ ماقساتىندا تۇگەندەۋدى تاپسىرعانىن ەسكە سالدى.
ۇلتتىق ەكونوميكا مينيسترلىگى جۇرگىزگەن جۇمىس قورىتىندىسى بويىنشا باسەكەلى ورتاعا بەرۋگە ءتيىستى نىسانداردىڭ ءتىزىمى وزەكتەندىرىلدى. سول سەبەپتى جاۋاپتى مەملەكەتتىك ورگاندار الدا وسى باعىتتاعى جۇمىستاردى باقىلاۋدا ۇستاۋلارى قاجەت.
48 مىڭنان استام ادام جۇمىسپەن قامتىلدى
وتىرىستا تالقىلانعان ەكىنشى ماسەلە بويىنشا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا باياندادى. 2017 جىلدان باستاپ ەلىمىزدە قاجەتتى كاسىپتەر مەن كاسىپكەرلىك نەگىزدەرى داعدىلارىنا جاپپاي وقىتۋ مەن ۇيرەتۋدى, نەسيەلەندىرۋ ارقىلى جاپپاي كاسىپكەرلىك ءۇشىن جاعدايلار تۋدىرۋدى, جۇمىسقا ورنالاستىرۋعا ىقپال ەتۋ جانە ەڭبەككە جۇمىلدىرۋدى قولداۋدى قاراستىراتىن ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى جۇزەگە اسىرىلۋدا.
«5 ساۋىردەگى جاعداي بويىنشا باعدارلاماعا 80 مىڭ ادام قاتىستى, ونىڭ ىشىندە 75 مىڭ (94 پايىز) جۇمىسسىزدار, ءوزىن-ءوزى جۇمىسپەن قامتىعاندار – 5 مىڭ (6 پايىز). باعدارلامانى جۇزەگە اسىرۋ اياسىندا 48 مىڭنان استام ادام جۇمىسقا ورنالاستىرىلدى. تاعى 31 مىڭ ادام جۇمىسپەن قامتۋ ورتالىقتارى ارقىلى جۇمىس بەرۋشىلەرمەن بوس جۇمىس ورىندارىنا جۇمىسقا ورنالاستىرىلدى», دەدى ت. دۇيسەنوۆا.
باعدارلامانىڭ ەكىنشى باعىتىن جۇزەگە اسىرۋ ءۇشىن بيىل 38,5 ملرد تەڭگە قاراستىرىلعان. بيىل 5,8 مىڭ شاعىن نەسيە بەرىپ, كاسىپكەرلىك نەگىزدەرىنە 15 مىڭ ادامدى وقىتۋ جوسپارلانعان. ءۇشىنشى باعىت اياسىندا الەۋمەتتىك جۇمىس ورىندارىنا 11,3 مىڭ ادامدى ورنالاستىرۋ جوسپارلانعان, جاستار ءىس-تاجىريبەسىنە – 12,7 مىڭ تۇلەك, قوعامدىق جۇمىستارعا 76,2 مىڭ ادام تارتىلادى. 2,8 مىڭ ادامنىڭ كوشى-قونىنا سۋبسيديا تولەۋ قاراستىرىلعان. باعدارلامانىڭ ءۇشىنشى باعىتىن جۇزەگە اسىرۋعا 9 ملرد تەڭگە بولىنگەن.
«جىل باسىنان بەرى الەۋمەتتىك جۇمىس ورىندارىنا 12,4 مىڭ ادام ورنالاستىرىلدى, 28,1 مىڭنان استام قازاقستاندىق قوعامدىق جۇمىستارعا جىبەرىلدى, 7,6 مىڭ جاس مامان جاستار ءىس-تاجىريبەسىنە قامتىلدى. جالپى, باعدارلامانى جۇزەگە اسىرۋعا 2017 جىلى 85,3 ملرد تەڭگە قاراستىرىلعان», دەدى مينيستر.
ال ءبىلىم جانە عىلىم ءمينيسترى ەرلان ساعاديەۆ بيىل كادرلار دايارلاۋمەن 21,3 مىڭ ادامدى جانە كۋرستىق وقىتۋمەن 26 مىڭ ادامدى قامتۋ جوسپارلانعانىن جەتكىزدى. وڭىرلەردە كادرلار دايارلاۋعا ۇمىتكەرلەر ءتىزىمىن قالىپتاستىرۋ بويىنشا 825 ۇتقىر توپ قۇرىلدى. ۇمىتكەرلەر 9-11 سىنىپتار تۇلەكتەرىنەن, بىلىكتىلىگى جوق تۇلعالاردان, از قامتىلعان وتباسىلاردان شىققانداردان جانە ومىردە قيىن جاعدايعا تاپ بولعانداردان, سونداي-اق, ازاماتتاردىڭ باسقا دا ساناتتارىنان قالىپتاستىرىلادى. 360 ءبىلىم بەرۋ ۇيىمىنىڭ ءتىزىمى انىقتالعان. جۇمىسپەن قامتۋ ورتالىقتارى قۇرامدى 29 جاسقا دەيىنگى جاستاردان, حالىقتى جۇمىسپەن قامتۋ ورتالىقتارىنا تىركەلۋىنە تاۋەلسىز جۇمىسسىزداردان جانە ءوزىن-ءوزى جۇمىسپەن قامتىعانداردان قالىپتاستىرىلادى. بەس پيلوتتىق وڭىردە شالعاي ەلدى مەكەندەردە ازاماتتاردى وقىتۋ ءۇشىن ۇتقىر وقۋ ورتالىقتارىن قۇرۋ بويىنشا جۇمىس جۇزەگە اسىرىلادى.
دينارا بىتىكوۆا,
«ەگەمەن قازاقستان»