قازاقستان پرەزيدەنتى ۇجىمدىق قاۋىپسىزدىك شارتى ۇيىمىنىڭ مەرەيتويىنا وراي مەملەكەتارالىق «مير» تەلەارناسىنا سۇحبات بەردى, دەپ حابارلادى اقوردانىڭ ءباسپاسوز قىزمەتى.
مەملەكەت باسشىسى تەلەارنانىڭ ۇجىمدىق قاۋىپسىزدىك شارتى ۇيىمىنىڭ وڭىرلىك قاۋىپسىزدىكتى قامتاماسىز ەتۋدەگى ءرولى, ۇيىمنىڭ ينستيتۋتسيونالدىق دامۋى جانە بۇل ۇدەرىستەرگە قازاقستاننىڭ قوسقان ۇلەسى جونىندەگى ساۋالدارىنا جاۋاپ بەردى.
سۇحبات بارىسىندا نۇرسۇلتان نازارباەۆ وڭىردەگى جاڭا سىن-قاتەرلەر مەن قاۋىپتەرگە قاتىستى ءوز ويىن ورتاعا سالىپ, وعان قارسى ۇجىمدىق قاۋىپسىزدىك شارتى ۇيىمى اياسىندا كۇرەسۋدىڭ ۇجىمدىق شارالارى تۋرالى اڭگىمەلەدى.
سونداي-اق, قازاقستان پرەزيدەنتى ۇجىمدىق قاۋىپسىزدىك شارتى ۇيىمى مەن ناتو-نىڭ ۇقساستىعى جونىندە پىكىر ءبىلدىرىپ, بۇل ۇيىمداردىڭ سيپاتى مەن قۇرىلۋىنداعى مىندەتتەرىنىڭ ايىرماشىلىقتارىنا توقتالدى.