كەشە پرەزيدەنت اكىمشىلىگىنىڭ باسشىسى اسلان مۋسين جۇمىس ساپارىمەن اتىراۋدا بولدى. ول الدىمەن وبلىستىق ءماسليحاتتىڭ كەزەكتەن تىس شاقىرىلعان سەسسياسىنا قاتىستى. «بۇگىن اتىراۋعا ەلباسىنىڭ تاپسىرماسىمەن كەلدىم. نۇرسۇلتان ءابىش ۇلى وبلىس اكىمى قىزمەتىنە بەرگەي رىسقاليەۆتىڭ كانديداتۋراسىن ۇسىندى», دەي كەلە, ءماسليحات دەپۋتاتتارىنىڭ تالقىسىنا سالدى. دەپۋتاتتار ب. رىسقاليەۆتىڭ كانديداتۋراسىنا ءبىراۋىزدان داۋىس بەردى.
بۇدان كەيىن وبلىس اكتيۆىنىڭ كەڭەيتىلگەن ءماجىلىسى ءوتىپ, وندا ا.مۋسين ەلباسىنىڭ وبلىس اكىمى قىزمەتىنە ب. رىسقاليەۆتى تاعايىنداۋ تۋرالى جارلىعىن وقىپ بەردى. ال قىزمەتىنە قايتا تاعايىندالعان اكىم ەلباسى بىلدىرگەن سەنىمنىڭ ۇدەسىنەن شىعاتىنىن, العا قويىلعان مىندەتتەردى اتقارۋ بارىسىندا جاۋاپكەرشىلىكتىڭ جۇگى جەڭىلدەمەيتىنىن جەتكىزدى.
پرەزيدەنت اكىمشىلىگىنىڭ باسشىسى وڭىردە باسا نازار اۋدارىلۋى ءتيىس ماسەلەلەردى ەكشەپ بەردى. بىرىنشىدەن, اۋدانداردى تەڭدەي دامىتۋ ماسەلەسى كۇن تارتىبىنەن ءتۇسپەۋى قاجەت. ەكىنشىدەن, شاعىن جانە ورتا بيزنەستى وركەندەتۋگە سەرپىن بەرىلۋى ءتيىس. قازىر بۇل سالادا ەڭبەك ەتەتىندەر وڭىردەگى بەلسەندى حالىقتىڭ 23 پايىزىن قۇرايدى. ءۇشىنشىدەن, مەديتسينالىق قىزمەت كورسەتۋ ساپاسىن جاقسارتۋ, اسىرەسە, انا مەن بالا ءولىمىنىڭ الدىن الۋ جايى ەرەكشە كوڭىل ءبولۋدى قاجەت ەتەدى.
جولداسبەك شوپەعۇل.
اتىراۋ وبلىسى.