جاقىندا ماناما قالاسىندا قازاقستان ەلشىسى قايرات لاما شاريف باحرەين باسشىلىعىمەن ءبىرقاتار كەزدەسۋلەر وتكىزدى, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
باحرەين كورولى حاماد بەن يسا ءال حاليفا قابىلداۋى بارىسىندا ەكىجاقتى ماسەلەلەر تالقىعا سالىندى. باحرەيننىڭ جوعارى باسشىلىعى پرەزيدەنت ن.ا.نازارباەۆتىڭ قازاقستاننىڭ ۇدەمەلى يندۋستريالىق-يننوۆاتسيالىق دامۋ باعدارلاماسىن جۇزەگە اسىرۋ ءۇشىن ءوز ەلى ينۆەستورلارىنىڭ, سونداي-اق مانامادا ورنالاسقان اراب جانە شەتەلدىك بانكتەردىڭ وسى شاراعا بىرلەسە قاتىسۋلارىن جان-جاقتى قۇپتايتىندىعىن ءبىلدىردى.
قازاقستاندىق ديپلومات سونداي-اق باحرەين پرەمەر-ءمينيسترى حاليفا بەن سالمان ءال حاليفاعا الداعى 7-9 ماۋسىمدا استانادا وتەتىن 7-ءشى دۇنيەجۇزىلىك يسلام ەكونوميكالىق فورۋمىنا قاتىسۋعا رەسمي شاقىرۋدى تاپسىردى. قازاقستانداعى «يسلام داۆوسىن» وتكىزۋ ماقساتىندا اتالعان شاراعا شاقىرىلعان لاۋازىم يەلەرى جونىندە مالىمەت بەردى.
باحرەين ۇكىمەتىنىڭ باسشىسى شاقىرۋدى ريزاشىلىقپەن قابىل الدى جانە ءوز ەلىنىڭ قازاقستانمەن جان-جاقتى ىنتىماقتاستىقتى دامىتۋدى قالايتىندىعىن جەتكىزدى. اتاپ ايتقاندا, وعان ءبىزدىڭ ەلىمىزدە يسلام بانكينگى جۇيەسىن دامىتۋ باعىتىندا تەحنيكالىق كومەك كورسەتۋ جانە وسى سالادا قازاقستاندىق مامانداردى دايىنداۋ جاتادى. قازاقستاندىق ديپلومات قارجى سالاسىنداعى ىنتىماقتاستىقتىڭ بارلىق العىشارتتارعا يە ەكەندىگىن جانە ونىڭ قازاق-باحرەين قارىم-قاتىناستارىنىڭ نەگىزى بولا الاتىندىعىن اتاپ ءوتتى.
باحرەين سىرتقى ىستەر مينيسترلىگىندە قايرات لاما شاريف قازاقستان سىرتقى ىستەر ءمينيسترى ە.قازىحانوۆتىڭ الداعى 28-30 ماۋسىمدا استانادا وتەتىن يسلام كونفەرەنتسياسى ۇيىمىنا مۇشە مەملەكەتتەر سىرتقى ىستەر مينيسترلەرى كەڭەسىنىڭ 38-ءشى سەسسياسىنا قاتىسۋ ءۇشىن كورولدىك سىرتقى ساياسات مەكەمەسىنىڭ باسشىسى شەيح حالەد بەن احمەد بەن مۇحاممەد ءال حاليفاعا جولداعان شاقىرۋىن تابىس ەتتى. تاراپتار يكۇ سىرتقى ىستەر مينيسترلەرى كەڭەسىنىڭ كۇن تارتىبىنە ەنگىزىلگەن ايماقتاعى وزەكتى ماسەلەلەر بويىنشا پىكىر الماستى, سونداي-اق ەكىجاقتى ىنتىماقتاستىقتىڭ شارتتىق-قۇقىقتىق نەگىزىن نىعايتۋ جولدارىن تالقىلادى.
قازاقستان تاۋەلسىزدىگىنىڭ 20 جىلدىعى مەن باحرەين تاۋەلسىزدىگىنىڭ 40 جىلدىعىن اتاپ ءوتۋ جىلىندا ساۋدا-ەكونوميكالىق, ينۆەستيتسيالاردى ىنتالاندىرۋ جانە ءوزارا قورعاۋ تۋرالى ۇكىمەتارالىق كەلىسىمدەرگە, سونداي-اق قازاقستان مەن باحرەين سىرتقى ىستەر مينيسترلىكتەرى اراسىنداعى كونسۋلتاتسيالار بويىنشا ءوزارا تۇسىنىستىك مەموراندۋمىنا قول قويۋ جونىندە ۋاعدالاستىققا قول جەتكىزىلدى.