اتالعان كەرۋەن 26 مامىر كۇنى تارازداعى «تورتكۇل» كەرۋەن سارايىنان سالتاناتتى تۇردە اتتانادى. استانا قالاسىنا دەيىنگى جول ءجۇرۋ ۋاقىتى شامامەن 60 كۇندى قۇرايدى. ال, كەرۋەن تىزبەگىندە 30 تۇيە, 10 سالت اتتى, 5 اربا, 15 اۆتوكولىك بولادى. سونىمەن قاتار, كەرۋەنشىلەر قۇرامىندا قوعام قايراتكەرلەرى, زيالى قاۋىم وكىلدەرى, قازاقستان حالقى اسسامبلەياسىنىڭ جانە قوعامدىق ۇيىمداردىڭ وكىلدەرى مەن ونەرپازدار, قولونەرشىلەر, ات سپورتىنىڭ وكىلدەرى بولادى. بۇل ايتۋلى شاراعا اقمولا مەن قاراعاندى وبلىستارىنىڭ قاتىسۋى ءوڭىرارالىق ىنتىماقتاستىقتى كورسەتەدى.
– كەرۋەن تاراز قالاسىنان شىعىپ, استانا قالاسىنا جەتكەنشە ءاربىر توقتايتىن پۋنكتتەردە ەكسپو-2017 كورمەسىن ناسيحاتتاۋعا باعىتتالعان ءىس-شارالار ۇيىمداستىرىلادى. ول جەردە كيىز ۇيلەر تىگىلىپ, ۇلكەن ساحنا, شاتىرلار ورناتىلادى. قازاق ەلىنىڭ تۇرمىس-تىرشىلىگى, سالت-داستۇرلەرى كورسەتىلەتىن كورىنىستەر, ۇلتتىق سپورت ويىندارى, كونتسەرتتىك باعدارلامالار ۇيىمداستىرىلادى, – دەيدى وبلىس اكىمدىگى مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ.
كەرۋەنشىلەر ەكسپو-2017 كورمەسىنە بارار جولدا «ۇشبۇلاق» كەرۋەن سارايىنا, قۇلان اۋىلىنا, سونداي-اق, مەركى, شۋ, مويىنقۇم اۋداندارىنا توقتاپ, ودان كەيىن قاراعاندى وبلىسىنىڭ سارىشاعان اۋىلىنا, بالقاش, قاراعاندى قالالارىنا دا ايالدايتىن بولادى.
حاميت ەسامان,
«ەگەمەن قازاقستان»
جامبىل وبلىسى