جۋىردا وبلىس اكىمىنىڭ باسپاسوز قىزمەتى ماڭىزدى دا قۋانىشتى ءبىر حاباردى تاراتتى. ياعني, وسىدان ونشاقتى كۇن بۇرىن ەر-ريادتا سەمەيدە وكپە اۋرۋلارىن ەمدەيتىن بالالار اۋرۋحاناسىن سالۋعا 7 ميلليون اقش دوللارىن گرانت ەسەبىندە ءبولۋ تۋرالى مەموراندۋمعا قول قويىلىپتى. ەكى جاقتى قۇجاتقا ساۋد ارابياسى كورولدىگى قارجى مينيسترىنىڭ ورىنباسارى سۇلەيمەن ات-تۇركي مەن شىعىس قازاقستان وبلىسى اكىمىنىڭ ءبىرىنشى ورىنباسارى سەرىك ابدەنوۆ قول قويعان كورىنەدى.
ءباسپاسوز پاراقشاسىندا ساۋد ارابياسى تاراپىنان كورولدىڭ مۇنداي شەشىمى قازاقستان باسشىسى ن.ءا.نازارباەۆتىڭ 29 تامىزدى يادرولىق قارۋدان باس تارتۋدىڭ حالىقارالىق كۇنى رەتىندە اتاپ ءوتۋ تۋرالى ۇسىنىسىن قولداعانىنىڭ بەلگىسى جانە سەمەي اتوم پوليگونىنىڭ جابىلعانىنا 20 جىل تولۋىنا وراي باۋىرلاس اراب ەلىنىڭ كورسەتكەن كومەگى ەكەندىگى اتاپ كورسەتىلگەن. مۇنىڭ سىرتىندا اتالعان مەملەكەت باسشىلىعى ەلباسىمىزدىڭ حالىقارالىق دەڭگەيدەگى بەدەلىن جوعارى باعالايتىندىقتارىن جەتكىزە وتىرىپ, ءبىزدىڭ ەلدىڭ يسلام كونفەرەنتسياسى ۇيىمىنا جەمىستى توراعالىق ەتەتىنىنە تىلەكتەستىكتەرىن ءبىلدىرىپتى.
تۋبەركۋلەز بۇگىندە جەر بەتىندە كەڭىنەن تاراعان اۋرۋ ءتۇرى بولىپ تابىلادى. 1993 جىلى دۇنيەجۇزىلىك دەنساۋلىق ساقتاۋ ۇيىمى وكپە اۋرۋىن ادامزاتتىڭ جاھاندىق ءماسەلەسى دەپ جاريالاعان ەدى. جەر شارىنىڭ ۇشتەن ءبىر بولىگى وسى ىندەتكە شالدىققان. الەمدە جىل سايىن 8,4 ميلليون ناۋقاس تىركەلىپ, سونىڭ 2 ميلليونعا جۋىعى كوز جۇمۋدا.
سەمەيدە دە جىلىنا جۇزدەن استام جەتكىنشەك وكپە اۋرۋىنا شالدىعىپ كەلەدى. سوندىقتان مۇندا 80 ورىندىق اۋرۋحانا سالۋ قاجەتتىلىگى تۋىنداپ وتىر. قازىرگى تاڭدا قۇرىلىس نىسانىنىڭ ورنى انىقتالىپ, مەديتسينالىق مەكەمەنىڭ جوبالىق-سمەتالىق جانە تەحنيكالىق-ەكونوميكالىق قۇجاتتارى ءازىر تۇرعان كورىنەدى. وندا ناۋقاستارعا بارلىق قولايلى جاعداي جاسالماق. 6 قاباتتى عيماراتتاعى ءار پالاتا 2-3 ناۋقاسقا لايىقتالىپ جاسالماق. جەتكىنشەكتەر وسىندا ەمدەلە جاتىپ, ساباقتارىن جالعاستىرماق. اۋرۋحانانىڭ اكىمشىلىك بولىگىندە كونفەرەنتس-زال, مۇراعات, ترەناجدىق زال سالۋ جوسپارلانعان. بۇل – سەمەي اتوم پوليگونىنىڭ جابىلعانىنا 20 جىل تولۋىنا وراي وسى ءوڭىر جەتكىنشەكتەرىنە ۇلكەن قامقورلىق.
ەندى اتالعان اراب ەلى سەمەي قالاسىندا سالىنىپ جاتقان ءۇش مىڭ ورىندىق جاڭا مەشىت قۇرىلىسىنا دا كومەكتەسپەك كورىنەدى.
داۋلەت سەيسەن ۇلى.
سەمەي.