1922-1923 جىلدارى تاشكەنت شاھارىندا شىعىپ تۇرعان «شولپان» جۋرنالى توتە اراب جازۋىنان كيريلليتساعا كوشىرىلىپ, جەكە كىتاپ بوپ شىقتى. جۋرنالدىڭ سەگىز ءنومىرىن تۇگەلدەي تۇپنۇسقالارىنان قازىرگى قازاق قارپىنە تۇسىرگەندەر – مۇحتار اۋەزوۆ اتىنداعى وقمۋ ۋنيۆەرسيتەتىنىڭ دوتسەنتى, تاريح عىلىمدارىنىڭ كانديداتى سارسەباي كارىباەۆ پەن وقو ساياسي قۋعىن-سۇرگىن قۇرباندارى مۋزەيىنىڭ عىلىمي قىزمەتكەرى نۇرسۇلۋ تولەەۆا. «شولپانعا» ىزدەۋ سالىپ, وزبەكستاننىڭ مەملەكەتتىك مۇراعاتىنان كوشىرمەلەرىن الدىرىپ, كىتاپ بولىپ شىعۋىنا دەيىن باسشىلىق جاساعان – شىمكەنتتەگى ساياسي قۋعىن-سۇرگىن مۋزەيىنىڭ ديرەكتورى ءحانبيبى ەسەنقاراقىزى.
جاقىندا وسى مۋزەيدە جۋرنالدىڭ باعالى مادەني مۇراعا اينالعان كىتابى – «شولپاننىڭ» تۇساۋكەسەرى ۇيىمداستىرىلدى. قاراپ وتىرساڭىز, تالاي-تالاي ءنارسەگە قانىعاسىز. «شارۋاشىلىق», «پارتيا تىرشىلىگى», «ادەبيەت ءبولىمى», «ساياسات ءبولىمى», «ءبىلىم ءبولىمى», «تاريحي ءبولىم» سياقتى ايدارلاردىڭ ايتار سىرى مول دەسەك, ماعجان جۇماباەۆتىڭ «باتىر بايانى» مەن «شولپاننىڭ كۇناسى» اڭگىمەسى, مۇحتار اۋەزوۆتىڭ «قىر اڭگىمەلەرى», ءشاكارىمنىڭ, ساكەننىڭ, تاعى باسقا تۇلعالاردىڭ تۋىندىلارى تۇڭعىش رەت وسى «شولپاندا» جاريالانعان.
تۇساۋكەسەردە عالىمدار ۋ.بيشىمباەۆ, ق.ەرگوبەك, ءا.مۇساقۇلوۆ, ءا.قالىبەكوۆا, ب.تىلەۋبەرديەۆ, س.ءومىرزاقوۆ, اقىن-جازۋشىلار م.بايعۇت, ن.بەگالى ۇلى, ق.تورەتاي ۇلى جانە تاعى باسقالار وي-پىكىرلەرىن ءبىلدىرىپ, جيناقتىڭ تاعىلىمدى ءمان-ماڭىزىنا جان-جاقتى توقتالدى.
«ەگەمەن-اقپارات».