كەلەسى جىلى كورنەكتى مەملەكەت جانە قوعام قايراتكەرى دىنمۇحامەد احمەت ۇلى قوناەۆتىڭ تۋعانىنا 100 جىل تولادى. قوناەۆ قوعامدىق قورىنىڭ, باسقا دا ۇيىمدار مەن ازاماتتاردىڭ ەلشىلىككە, ماسكەۋ ۇكىمەتىنە تۇسكەن وتىنىشتەرىنە سايكەس قازىر رەسەي استاناسىندا دىنمۇحامەد قوناەۆتىڭ ەسىمىن ەستە قالدىرۋدىڭ مۇمكىن بولاتىن جولدارى ىزدەستىرىلۋدە. مۇنداي رەتتە قالا ۇكىمەتىنىڭ نورماتيۆتىك قۇجاتتارىندا كوزدەلگەن مىندەتتى تالاپتار قاتاڭ ەسكەرىلەتىندىكتەن, جالپى ماسكەۋدە تاريحي تۇلعالارعا ەسكەرتكىش, ءمۇسىن, مەموريالدىق تاقتا, ت.ب. وسى ءتارىزدى ەستەلىك بەلگىلەر ورناتۋعا قول جەتكىزۋ وڭاي ەمەس, بۇل كوپ كۇش-جىگەردى تالاپ ەتەتىن, وزىندىك قيىندىق-ەرەكشەلىكتەرى بار ءىس.
قازاقستان ەلشىسى زاۋىتبەك تۇرىسبەكوۆ: «ماسكەۋ بولات جانە قورىتپالار ينستيتۋتى» ۇلتتىق زەرتتەۋ تەحنولوگيالىق ۋنيۆەرسيتەتىنىڭ رەكتورى دميتري ليۆانوۆپەن كەزدەسكەن كەزدە دىنمۇحامەد قوناەۆتىڭ ءمۇسىنىن وقۋ ورنى كورپۋستارىنىڭ بىرىنە ورناتۋ ماسەلەسى كەلىسىلدى. د.قوناەۆ وسى ينستيتۋتتىڭ 1936 جىلعى تۇلەگى, ونىڭ كاسىبي جانە عىلىمي قىزمەتى اتالعان وقۋ ورنىمەن تىعىز بايلانىستى بولدى.
ءبىزدىڭ ەلىمىز ءۇشىن دە ينجەنەرلىك-تەحنيكالىق ماماندىقتار بويىنشا بىلىكتى كادرلار دايارلاۋعا اتسالىسىپ كەلە جاتقان كوپشىلىككە بەلگىلى «ماسكەۋ بولات جانە قورىتپالار ينستيتۋتى» ۇلتتىق زەرتتەۋ تەحنولوگيالىق ۋنيۆەرسيتەتىنىڭ باسشىلىعى د.قوناەۆ ءمۇسىنىن ورناتۋ باستاماسىمەن جالعاستىرىپ, جالپى وقۋ ورنىندا قازاقستان رەسپۋبليكاسىنىڭ ارناۋلى ءمۇيىسىن ۇيىمداستىرۋ ماسەلەسىن ۇسىنۋدا. اتاپ ايتقاندا, مۇندا ينستيتۋت پەن قازاقستان اراسىنداعى قارىم-قاتىناستىڭ ءبىلىم, عىلىم جانە مەتاللۋرگياداعى وزىق تاجىريبەنى ەنگىزۋ سالالارىنداعى باي تاريحى, تاۋەلسىز مەملەكەتىمىزدىڭ جان-جاقتى جەتىستىكتەرى, ءوزارا ىنتىماقتاستىقتىڭ پەرسپەكتيۆالى باعىتتارى كورسەتىلەتىن بولادى.
ەلىمىزگە ارنالعان بولاشاق كومپوزيتسيادا قازاقستان رەسپۋبليكاسىنىڭ تۇڭعىش پرەزيدەنتى – ەلباسىمىز, «ماسكەۋ بولات جانە قورىتپالار ينستيتۋتى» ۇلتتىق زەرتتەۋ تەحنولوگيالىق ۋنيۆەرسيتەتىنىڭ قۇرمەتتى پروفەسسورى ن.ءا.نازارباەۆ جايىندا, ونىڭ تاۋەلسىز قازاقستاندى قالىپتاستىرىپ, دامىتۋ جولىنداعى تاريحي ءرولى تۋرالى اقپاراتتار ورنالاستىرىلادى دەپ جوبالانۋدا», دەيدى.
سونىمەن بىرگە, تەحنولوگيالىق ۋنيۆەرسيتەت باسشىلىعى, قازاقستان تاراپىنان قارجىلىق تۇرعىدا قولداۋ جاسالسا, د.قوناەۆتىڭ قولا ءمۇسىنىن ازىرلەۋگە وقۋ ورنى كافەدرالارىنىڭ كاسىبي-شىعارماشىلىق مۇمكىندىكتەرىن پايدالانۋعا دا بولاتىنىن ايتادى.
سەرىكقالي بايمەنشە.
ماسكەۋ.