ەلى سەنگەن ەلباسى, مىنە, ەل تىزگىنىن قايتا قولىنا الدى. ءوز باسىم, ءساۋىردىڭ 3-ءى كۇنگى كەزەكتەن تىس پرەزيدەنتتىك سايلاۋدا سايلاۋشىلاردىڭ 95 پايىزدان استامىنىڭ قولداۋىن العان نۇرسۇلتان ءابىش ۇلىنىڭ بۇل جەڭىسى ءىس جۇزىندە 20 جىل بويى حالقىنا قالتقىسىز قىزمەت ەتكەن ەرەن ەڭبەگىنىڭ جەمىسى دەپ سانايمىن.
وسى ورايدا, مەن ءوزىم تانىعان ەلباسىنىڭ ءۇش قاسيەتى تۋرالى ايتۋدى ءجون كورىپ وتىرمىن. مەنى ەڭ الدىمەن ەلباسىنىڭ قىراعىلىعى قايران قالدىرادى. وسىدان تۋرا 14 جىل بۇرىن ەلىمىزدىڭ استاناسى ارقا توسىنە اۋىسادى دەگەندە, بۋىنىپ-ءتۇيىنىپ كەلگەن كوشتىڭ ورتاسىندا مەن دە بولدىم. قىزمەتكە كىرىستىك. كۇن-ءتۇن دەمەي جۇمىس جاسادىق. 300 مىڭعا تۇرعىنى ارەڭ جەتەتىن شاھاردىڭ بۇگىنگىدەي اسەم قالاعا اينالارىنا العاشىندا مەن دە كۇدىكپەن قاراپ ەدىم. تەك قانا ەلباسىمىزدىڭ كورەگەندىگى ارقاسىندا استانا الەمدەگى قاۋقارلى قالالاردىڭ بىرىنە اينالدى.
ەكىنشى ءبىر قاسيەتى – قايسارلىعى تاڭداندىرادى. ءا دەگەننەن, قوعامدى دەندەپ, تۇنشىقتىرىپ بارا جاتقان ۇيىمداسقان قىلمىستىق توپتاردىڭ كوزىن جويۋدى تالاپ ەتتى. جەڭ ۇشىنان جالعاسقان جەمقورلىقپەن كۇرەستى قولعا الدى. ەل تابالدىرىعىنان ەسىرتكىنىڭ ەنبەۋىن تاپسىردى. وسىنىڭ ارقاسىندا كوشەدەگى بۇزاقىلىق كەمىپ, ەلدىڭ كوڭىلى تىنىشتالدى. جۇرتتىڭ قۇلاعى جاستىققا تيگەندە ۋايىمسىز كوز ىلەتىن بولدى. ەلدىڭ الەۋمەتتىك احۋالىن كوتەرۋ ءۇشىن بيزنەستىڭ باقشاسىن گۇلدەندىردى. ءاربىر ادامعا ءوز كاسىبىن دوڭگەلەتۋ ءۇشىن بارىنشا جاعداي جاسادى. مەملەكەتتىك ورگانداردىڭ تاراپىنان جاسالعان قىسىمدى شەكتەپ, كاسىپكەرلەرگە كەدەرگى كەلتىرەتىن بارلىق تەتىكتەردى الىپ تاستادى. سونىڭ ارقاسىندا ءبىراز جۇرت بيزنەستىڭ نە ەكەنىن ءتۇسىنىپ, وتاندىق تاۋارلار ءوندىرىسىنىڭ كوسەگەسىن كوگەرتتى. «سىرت كوز – سىنشى» دەگەن. تالاي شەت مەملەكەتتەر مەن حالىقارالىق ۇيىمدار جاڭادان تاۋەلسىزدىك الىپ «ءتاي-ءتاي» باسقان جاس مەملەكەتتىڭ اياق الىسىنا سىن كوزبەن قاراپ, دەموكراتيالىق ينستيتۋتتاردىڭ قالاي داميتىنىن باقىلاپ وتىردى. نۇرسۇلتان نازارباەۆتىڭ تۇلعالىق قاسيەتى, ونىڭ وزگە مەملەكەت باسشىلارىمەن سەنىمدى ءارىپتەستىك, كىرشىكسىز دوستىق ورناتۋى قازاقستان اتىن الەمگە پاش ەتتى. ەقىۇ-عا توراعالىعىنا قازاقستان سايلانىپ, قازاق جەرىنە الەمنىڭ الپاۋىت ەلدەرىنىڭ ءبىرىنشى باسشىلارىنىڭ تابان تىرەۋى جانە بۇل تاريحي كەزدەسۋدىڭ ابىرويمەن ءوتۋى تەك ەلباسىمىزدىڭ ارقاسىندا بولعان قۇبىلىس دەسەك ارتىق ايتقاندىق ەمەس.
مەن جاستايىمنان تەمىردەي تارتىپكە باعىنىپ, ساپتا ءجۇرىپ ەسەيگەن ازاماتپىن. پرەزيدەنتتىڭ الدىندا ادال ەڭبەك ەتتىك. بولاشاقتا دا ەل مۇراتى ءۇشىن قالتقىسىز قىزمەت جاساۋعا ءازىرمىز. بىراق مەن حالىق الدىندا تىك تۇرىپ, قىزمەت ەتۋدىڭ مانەرى قالاي بولۋ كەرەكتىگىن ەلباسىمىزدىڭ الدىنا بارعاندا ءتۇسىندىم. تابيعي تاكاپپارلىعى تاۋداي بولعانمەن, حالقىنىڭ الدىندا رياسىز كوڭىلى مەن مەيىرىمدىلىگى سەزىلدى ماعان. كوزدەرىنەن ۇشقىنداعان جالىن بولاشاقتىڭ ەسىگىن قاعىپ تۇرعانداي اسەردە قالدىم. بۇل كىسىمەن كەز كەلگەن تاۋدى قوپارىپ, تالاي بيىكتى باعىندىرۋعا بولاتىنىن بايقادىم. مىنە, ءبىزدىڭ ەلباسى وسىنداي تۇلعا رەتىندە ءاردايىم قۇرمەت سەزىمىن تۋعىزادى.
مارات دەمەۋوۆ, استانا قالالىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى.